યહોશુઆ 21 - પવિત્ર બાઇબલ C.L.

લેવીવંશજોને અપાયેલાં નગરો

¹ લેવી વંશના કુટુંબોના આગેવાનો યજ્ઞકાર એલાઝાર, નૂનનો પુત્ર યહોશુઆ અને ઇઝરાયલી કુળોનાં કુટુંબોના આગેવાનો પાસે ગયા.

² કનાન દેશના શીલોમાં તેમણે તેમને કહ્યું, “પ્રભુએ મોશે દ્વારા એવી આજ્ઞા ફરમાવી હતી કે અમારા વસવાટ માટે અમને નગરો તેમ જ અમારાં ઢોર માટે એ નગરોની આસપાસનાં ગોચર આપવાં.”

³ તેથી પ્રભુની આજ્ઞા પ્રમાણે ઇઝરાયલી લોકોએ પોતાના કુળપ્રદેશોમાંથી કેટલાંક નગરો તથા તેમનાં ગોચર આપ્યાં.

⁴ નગરોની ફાળવણીમાં પ્રથમ પાસો લેવીવંશમાં કહાથના ગોત્રનાં કુટુંબો માટે નીકળ્યો. આરોન યજ્ઞકારના વંશના કુટુંબોને યહૂદા, શિમયોન અને બિન્યામીનના કુળપ્રદેશોમાંથી તેર નગરો ફાળવવામાં આવ્યાં.

⁵ કહાથના બાકીના ગોત્ર માટે એફ્રાઈમ, દાન અને પશ્ર્વિમ-મનાશ્શાના કુળપ્રદેશોમાંથી દસ નગરો ફાળવવામાં આવ્યાં.

⁶ ગેર્શોમના ગોત્રને ઇસ્સાખાર, આશેર, નાફતાલી અને પૂર્વ મનાશ્શાના કુળપ્રદેશોમાંથી તેર નગરો ફાળવવામાં આવ્યાં.

⁷ મરારી ગોત્રનાં કુટુંબોને રૂબેન, ગાદ અને ઝબુલૂનના કુળપ્રદેશોમાંથી બાર નગરો ફાળવવામાં આવ્યાં.

⁸ ઇઝરાયલી લોકોએ પાસા નાખીને પ્રભુએ મોશે દ્વારા આપેલી આજ્ઞા અનુસાર એ નગરો અને તેમનાં ગોચર ફાળવ્યાં.

⁹ યહૂદા અને શિમયોનના કુળપ્રદેશોમાંથી આપવામાં આવેલાં નગરોનાં નામ અહીં આપ્યાં છે.

¹⁰ એ નગરો લેવીવંશમાંના કહાથના ગોત્રમાં આરોનના વંશજોને આપવામાં આવ્યાં; કારણ, નગરોની ફાળવણીમાં પ્રથમ પાસો તેમનો નીકળ્યો હતો.

¹¹ તેમને યહૂદિયાના પહાડીપ્રદેશમાં આવેલ કિર્યાથ-આર્બા (આર્બા તો અનાકનો પિતા હતો), જે હાલ હેબ્રોન કહેવાય છે તે તેની આસપાસનાં ગૌચર સહિત આપવામાં આવ્યું.

¹² જો કે એ નગરમાં ખેતરો અને તેનાં ગામો તો અગાઉ યફૂન્‍નેહના પુત્ર કાલેબને તેના વસવાટ માટે આપી દેવાયાં હતાં.

¹³ હેબ્રોન, જે ખૂની માટેનું એક આશ્રયનગર હતું તેનાં ઉપરાંત આરોન યજ્ઞકારના વંશજોને બીજાં આ નગરો ફાળવવામાં આવ્યાં: લિબ્ના,

¹⁴ યાત્તિર, એશ્તેમોઆ,

¹⁵ હોલોન, દબીર,

¹⁶ આયિન, યૂટ્ટા અને બેથ-શેમેશ. યહૂદિયા અને શિમયોનના કુળપ્રદેશોમાંથી એ નવ નગરો તેમનાં ગોચર સહિત ફાળવવામાં આવ્યાં.

¹⁷ બિન્યામીનના કુળપ્રદેશમાંથી તેમને નગરોનાં ગોચર સહિત ચાર નગરો આપવામાં આવ્યાં: ગિબ્યોન, ગેબા,

¹⁸ અનાથોથ અને આલ્મોન.

¹⁹ આરોનવંશી યજ્ઞકારોને બધાં મળીને તેર નગરો તેમનાં ગોચર સહિત આપવામાં આવ્યાં.

²⁰ લેવીવંશના કહાથ ગોત્રના અન્ય કુટુંબોને કેટલાંક નગરો એફ્રાઈમના કુળપ્રદેશમાંથી આપવામાં આવ્યાં.

