ગીતશાસ્ત્ર 104 - પવિત્ર બાઇબલ C.L.

વિશ્વના સર્જનહાર પ્રભુની સ્તુતિ

¹ હે મારા જીવ, પ્રભુનું સ્તવન કર. હે પ્રભુ, મારા ઈશ્વર, તમે કેટલા મહાન છો! તમે વૈભવ અને પ્રતાપથી વિભૂષિત છો.

² તમે વસ્ત્રની જેમ પ્રકાશ પરિધાન કર્યો છે; તમે તંબૂની જેમ આકાશને વિસ્તાર્યું છે.

³ તમે ઉપરનાં પાણી પર તમારો મહેલ બાંધ્યો છે, તમે મેઘોને તમારા રથ તરીકે વાપરો છો; તમે પવનની પાંખો પર વારી કરો છો.

⁴ તમે પવનોને તમારા સંદેશકો બનાવો છો, અને અગ્નિજ્વાળાઓને તમારા સેવકો તરીકે ઉપયોગ કરો છો.

પૃથ્વીની વ્યવસ્થા

⁵ તમે પૃથ્વીને તેના પાયાઓ પર સ્થાપી છે; જેથી તે કદીયે વિચલિત થાય નહિ.

⁶ મહાસાગર પૃથ્વી પર જામાની જેમ પથરાયેલો હતો, અને પાણીથી પર્વતનાં શિખરો પણ ઢંક્યેલાં હતાં.

⁷ પણ તમે પાણીને ધમકાવ્યાં, એટલે તે નાસી ગયાં; તમારી ગર્જનાથી તે પલાયન થઈ ગયાં.

⁸ ઊપસી આવેલા પર્વતો પરથી પાણી વહ્યાં અને ખીણોમાં થઈને તમારા નિર્ધારિત કરેલ સ્થળે ગયાં.

⁹ તમે પાણી માટે તે ઓળંગી ન શકે એવી હદ ઠરાવી છે; જેથી પૃથ્વીને ફરીથી ડૂબાડવા તે પાછાં આવે નહિ.

પાણીની વ્યવસ્થા

¹⁰ તમે ખીણોમાં ઝરણાં વહાવો છો,અને તેઓ પર્વતો વચ્ચે થઈને વહે છે.

¹¹ તેઓ જંગલી પશુઓને પાણી પૂરું પાડે છે અને તેમાં જંગલી ગધેડાં પણ પોતાની તરસ છિપાવે છે.

¹² કિનારાનાં વૃક્ષો પર પક્ષીઓ માળા બાંધે છે, અને તેઓ ડાળીઓમાં કલરવ કરે છે.

¹³ તમે તમારા આકાશમાંના ઓરડાઓમાંથી પહાડો પર પાણી વરસાવો છો અને તમારી વર્ષાથી ધરતી સમૃદ્ધિ પામે છે.

આહારની વ્યવસ્થા

¹⁴ તમે પશુઓને માટે ઘાસ, અને મનુષ્યો માટે તેમણે રોપેલા છોડ ઉગાડો છો; જેથી તેઓ ધરતીમાંથી આહાર મેળવી શકે.

¹⁵ વળી, તમે માણસોના દયને આનંદિત કરનાર દ્રાક્ષાસવ, તેમના મુખને તેજસ્વી કરનાર ઓલિવ તેલ, અને તેમને શક્તિ આપનાર ખોરાક ઉપજાવો છો.

¹⁶ લબાનોનનાં પ્રચંડ ગંધતરુ પ્રભુએ જાતે રોપેલાં છે; તે તેમનાં પોતાનાં વૃક્ષો છે; તેઓ પુષ્કળ જળથી સંતૃપ્ત થયેલાં છે.

¹⁷ તેમના પર પક્ષીઓ પોતાના માળા બાંધે છે; વળી, ત્યાંના દેવદારનાં વૃક્ષ બગલાંનું નિવાસસ્થાન છે.

¹⁸ જંગલી બકરાં માટે ઊંચા પર્વતો છે, ભેખડોમાં સસલાંનાં આશ્રયસ્થાનો છે.

સમયની વ્યવસ્થા

¹⁹ ચંદ્ર ઋતુઓ દર્શાવે છે, અને સૂર્ય પોતાનો અસ્ત થવાનો સમય જાણે છે.

²⁰ તમે અંધારું કરો છો, એટલે રાત પડે છે; ત્યારે જંગલનાં પશુઓ બહાર નીકળે છે.

²¹ સિંહનાં બચ્ચાં શિકાર મેળવવા ગર્જે છે; તેઓ ઈશ્વર પાસે પોતાનો આહાર માગે છે.

²² સૂર્યોદય થતાં જ તેઓ પાછાં વળે છે, અને પોતાની ગુફાઓમાં સૂઈ રહે છે.

²³ સવારે માણસો પોતાના વ્યવસાયો માટે બહાર આવે છે અને સંયાકાળ સુધી તેઓ પરિશ્રમ કરે છે.

સમુદ્રની વ્યવસ્થા

²⁴ હે પ્રભુ, તમારાં કાર્યો અનેકવિધ છે; તમે સઘળું જ્ઞાનથી રચ્યું છે; તમે રચેલાં જીવજંતુથી પૃથ્વી ભરપૂર છે.

²⁵ સમુદ્ર કેટલો પ્રચંડ અને વિશાળ છે! તેમાં અસંખ્ય જળચરો અને નાનાંમોટા જીવો વસે છે.

²⁶ તેમાં વહાણો આવજા કરે છે અને તેમાં લિવયાથાન નામનો જળરાક્ષસ રમે છે.

જીવનવ્યવસ્થા

²⁷ યથા સમયે તમે તેમને આહાર આપો. તે માટે સર્વ જીવો તમારા તરફ મીટ માંડે છે.

²⁸ તમે ખોરાક આપો છો ત્યારે તેઓ એકત્ર કરે છે; તમે મુઠ્ઠી ખોલો ત્યારે તેઓ તૃપ્ત થાય છે.

²⁹ તમે તમારું મુખ સંતાડો છો ત્યારે તેઓ ભયભીત બને છે; તમે તમારો ‘શ્વાસ પાછો લઈ લો’ ત્યારે તેઓ મરણ પામે છે, અને પાછાં માટીમાં ભળી જાય છે.

³⁰ તમે તમારો શ્વાસ મોકલો ત્યારે તેઓ ઉત્પન્‍ન થાય છે અને એમ તમે પૃથ્વીની સપાટીને નવું જીવન બક્ષો છો.

પ્રભુની સ્તુતિ

³¹ પ્રભુનું ગૌરવ સદાસર્વકાળ ટકો! પ્રભુ પોતાના સર્જનથી પ્રસન્‍ન રહો!

³² તે પૃથ્વી પર કરડી નજર કરે ત્યારે તે કાંપી ઊઠે છે. તે પર્વતોને અડકે ત્યારે તેમનામાંથી ધૂમાડો નીકળે છે.

³³ હું જિંદગીભર પ્રભુનાં ગુણગાન ગાઈશ. હું હયાતીમાં છું ત્યા સુધી મારા ઈશ્વરની સ્તુતિ કર્યા કરીશ.

³⁴ મારું ચિંતન પ્રભુને પ્રસન્‍ન કરો; કારણ, હું પ્રભુમાં આનંદ કરું છું.

³⁵ પૃથ્વી પરથી પાપીઓનો નાશ થાઓ અને દુષ્ટોનો અંત આવો. હે મારા જીવ, પ્રભુનું સ્તવન કર; યાહની સ્તુતિ કરો - હાલ્લેલુયાહ!