ગીતશાસ્ત્ર 108 - પવિત્ર બાઇબલ C.L.

વિજય માટે પ્રાર્થના સ્તુતિનો હેતુ

(ગાયન: દાવિદનું ગીત)

¹ હે ઈશ્વર, મારા મનને તમારી લગની લાગી છે. હું ગીતો ગાઈશ અને વાજિંત્રો પણ વગાડીશ. હે મારા પ્રાણ, જાગ.

² મારી વીણા તથા તાનપુરા તમે પણ જાગો. હું જાતે પ્રભાતને જગાડીશ.

³ હે પ્રભુ, હું વિવિધ દેશોના લોકોની મધ્યે તમારી આભારસ્તુતિ કરીશ, હું સર્વ પ્રજાઓની વચમાં તમારાં ગુણગાન ગાઈશ.

⁴ તમારો પ્રેમ આકાશોથી પણ ઊંચે પ્રસરેલો છે, અને તમારું વિશ્વાસુપણું વાદળોને પણ આંબે છે.

⁵ હે ઈશ્વર, તમારી મહત્તા આકાશ કરતાં ઉન્‍નત મનાઓ અને સમસ્ત સૃષ્ટિમાં તમારું ગૌરવ વ્યાપી રહો.

વિજય માટે પ્રાર્થના

⁶ અમને પ્રત્યુત્તર આપો, અને તમારા જમણા હાથથી અમને વિજય પમાડો; જેથી અમે તમારાં પ્રિયજનો ઊગરી જઈએ.

ઈશ્વરનો પ્રત્યુત્તર

⁷ ઈશ્વર પોતાના પવિત્રસ્થાનમાંથી વચન આપે છે: “હું વિજયના આનંદ સાથે શખેમ પ્રદેશના ભાગ પાડીશ, અને સુક્કોથના ખીણપ્રદેશને મારા લોકોમાં વહેંચી આપીશ.

⁸ ગિલ્યાદનો પ્રદેશ મારો શિરતાજ છે, અને યહૂદિયાનો પ્રદેશ મારો રાજદંડ છે.

⁹ મોઆબનો પ્રદેશ મારા હાથપગ ધોવાના પાત્ર સમાન બનશે. માલિકીની નિશાની તરીકે હું અદોમ પર મારું પગરખું નાખીશ. પલિસ્તી પ્રદેશ પર હું જયઘોષ કરીશ.” સહાય માટે પ્રાર્થના

¹⁰ હે ઈશ્વર, મને કિલ્લેબંધ નગરમાં કોણ લઈ જશે? અદોમ સુધી મને કોણ પહોંચાડશે?

¹¹ હે ઈશ્વર, શું તમે સાચે જ અમારો ત્યાગ કર્યો છે? શું તમે અમારાં સૈન્યો સાથે કૂચ કરવાના નથી?

¹² શત્રુઓ વિરુદ્ધ અમને સહાય કરો. કારણ, માનવી સહાય વ્યર્થ છે.

¹³ ઈશ્વર અમારા પક્ષે હોવાથી અમે વીરતાથી લડીશું. તે જ અમારા વૈરીઓને છૂંદી નાખશે.