ગીતશાસ્ત્ર 114 - પવિત્ર બાઇબલ C.L.

પાસ્ખા પર્વનું ગીત

¹ જ્યારે ઇઝરાયલી લોકો ઇજિપ્તમાંથી નીકળ્યા, એટલે, યાકોબના વંશજો પરભાષી પ્રજામાંથી નીકળી આવ્યા;

² ત્યારે યહૂદિયાનો પ્રદેશ ઈશ્વરનું પવિત્રસ્થાન બન્યો, અને ઇઝરાયલ દેશ તેમનું અધિકારક્ષેત્ર બન્યો.

³ સમુદ્ર તે જોઈને નાઠો, અને યર્દન નદી પાછી હઠી;

⁴ પર્વતો બકરાઓની જેમ અને ટેકરીઓ ઘેટાંની જેમ ભયથી કૂદયાં.

⁵ હે સમુદ્ર, તને શું થયું કે તું નાઠો? હે યર્દન, તું કેમ પાછી હઠી?

⁶ હે પર્વતો, તમે બકરાઓની જેમ અને હે ટેકરીઓ, તમે ઘેટાંની જેમ કેમ કૂદયાં?

⁷ હે પૃથ્વી, પ્રભુની હજૂરમાં, અમારા પૂર્વજ યાકોબના ઈશ્વરની હજૂરમાં ધ્રૂજી ઊઠ.

⁸ તે ખડકને જળાશયમાં અને ચકમકના ખડકને ઝરણામાં ફેરવી નાખે છે.