ગીતશાસ્ત્ર 118 - પવિત્ર બાઇબલ C.L.

વિજય માટે આભારદર્શન: ઈશ્વરની સ્તુતિ

¹ પ્રભુનો આભાર માનો; કારણ, તે ભલા છે, તેમનો પ્રેમ સર્વકાલીન છે.

² ઇઝરાયલના લોકો તમે આમ કહો; “તેમનો પ્રેમ, સર્વકાલીન છે.”

³ આરોનવંશી યજ્ઞકારો, તમે આમ કહો; “તેમનો પ્રેમ સર્વકાલીન છે.”

⁴ પ્રભુના ભક્તો, તમે આમ કહો; “તેમનો પ્રેમ સર્વકાલીન છે.”

યુદ્ધમાં વિજય માટે આભારદર્શન

⁵ સંકટમાં મેં યાહને પોકાર કર્યો, એટલે તેમણે મને ઉત્તર આપ્યો; તે મને વિશાળ જગામાં લાવ્યા.

⁶ પ્રભુ મારી સાથે છે; તેથી હું ડરવાનો નથી. માણસ મને શું નુક્સાન કરી શકે?

⁷ પ્રભુ મારી પડખે છે; તેથી મારા શત્રુઓનો પરાજય જોઈને હું આનંદ પામીશ.

⁸ માણસો પર ભરોસો રાખવા કરતાં પ્રભુ પર આધાર રાખવો સારો છે.

⁹ શાસકો પર ભરોસો રાખવા કરતાં પ્રભુ પર આધાર રાખવો સારો છે.

¹⁰ ઘણા શત્રુઓએ મને ઘેરી લીધો હતો, પરંતુ યાહવેના નામના સામર્થ્યથી મેં તેમનો સંહાર કર્યો.

¹¹ તેમણે મને ચારે બાજુથી બરાબર ઘેરી લીધો હતો; પરંતુ યાહવેના નામના સામર્થ્યથી મેં તેમનો સંહાર કર્યો.

¹² મધમાખીઓની જેમ તેમણે મને ઘેર્યો હતો, પણ તે ઝાંખરાની આગની જેમ જલદી હોલવાઈ ગયા અને યાહવેના નામના સામર્થ્યથી મેં તેમનો સંહાર કર્યો.

¹³ મને ગબડાવી દેવા તેમણે ભારે ધક્કા માર્યા; પરંતુ પ્રભુએ મને સહાય કરી.

¹⁴ યાહ મારું સામર્થ્ય અને ગીત છે. તે મને વિજય અપાવે છે.

¹⁵ ઈશ્વરના નેકજનોના પડાવોમાં જયજયકારના અને વિજયના પોકારો સંભળાય છે: “પ્રભુના જમણા ભુજે વિજય પ્રાપ્ત કર્યો છે,

¹⁶ પ્રભુનો જમણો ભુજ ઊંચો કરાયેલો છે, પ્રભુના જમણા ભુજે વિજય પ્રાપ્ત કર્યો છે.”

મૃત્યુમાંથી બચાવ

¹⁷ હું મૃત્યુ પામ્યો નહિ પણ જીવતો રહ્યો, તેથી હું યાહનાં અદ્‍ભુત કાર્યોને પ્રગટ કરીશ.

¹⁸ જો કે યાહે મને સખત શિક્ષા કરી, પરંતુ તેમણે મને મૃત્યુને સોંપી દીધો નથી.

જનસમુદાયના આગેવાન અને મંદિરની અંદરના યજ્ઞકારો વચ્ચે સંવાદ આગેવાન:

¹⁹ ઈશ્વરનિષ્ઠ લોકોનું પ્રવેશદ્વાર મારે માટે પણ ખોલો; જેથી હું તેમાં થઈને જાઉં, અને યાહનો આભાર માનું.

યજ્ઞકાર:

²⁰ આ પ્રભુના મંદિરનું દ્વાર છે; માત્ર ઈશ્વરનિષ્ઠ લોકો જ તેમાંથી પ્રવેશે છે.

આગેવાન:

²¹ હું તમારો આભાર માનું છું, કારણ, તમે મને વિજય અપાવ્યો છે; તમે મારા ઉદ્ધારક બન્યા છો.

પ્રભુનું કાર્ય

²² ‘જે પથ્થરને બાંધકામ કરનારાઓએ રદબાતલ ગણ્યો હતો તે જ પથ્થર ખૂણાનો મુખ્ય પથ્થર બન્યો!’

²³ આ તો પ્રભુએ કરેલું કાર્ય છે; આપણી દષ્ટિમાં તે આશ્ર્વર્યજનક છે.

²⁴ આ તો પ્રભુના વિજયનો દિવસ છે; ચાલો, આપણે તેમાં આનંદોત્સવ કરીએ.

²⁵ હે પ્રભુ, કૃપા કરી અમને બચાવો; હે પ્રભુ, કૃપા કરી અમને વિજયી બનાવો.

યજ્ઞકારની આશિષ

²⁶ યાહવેને નામે જે આવે છે તે આશીર્વાદિત હો. પ્રભુના મંદિરમાંથી અમે તમને આશિય આપીએ છીએ.

²⁷ યાહવે જ એકમાત્ર ઈશ્વર છે. તેમણે આપણને પ્રકાશ આપ્યો છે. વેદીનાં શિંગો સાથે પર્વના બલિદાનને દોરડાંથી બાંધો.

ઈશ્વરની સ્તુતિ

²⁸ તમે મારા ઈશ્વર છો, હું તમારો આભાર માનું છું. હે મારા ઈશ્વર, હું તમારી મહત્તા પ્રસિદ્ધ કરીશ.

²⁹ પ્રભુનો આભાર માનો; કારણ, તે ભલા છે; તેમનો પ્રેમ સર્વકાલીન છે.