અયૂબ 8 - પવિત્ર બાઇબલ C.L.

બિલ્દાદનું વક્તવ્ય

¹ તે પછી બિલ્દાદ શૂહીએ પ્રત્યુત્તર આપતાં કહ્યું,

² “યોબ, ક્યાં સુધી તું લવારો કર્યા કરીશ? શું તારા મુખના શબ્દો તોફાની ઝંઝાવાતની જેમ ફુંક્યા જ કરશે?

³ શું ઈશ્વર ન્યાયને કદી મચડે છે? શું સર્વસમર્થ ઈનસાફને વિકૃત કરે છે?

⁴ તારાં સંતાનોએ ઈશ્વર વિરૂદ્ધ પાપ કર્યું હશે, અને તેથી જ ઈશ્વરે તેમને તેમના અપરાધોની સજા કરી.

⁵ હવે જો તું ખંતથી ઈશ્વરની શોધ કરશે, અને સર્વસમર્થને દયા માટે યાચના કરશે;

⁶ જો તું વિશુદ્ધ અને પ્રામાણિક હશે તો ઈશ્વર તારી વહારે ધાશે,

⁷ અને તને તારા હક્કનું નિવાસસ્થાન પાછું આપશે. તારી પાછલી સમૃદ્ધિ એવી વધી જશે કે તારી ભૂતકાળની સમૃદ્ધિ એની આગળ જૂજ લાગશે.

⁸ કૃપા કરી પાછલી પેઢીઓને પૂછી જો, અને પૂર્વજોનાં સંશોધન લક્ષમાં લે.

^9-10 એમાંથી જરૂર તને કંઈક શીખવાનું મળશે; એમનાં કથનો એમની કોઠાસૂઝ બતાવશે. કેમ કે આપણે તો આજકાલના છીએ અને કંઈ જાણતા નથી; અને પૃથ્વી પરનું આપણું આયુષ્ય છાયા જેવું છે.

¹¹ શું ક્દવ વિના બરૂ ઊગી શકે? શું એની સળીઓ પાણી વિના પાંગરી શકે?

¹² હજુ તો તે વધી રહ્યું હોય અને કપાયું ન હોય, ત્યાં તો પાણી વિના તે ઘાસનીય પહેલાં સુકાઈ જાય છે.

¹³ ઈશ્વરને વીસરી જનારના એવા જ હાલ થાય છે, અને ઈશ્વર વિરોધીઓની આશા નષ્ટ થાય છે.

¹⁴ કારણ, એવા લોકોની શ્રદ્ધા જાણે પાતળા તંતુ પર, અને એમનો આધાર જાણે કરોળિયાનાં જાળાં પર હોય છે.

¹⁵ તેઓ જાળાં પર આધાર રાખે છે પણ તે છૂટી જાય છે, તેઓ તેને વળગી રહે છે પણ તે ટકી શકતું નથી.

¹⁶ તેઓ તો સૂર્યપ્રકાશમાં પાંગરેલા લીલાછમ વેલા જેવા છે: જેની ડાળીઓ આખા બગીચામાં ફરી વળે છે;

¹⁷ તે પોતાનાં મૂળિયાં ખડકની આજુબાજુ વિંટાળે છે, અને પથ્થરોના ઢગલાને પણ જકડી લે છે.

¹⁸ પણ જ્યારે એ વેલો તેની જગામાંથી ઉખેડી નંખાય છે, ત્યારે એ ત્યાં હતો કે નહિ તેની કોઈને ખબર પણ પડશે નહિ.

¹⁹ તેની હયાતીના સમય પૂરતો જ તેનો આનંદ હોય છે. પછી તેની જગાએ બીજા છોડ ઊગી નીકળે છે.

²⁰ પણ ઈશ્વર કદી નિર્દોષ વ્યક્તિનો ત્યાગ કરશે નહિ, કે દુષ્ટોનો હાથ પકડશે નહિ.

²¹ હજીય ઈશ્વર તારું મુખ હાસ્યથી ભરી દેશે, અને તારા હોઠ આનંદના પોકાર કરશે;

²² જ્યારે તારા શત્રુઓ લજ્જાથી ઢંકાશે, અને દુષ્ટોના તંબુઓનો વિનાશ થશે.”