²¹ તેમને ચાર નગરો આપવામાં આવ્યાં: એફ્રાઈમના પહાડીપ્રદેશમાં આવેલું શખેમ (આશ્રય નગરોમાંનું એક) તેના ગોચર સહિત, ગેમેર,

²² કિબ્સાઈમ, અને બેથ-હોરોન તેમનાં ગૌચર સહિત.

²³ દાનના કુળપ્રદેશમાંથી તેમને ચાર નગરો આપવામાં આવ્યાં: એલ્તકે, ગિબ્નથોન,

²⁴ આયાલોન, અને ગાથ-રિમ્મોન તેમનાં ગૌચર સહિત.

²⁵ પશ્ર્વિમ મનાશ્શાના કુળપ્રદેશમાંથી તેમને બે નગરો આપવામાં આવ્યાં: તાઅનાખ અને ગાથ-રિમ્મોન તેમનાં ગોચર સહિત.

²⁶ કહાથના ગોત્રનાં કુટુંબોને બધાં મળીને દશ નગરો તેમનાં ગૌચર સહિત મળ્યાં.

²⁷ લેવીવંશના ગેર્શોન ગોત્રને પૂર્વ મનાશ્શામાંથી બે નગરો મળ્યાં: બાશાનમાંનું ગોલાન (આશ્રય નગરોમાંનું એક) અને બએશ્તરા તેમનાં ગોચર સહિત.

²⁸ ઇસ્સાખારના કુળપ્રદેશમાંથી તેમને ચાર નગરો મળ્યાં: કિશોન, દાબરાથ,

²⁹ યાર્મૂથ અને એન-ગાન્‍નીમ તેમનાં ગોચર સહિત.

³⁰ આશેરના કુળપ્રદેશમાંથી તેમને ચાર નગરો મળ્યાં: મિશાલ, આબ્દોન,

³¹ હેલ્કાથ અને રહોબ તેમનાં ગોચર સહિત.

³² નાફતાલીના કુળપ્રદેશમાંથી તેમને ત્રણ નગરો મળ્યાં: ગાલીલમાં આવેલું કેદેશ (આશ્રય નગરોમાંનું એક) તેના ગોચર સહિત, હામ્મોથ-દોર, અને ર્ક્તાન તેમનાં ગોચર સહિત.

³³ ગેર્શોનના ગોત્રનાં વિવિધ કુટુંબોને બધાં મળીને તેર નગરો તેમનાં ગોચર સહિત મળ્યાં.

³⁴ લેવીના વંશના બાકીનાને એટલે મરારી ગોત્રને ઝબુલૂનના કુળપ્રદેશમાંથી ચાર નગરો મળ્યાં: યોકનઆમ, ર્ક્તા,

³⁵ દિમ્ના અને નાહતા તેમનાં ગોચર સહિત.

³⁶ તેમને રૂબેનના કુળપ્રદેશમાંથી ચાર નગરો મળ્યા: બેસેર, યાહાઝ,

³⁷ કદેમોથ અને મેફાઆથ તેમનાં ગોચર સહિત.

³⁸ ગાદના કુળપ્રદેશમાંથી તેમને ચાર નગરો મળ્યાં: ગિલ્યાદમાંનું રામોથ (આશ્રયનગરોમાંનું એક) તેનાં ગોચર સહિત, મારનાઈમ,

³⁹ હેશ્બોન અને યામેર તેમનાં ગોચર સહિત.

⁴⁰ આમ, મરારી ગોત્રને એકંદરે બાર નગરો ફાળવવામાં આવ્યાં.

⁴¹ ઇઝરાયલી લોકોએ સંપાદન કરેલા પ્રદેશમાંથી લેવીઓને એકંદરે અડતાલીસ નગરો તેમનાં ગોચર સહિત આપવામાં આવ્યાં.

⁴² પ્રત્યેક નગરની આસપાસ ગોચર, એમ બધાં નગરો ગોચર સહિતનાં હતાં.

ફાળવણીની સમાપ્તિ

⁴³ આમ, ઇઝરાયલીઓના પૂર્વજોને પ્રભુએ આપેલા શપથપૂર્વકના વચન પ્રમાણે તેમણે તેમને આખો દેશ આપ્યો. તેમણે તેનો કબજો મેળવ્યો એટલે તેમાં વસવાટ કર્યો.

⁴⁴ તેમના પૂર્વજોને પ્રભુએ આપેલા વચન મુજબ તેમણે તેમને આખા દેશમાં શાંતિ આપી. તેમનો કોઈ શત્રુ તેમની સામે ટક્કર ઝીલી શક્યો નહિ; કારણ, પ્રભુએ ઇઝરાયલીઓને તેમના સર્વ શત્રુઓ પર વિજય પમાડયો.

⁴⁵ પ્રભુએ ઇઝરાયલના વંશજોને જે સર્વ સારાં વચનો આપ્યાં હતાં તેમાંનું એકેય નિરર્થક નીવડયું નહિ; પણ બધાં પરિપૂર્ણ થયાં.