ગીતશાસ્ત્ર 121 - પવિત્ર બાઇબલ C.L.

ઇઝરાયલના સંરક્ષક યાત્રાળુનો પ્રશ્ર્ન

(આરોહણનું ગીત)

¹ હું પર્વતો તરફ મારી આંખો ઊંચી કરું છું; મને ક્યાંથી સહાય મળશે?

² આકાશ અને પૃથ્વીના સર્જનહાર પ્રભુ પાસેથી જ મને સહાય મળશે.

યજ્ઞકારની આશિષ

³ તે તારા પગને ડગવા દેશે નહિ; તારા રક્ષક સદા જાગ્રત છે.

⁴ ઇઝરાયલી લોકના રક્ષક ઈશ્વર કદી ઊંઘતા નથી કે નિદ્રાધીન થતા નથી.

⁵ પ્રભુ તારા સંરક્ષક છે; પ્રભુ તારે જમણે હાથે તને છાયા કરશે.

⁶ દિવસે સૂર્ય કે રાત્રે ચંદ્ર તને હાનિ પહોંચાડશે નહિ.

⁷ પ્રભુ સર્વ જોખમથી તારું રક્ષણ કરશે. તે તારા પ્રાણની રક્ષા કરશે.

⁸ તું બહાર જાય કે ઘેર પાછો ફરે ત્યારે પ્રભુ તને સાચવશે; હમણાંથી સર્વકાળ સુધી પ્રભુ તારું રક્ષણ કરશે.