ગીતશાસ્ત્ર 105 - પવિત્ર બાઇબલ C.L.

ઇઝરાયલનો અજાયબ ઇતિહાસ પ્રભુની સ્તુતિ

¹ યાહવેનો આભાર માનો, તેમના નામને ઘોષિત કરો; સર્વ દેશોના લોકોમાં તેમનાં કાર્યો પ્રગટ કરો.

² પ્રભુની સમક્ષ ગીતો ગાઓ, અને વાજિંત્રો વગાડો. તેમનાં સર્વ અજાયબ કાર્યોનું વર્ણન કરો.

³ તેમના પવિત્ર નામ માટે ગર્વ કરો, પ્રભુના આતુર ઉપાસકોનાં હૃદય આનંદિત બનો.

⁴ પ્રભુને તથા તેના સામર્થ્યને શોધો; સર્વદા તેમના મુખને શોધો.

^5-6 હે પ્રભુના સેવક અબ્રાહામના વંશજો, હે પ્રભુના પસંદ કરેલ યાકોબનાં સંતાનો, પ્રભુએ કરેલાં અજાયબ કાર્યોનું, ચમત્કારોનું તથા તેમના મુખના ન્યાયચુકાદાઓનું સ્મરણ કરો.

આદિપિતૃઓ સાથે કરાર

⁷ એક માત્ર પ્રભુ જ આપણા ઈશ્વર છે, તેમનાં ન્યાયકૃત્યો આખા જગતમાં સુપ્રસિદ્ધ છે.

⁸ તે સદા પોતાનો કરાર પાળે છે, અને પોતે આપેલું વચન હજારો પેઢી સુધી યાદ રાખે છે.

⁹ એ કરાર તેમણે અબ્રાહામ સાથે કર્યો હતો, અને તે વિષે ઇસ્હાક સાથે શપથ લીધા હતા.

¹⁰ અને તેને તેમણે આપણા પૂર્વજ યાકોબને માટે ધારાધોરણ તરીકે ઠરાવ્યો; જેથી ઇઝરાયલના લોક માટે તે સાર્વકાલિક કરાર હતો.

¹¹ તેમણે યાકોબને કહ્યું હતું, “હું તને આ કનાન દેશ આપીશ; તે તારો નિયત કરેલ વારસાનો હિસ્સો બનશે.”

કનાન દેશમાં રક્ષણ

¹² ઈશ્વરના લોક ત્યારે સંખ્યામાં અલ્પ હતા. ખરેખર છેક થોડા, અને કનાન દેશમાં પ્રવાસી હતા;

¹³ તેઓ એક દેશમાંથી બીજા દેશમાં તથા એક રાજ્યમાંથી બીજા રાજ્યમાં ભટક્તા હતા.

¹⁴ ત્યારે ઈશ્વરે કોઈને તેમના પર જુલમ કરવા દીધો નહિ, અને તેમનું રક્ષણ કરવા રાજાઓને ચેતવણી આપી,

¹⁵ “મારા અભિષિક્ત લોકને રંજાડશો નહિ, તથા મારા સંદેશવાહકોને કંઈ ઉપદ્રવ કરશો નહિ.”

યોસેફ ઇજિપ્ત દેશમાં

¹⁶ ઈશ્વરે કનાન દેશ પર દુકાળ મોકલ્યો; તેથી બધો પાક નિષ્ફળ ગયો.

¹⁷ પરંતુ પોતાના લોકને બચાવવા માટે તેમણે ગુલામ તરીકે વેચાઈ ગયેલા યોસેફને તેમની પહેલાં ઇજિપ્તમાં મોકલ્યો.

¹⁸ ત્યાં જેલમાં તેના પગ બેડીઓમાં જકડાયેલા હતા, અને તેની ગરદન પર લોહપટ્ટી પહેરાવેલી હતી;

¹⁹ યોસેફે ભાખેલું ભવિષ્યકથન પૂર્ણ થયું અને પ્રભુના સંદેશ પ્રમાણે તે સાચો ઠર્યો, ત્યાં સુધી તેની ક્સોટી થઈ.

²⁰ તે પછી ઇજિપ્તના રાજાએ આજ્ઞા કરીને તેને છોડાવ્યો, અને ઘણી પ્રજાઓના એ શાસકે તેને મુક્ત કર્યો.

²¹ તેણે યોસેફને પોતાના રાજકારભારમાં અધિકારી બનાવ્યો, અને તેની સમસ્ત જમીનજાગીર પર વહીવટદાર તરીકે નિયુક્ત કર્યો;

²² જેથી યોસેફ જાતે જ રાજાના અધિકારીઓને નિયંત્રણમાં રાખે અને તેના મંત્રીઓને સલાહ આપે.

ઇઝરાયલીઓ ઇજિપ્તમાં

²³ પછી તેનો પિતા યાકોબ પરિવાર સાથે ઇજિપ્ત આવ્યો અને હામના પ્રદેશમાં ઇઝરાયલના કુટુંબે નિવાસ કર્યો.

