ગીતશાસ્ત્ર 122 - પવિત્ર બાઇબલ C.L.

યરુશાલેમની પ્રશંસા

(આરોહણનું ગીત, દાવિદનું)

¹ જ્યારે મિત્રોએ મને કહ્યું, “ચાલો, આપણે પ્રભુના મંદિરે જઈએ,” ત્યારે મને ઘણો આનંદ થયો.

² હે યરુશાલેમ, હવે અમે તારા પ્રવેશદ્વારોમાં ઊભા છીએ.

³ યરુશાલેમ નગર તો સુંદર, સુવ્યવસ્થિત અને સુગઠિત રીતે બંધાયેલું છે.

⁴ અહીં વિભિન્‍ન કુળો યાત્રા કરવા આવે છે; એટલે, યાહનાં કુળો તેમના આદેશ મુજબ તેમના નામનો આભાર માનવા આવે છે.

⁵ અહીં ઇઝરાયલના દાવિદવંશી રાજવીઓ રાજ્યાસન પર બિરાજતા, અને નેકીપૂર્વક રાજ કરતા.

⁶ યરુશાલેમની આબાદી માટે પ્રાર્થના કરો; “હે યરુશાલેમ, તારા પર પ્રેમ કરનાર સમૃદ્ધ બનો.”

⁷ તારા કોટની અંદર સલામતી અને તારા મહેલોમાં સમૃદ્ધિ વસો.

⁸ મારા ભાઈઓ અને મિત્રો માટેની લાગણી ખાતર હું યરુશાલેમને કહીશ, “તારામાં શાંતિ થાઓ.”

⁹ આપણા ઈશ્વર પ્રભુના મંદિરને હું ચાહું છું; તેથી હું તારા કલ્યાણ માટે પ્રાર્થના કરીશ.