ગીતશાસ્ત્ર 129 - પવિત્ર બાઇબલ C.L.

શત્રુઓના પરાજય માટે પ્રાર્થના ઇઝરાયલના લોક એક વ્યક્તિ તરીકે પોતાની દુર્દશા વર્ણવે છે

(આરોહણનું ગીત)

¹ ‘શત્રુઓએ બાળપણથી જ મારા પર અત્યંત જુલમ કર્યો છે,’ એમ ઇઝરાયેલના લોક કહો;

² ‘શત્રુઓએ બાળપણથી મારા પર અત્યંત જુલમ કર્યો છે, છતાં તેઓ મને નષ્ટ કરી શક્યા નથી.

³ જેમ કોઈ હળથી ખેતરમાં લાંબા ચાસ પાડે તેમ તેમણે મારી પીઠ પર ફટકાના ઊંડા ઘા પાડયા.’

દુષ્ટોના વિનાશ માટે યાચના

⁴ પરંતુ પ્રભુ ન્યાયી છે; તે દુષ્ટોની ઝૂંસરી ભાંગી નાખશે.

⁵ સિયોન પર દ્વેષ રાખનારા સર્વ પરાજયથી લજ્જિત બની પાછા હઠશે.

⁶ તેઓ ધાબા પર ઊગતા ઘાસના જેવા થાઓ, જે પૂરેપૂરું વયા પહેલાં કરમાઈ જાય છે;

⁷ તેનાથી ઘાસ કાપનારની મુઠ્ઠી કે પૂળા બાંધનારની બાથ ભરાતી નથી.

⁸ એવા ઘાસની કાપણી કરનારને રાહદારીઓ “પ્રભુની આશિષ તમારા પર ઊતરો,” એવી શુભેચ્છા પાઠવતા નથી, અને એ કાપણી કરનારા પણ પ્રત્યુત્તરમાં “અમે ય તમને યાહવેને નામે આશિષ આપીએ છીએ,” એવું કહેતા નથી.