²⁴ પ્રભુએ પોતાના લોકને પુષ્કળ સંતાનો બક્ષ્યાં અને તેમના શત્રુઓ કરતાં તેમને બળવાન બનાવ્યા.

²⁵ ત્યારે પ્રભુએ ઇજિપ્તના લોકોનાં હૃદય ફેરવી નાખ્યાં, જેથી તેઓ પ્રભુના લોકોનો તિરસ્કાર કરે, અને તેમના સેવકો એટલે ઇઝરાયલીઓ સાથે કપટથી વર્તે.

મોશે, આરોન અને ઇજિપ્તમાંના અનર્થો

²⁶ પછી ઈશ્વરે પોતાના સેવક મોશેને તથા પોતાના પસંદ કરેલ આરોનને ઇજિપ્ત મોકલ્યા.

²⁷ તેમણે ઇજિપ્તના લોકો મધ્યે ચિહ્નો દેખાડયાં, અને હામના દેશ ઇજિપ્તમાં ઘણા ચમત્કારો કર્યા.

²⁸ ઈશ્વરે અંધકાર મોકલીને બધે અંધારું કર્યું. તેમણે તેમના શબ્દોનો પડકાર કર્યો નહિ.

²⁹ તેમણે તેમની નદીઓને રક્તમાં બદલી નાખી અને તેમાંની સર્વ માછલીઓ મારી નાખી.

³⁰ તેમના દેશમાં પુષ્કળ દેડકાં પેદા થયાં. તેઓ છેક રાજમહેલના ઓરડાઓ સુધી ફરી વળ્યાં.

³¹ પ્રભુએ આજ્ઞા કરી એટલે માખો તથા જુઓ તેમના આખા દેશ ઉપર ઊભરાયાં.

³² તેમણે તેમના દેશ પર વરસાદને બદલે કરા મોકલ્યા અને તેમની ધરતી પર અગ્નિજ્વાળાઓ વરસાવી.

³³ ઈશ્વરે તેમના દ્રાક્ષવેલાઓ અને અંજીરવૃક્ષો નષ્ટ કર્યાં અને આખા દેશનાં વૃક્ષો તોડી પાડયાં.

³⁴ તેમણે આજ્ઞા કરી એટલે તીડો આવ્યાં. અસંખ્ય અને અગણિત કાતરા ઊતરી આવ્યા.

³⁵ તેઓ દેશની સમસ્ત વનસ્પતિને ખાઈ ગયાં અને ભૂમિના સર્વ પાકનો ભક્ષ કરી ગયાં.

³⁶ ઈશ્વરે તેમના દેશમાં સર્વ પ્રથમજનિતોને માર્યા; એટલે, તેમના પૌરુષત્વના પ્રથમ ફળરૂપ સંતાનોનો સંહાર કર્યો.

ઇજિપ્તમાંથી પ્રસ્થાન તથા રણપ્રદેશમાં પ્રવાસ

³⁷ ઈશ્વર ઇઝરાયલીઓને સોનાચાંદીના ઘરેણાં સહિત કાઢી લાવ્યા, તેમનાં કુળોમાં એના ભારથી કોઈ લથડી ગયું નહિ.

³⁸ તેમના પ્રસ્થાનથી ઇજિપ્તવાસીઓ આનંદિત થયા, કારણ, ઇઝરાયલીઓને લીધે તેઓ ભારે ત્રાસ પામ્યા હતા.

³⁹ પ્રભુએ તેમના લોકને છાયા આપવા વાદળ પ્રસાર્યું અને રાત્રે પ્રકાશ માટે અગ્નિ મોકલ્યો.

⁴⁰ ઇઝરાયલીઓએ ખોરાક માંગ્યો, એટલે ઈશ્વરે લાવરીઓ મોકલી; પ્રભુએ આકાશના આહારથી તેમને તૃપ્ત કર્યા.

⁴¹ ઈશ્વરે ખડકને તોડયો એટલે પાણી ખળખળ કરતું વહ્યું. તે રણપ્રદેશમાં નદીની જેમ વહેવા લાગ્યું.

⁴² તેમણે પોતાના સેવક અબ્રાહામને તથા તેને આપેલ પવિત્ર પ્રતિજ્ઞાને સંભાર્યાં હતાં.

વચનના પ્રદેશમાં આગમન

⁴³ એમ ઈશ્વર પોતાના પસંદ કરેલા લોકને પાછા દોરી લાવ્યા. ત્યારે તેમણે આનંદનાં ગીતો ગાઈને જયજયકાર કર્યો.

⁴⁴ ઈશ્વરે તેમને અન્ય પ્રજાઓના પ્રદેશો સોંપ્યા અને તેમણે બીજાઓએ કરેલ શ્રમનાં ફળ પર કબજો લીધો.

⁴⁵ જેથી તેઓ ઈશ્વરના આદેશોનું પાલન કરે અને તેમનો નિયમ પાળે; યાહની સ્તુતિ કરો - હાલ્લેલુયાહ!