ગીતશાસ્ત્ર 135 - પવિત્ર બાઇબલ C.L.

સ્તુતિગીત પ્રભુની સ્તુતિ

¹ યાહની સ્તુતિ કરો: હાલ્લેલૂયાહ! પ્રભુના નામની સ્તુતિ કરો! હે પ્રભુના સેવકો, તમે તેમની સ્તુતિ કરો!

² પ્રભુના ઘરમાં, એટલે, આપણા ઈશ્વરના મંદિરના આંગણામાં ઊભા રહી ભક્તિ કરનારા સેવકો, તમે તેમની સ્તુતિ કરો!

³ યાહની સ્તુતિ કરો: કારણ, તે ભલા છે; તેમના નામનાં ગીતો ગીઓ; કારણ, તેમ કરવું આનંદદાયક છે.

⁴ યાહે આપણા પૂર્વજ યાકોબને પોતાને માટે અને ઇઝરાયલ લોકને પોતાની ખાસ સંપત્તિ તરીકે પસંદ કર્યા.

કુદરતના સ્વામી અને પોતાના લોકના ઉદ્ધારક ઈશ્વર

⁵ હું પોતે જાણું છું કે પ્રભુ મહાન છે. તે સર્વ દેવો કરતાં મહાન છે.

⁶ આકાશોમાં અને પૃથ્વી ઉપર, સમુદ્રોમાં અને નીચેનાં સર્વ ઊંડાણોમાં પ્રભુ પોતાને જે પસંદ પડે તે કરે છે.

⁷ પૃથ્વીને છેડેથી તે વાદળોને ઉપર ચઢાવે છે, અને તે વર્ષાને માટે વીજળી ચમકાવે છે તથા પોતાની વખારોમાંથી પવનને બહાર લાવે છે.

⁸ ઈશ્વરે ઇજિપ્તમાં, ઇજિપ્તીઓના અને તેમનાં પશુઓના પ્રથમજનિતોનો સંહાર કર્યો.

⁹ તેમણે ઇજિપ્તમાં ફેરો અને તેના સર્વ સેવકો વિરુદ્ધ અજાયબ કાર્યો અને ચમત્કારો કર્યાં.

¹⁰ તેમણે ઘણા દેશોને નષ્ટ કર્યા અને શક્તિશાળી રાજાઓને મારી નાખ્યા;

¹¹ એટલે અમોરીઓના રાજા સિહોનને, બાશાનના રાજા ઓગને તથા કનાનના સર્વ રાજાઓને તેમણે માર્યા.

¹² ઈશ્વરે તેમની ભૂમિ પોતાના ઇઝરાયલી લોકને વારસા તરીકે આપી.

ઈશ્વરની મહાનતા

¹³ હે યાહવે, તમારું નામ સાર્વકાલિક છે; તમારું સ્મરણ પેઢી દરપેઢી ટકે છે.

¹⁴ સાચે જ પ્રભુ પોતાના લોકનો બચાવ કરે છે; અને પોતાના ભક્તો પ્રત્યે દયા દર્શાવે છે.

અન્ય દેશોના દેવો

¹⁵ અન્ય દેશોના દેવો તો સોનાચાંદીની મૂર્તિઓ છે; તેઓ માનવી હાથોથી ઘડાયેલી છે.

¹⁶ તેમને મુખ છે, પણ તે બોલી શક્તી નથી; આંખો છે, પણ જોઈ શક્તી નથી;

¹⁷ તેમને કાન છે, પણ તે સાંભળી શક્તી નથી; અને તેમના મુખમાં શ્વાસોચ્છવાસ પણ નથી.

¹⁸ તેમને ઘડનારા તેમ જ તેમના પર ભરોસો રાખનારા સર્વ હાથે ઘડેલી મૂર્તિઓ જેવા વ્યર્થ થશે.

પ્રભુની સ્તુતિ માટે આમંત્રણ

¹⁹ હે ઇઝરાયલના લોકો, પ્રભુને ધન્ય કહો! હે આરોનવંશી યજ્ઞકારો, પ્રભુને ધન્ય કહો!

²⁰ હે લેવી કુળના લોકો, પ્રભુને ધન્ય કહો! હે પ્રભુના સર્વ ભક્તો, પ્રભુને ધન્ય કહો!

²¹ યરુશાલેમમાં વસનાર પ્રભુને સિયોનનગરમાંથી ધન્ય કહો! યાહની સ્તુતિ કરો: હાલ્લેલૂયાહ!