ગીતશાસ્ત્ર 120 - પવિત્ર બાઇબલ C.L.

સહાય માટે પ્રાર્થના

(આરોહણનું ગીત)

¹ મારા સંકટમાં મેં પ્રભુને પોકાર કર્યો, અને તેમણે મને ઉત્તર આપ્યો.

² “હે પ્રભુ, જૂઠા હોઠોવાળા અને કપટી જીભના લોકોથી મારા જીવને બચાવો.”

³ હે કપટી જીભ, ઈશ્વર તને કેવી સજા કરશે? તે તારા કેવા હાલ કરશે?

⁴ યોદ્ધાઓનાં તીક્ષ્ણ તીરોથી અને ધગધગતા અંગારાથી તને સજા થશે.

⁵ અરેરે, તેમની મધ્યે વસવું એ તો મારે માટે મેશેખમાં દેશનિકાલ થવા જેવું અથવા કેદારના તંબૂઓમાં વસવા બરાબર છે.

⁶ હું તો શાંતિના દ્વેષકો મધ્યે લાંબો સમય રહીને કંટાળી ગયો છું.

⁷ હું શાંતિ ચાહું છું; પરંતુ હું તે વિષે બોલું, ત્યારે તેઓ લડાઈ કરવા માંગે છે!