ગીતશાસ્ત્ર 115 - પવિત્ર બાઇબલ C.L.

એકમાત્ર સાચા ઈશ્વર વિધર્મીઓના પ્રશ્ર્નને લીધે ઈશ્વરના ગૌરવના પ્રકટીકરણ માટે અરજ

¹ હે યાહવે, અમારે લીધે નહિ, અમારે લીધે નહિ, પરંતુ તમારા નામને લીધે, અને તમારા પ્રેમ તથા વિશ્વાસુપણાને લીધે, તમારું ગૌરવ પ્રગટ કરો.

² અન્ય પ્રજાઓ એવું શા માટે પૂછે કે, “તમારા ઈશ્વર ક્યાં છે?”

અદૃશ્ય ઈશ્વર અને દૃશ્ય મૂર્તિઓનો વિરોધાભાસ

³ અમારા ઈશ્વર તો સ્વર્ગમાં છે. પોતાની ઇચ્છા મુજબ કરવા તે સર્વશક્તિમાન છે,

⁴ પરંતુ અન્ય પ્રજાઓની દેવમૂર્તિઓ તો સોનારૂપાની જ છે, અને તે માણસોના હાથે ઘડાયેલી છે.

⁵ તેમને મુખ છે, પણ બોલી શક્તી નથી; આંખો છે, પણ જોઈ શક્તી નથી;

⁶ તેમને કાન છે, પણ સાંભળી શક્તી નથી; નાક છે, પણ સૂંધી શક્તી નથી;

⁷ તેમને હાથ છે, પણ સ્પર્શી શક્તી નથી; પગ છે, પણ ચાલી શક્તી નથી. અરે, તેઓ પોતાના ગળામાંથી શ્વાસોચ્છવાસનો અવાજ પણ કાઢી શક્તી નથી.

⁸ તેમને ઘડનારા તેમ જ તેમના પર ભરોસો રાખનારા સર્વ હાથે ઘડેલી મૂર્તિઓ જેવા વ્યર્થ થશે.

જીવંત ઈશ્વરને વળગી રહેવા આહ્વાન

⁹ હે ઇઝરાયલના લોક, તમે પ્રભુ પર ભરોસો રાખો; તે જ તમારા બેલી અને તમારી સંરક્ષક ઢાલ છે

¹⁰ હે આરોનવંશી યજ્ઞકારો, પ્રભુ પર ભરોસો રાખો; તે જ તમારા સહાયક અને તમારી સંરક્ષક ઢાલ છે.

¹¹ હે પ્રભુના ભક્તો, તમે પણ પ્રભુ પર ભરોસો રાખો; તે જ તમારા સહાયક અને તમારી સંરક્ષક ઢાલ છે.

ઈશ્વરની આશિષ

¹² પ્રભુ આપણને સંભારે છે, અને તે આપણને આશિષ આપશે, ઇઝરાયલના લોકને તે આશિષ આપશે; આરોનવંશી યજ્ઞકારોને તે આશિષ આપશે.

¹³ પ્રભુ તેમના ભક્તોને, નાનામોટા સર્વને આશિષ આપશે.

¹⁴ પ્રભુ તમને આબાદ કરો, તમને તથા તમારા વંશજોને પુષ્કળ સંતતિ આપો.

¹⁵ આકાશ તથા પૃથ્વીના સર્જક પ્રભુ તમને આશિષ આપો.

ઈશ્વરની સ્તુતિ

¹⁶ આકાશોનાં આકાશો પ્રભુનાં છે, પણ પૃથ્વી તો તેમણે માનવજાતને આપી છે.

¹⁷ મૃતકો, એટલે મૃત્યુલોક શેઓલની નીરવતામાં ઊતરી જનારાં યાહની સ્તુતિ કરી શક્તાં નથી.

¹⁸ પરંતુ અમે જીવંત જનો તો હમણાંથી સર્વકાળ સુધી યાહની સ્તુતિ કરીશું. યાહની સ્તુતિ કરો: હાલ્લેલુયાહ!