ગીતશાસ્ત્ર 124 - પવિત્ર બાઇબલ C.L.

પોતાના લોકના રક્ષક ઈશ્વર

(આરોહણનું ગીત; દાવિદનું)

¹ ઇઝરાયલના લોક કબૂલાત કરો કે, “જો પ્રભુ અમારી પડખે ન હોત;

² અમારા શત્રુઓએ અમારા પર આક્રમણ કર્યું, ત્યારે પ્રભુ જો અમારી પડખે ન હોત,

³ તો અમારા પર શત્રુઓનો ક્રોધ ભભૂકી ઊઠયો ત્યારે તેઓ અમને જીવતા ગળી ગયા હોત.

⁴ ત્યારે પાણીનાં પૂર અમને ઘસડી ગયાં હોત અને વેગીલો જલપ્રવાહ અમારી ઉપર ફરી વળ્યો હોત.

⁵ અને તોફાની મોજાંએ અમને ડુબાડી દીધા હોત.”

⁶ પ્રભુને ધન્ય હો! તેમણે અમને અમારા શત્રુઓના દાંતના શિકાર થવા દીધા નથી.

⁷ પારધીની જાળમાંથી છટકી જતા પક્ષીની જેમ અમારા જીવ બચી ગયા; જાળ તૂટી ગઈ અને અમે મુક્ત થઈ ગયા.

⁸ અમારી સહાય કરનારનું નામ યાહવે છે; તે આકાશ તથા પૃથ્વીના સર્જનહાર છે.