ગીતશાસ્ત્ર 113 - પવિત્ર બાઇબલ C.L.

ભલાઈ માટે પ્રભુની સ્તુતિ

¹ યાહની સ્તુતિ કરો: હાલ્લેલૂયાહ! હે પ્રભુના સેવકો, તેમની સ્તુતિ કરો; યાહવેના નામની સ્તુતિ કરો.

² હમણાંથી સર્વકાળ સુધી યાહવેના નામને ધન્ય હો!

³ સૂર્યોદયથી સૂર્યાસ્ત સુધી યાહવેના નામની સ્તુતિ થાઓ.

⁴ પ્રભુ સર્વ રાષ્ટ્રો પર સર્વોપરી શાસક છે; તેમનો મહિમા આકાશોથી ઊંચો છે.

⁵ આપણા ઈશ્વર પ્રભુ સમાન કોણ છે? તે ઉચ્ચસ્થાન પર બિરાજમાન છે.

⁶ પણ તે પૃથ્વી પર દષ્ટિપાત કરવા આકાશમાંથી ઝૂકીને નીચે જુએ છે.

⁷ તે ધૂળમાંથી ગરીબોને ઉપર લાવે છે. અને ઉકરડા ઉપરથી કંગાલોને ઊંચે ઉઠાવે છે.

⁸ તે તેમને આગેવાનો સાથે સન્માનનું સ્થાન આપે છે, અને તેમને પોતાના લોકના આગેવાનો સાથે બેસાડે છે.

⁹ ઈશ્વરની આશિષ વંધ્યાને સંતાનોની આનંદી માતા બનાવે છે અને વંધ્યાને તેના જ ઘરમાં વસાવે છે. યાહની સ્તુતિ કરો: હાલ્લેલૂયાહ!