અયૂબ 41 - પવિત્ર બાઇબલ C.L.

લિવયાથાન (અથવા વ્હેલ કે મગરમચ્છ)

¹ શું તું લેવિયાથાનને ગલથી ખેંચી કાઢી શકે? અથવા તેની જીભને દોરીથી બાંધી શકે?

² શું તું તેનું નાક દોરડાથી નાથી શકે? કે તેના જડબાને આંકડાથી વીંધી શકે?

³ શું તે તારાથી છૂટવા તને કરગરશે? અથવા શું તે મીઠી મીઠી વાતોથી તને ખુશ કરશે?

⁴ શું તે તારો કાયમનો ગુલામ થઈ તારી સાથે રહેવા કરાર કરશે?

⁵ શું તું તેને પક્ષીની જેમ રમાડી શકે? અથવા તારી કુમારિકાઓ માટે તેને લગામ પહેરાવશે?

⁶ શું વેપારીઓ તેને માટે સોદાબાજી કરશે? અને માછીમારો વેચાણ કરવા તેના ટુકડા કરશે?

⁷ શું તું તેનાં ભીંગડાને કાંટાળા ભાલાથી અને તેના મસ્તકને ભાલાથી વીંધી શકે?

⁸ એક વાર એને અડકી તો જો; પછી જે યુદ્ધ મચે તેને યાદ કરીને તું ક્યારેય ફરી એવું નહિ કરે.

⁹ એને કબજે કરવાની આશા વ્યર્થ છે. એને જોઈને જ કોઈ ઢળી પડતો નથી?

¹⁰ કોઈ તેને છંછેડે ત્યારે તે વિકરાળ સ્વરૂપ ધારણ કરે છે, કોઈની મગદૂર છે કે તેની સામે ઊભો રહે?

¹¹ તેના પર હુમલો કરીને કોણ સલામત રહી શકે? આખા આભ નીચે એવું કોઈ છે?

¹² તેનાં અંગઉપાંગો, તેના અજાયબ બળની વાત, અને તેની સુડોળ ક્યા વિષે કહેતાં હું ખચકાઈશ નહિ.

¹³ તેનું ઉપલું પડ કોણ ઉતરડી શકે? અને તેના બેવડા બખ્તરને કોણ વીંધી શકે?

¹⁴ તેના જડબાનાં દ્વાર કોણ ઉઘાડી શકે? તેના મુખમાં ચારે બાજુ ભયાનક દાંત છે.

¹⁵ તેની પીઠ તો ઢાલ જેવાં ભીંગડાંની બનેલી છે, અને તેનાં ભીંગડાં એકબીજા સાથે સજ્જડ ચોંટેલાં છે.

¹⁶ તેઓ એકબીજા સાથે એવી ઘનિષ્ઠતાથી જોડાયેલાં છે કે તેમની વચ્ચે હવા જાય તેટલો ય અવકાશ નથી.

¹⁷ તેઓ એકબીજા સાથે એવી સખત રીતે ભીડાયેલાં છે, કે તેઓ એકબીજાને જકડી રાખે છે અને છૂટાં પાડી શકાય નહિ.

¹⁸ તેનાં નસકોરાંની છીંકથી વીજળી ચમકે છે, અને તેની આંખો પ્રભાતના સૂર્ય જેવી તગતગે છે.

¹⁹ તેના મુખમાંથી અગ્નિજ્વાળા ભભૂકે છે, અને અગ્નિના તણખાનો ફૂવારો વછૂટે છે.

²⁰ ઉકળતા પાત્રમાંથી નીકળતી વરાળ અને બળતા લાકડાંમાંથી નીકળતા ધૂમાડાની જેમ તેનો ઉષ્ણ શ્વાસ ફૂંક્ય છે.

²¹ તેના શ્વાસથી કોયલા સળગી ઊઠે છે, અને તેના મુખમાંથી ભડકા નીકળે છે.

²² તેનું બળ તેની ગરદનમાં છે, અને તેની આગળ આતંક વ્યાપે છે.

²³ તેના શરીરની ઘડીઓ એકબીજાને ચોંટેલી છે, અને તેનાં હાડકાં પર ખસેડી ન શકાય તેમ જડેલી છે.

²⁴ તેનું હૃદય કાઢમીંઢ પથ્થર જેવું કઠણ હોય છે; અરે, ઘંટીના નીચલા પડ જેવું દઢ હોય છે.

²⁵ તેના આતંક સામે બળવાનો ભયભીત થાય છે, અને બેબાકળા થઈને ભોંય ભેગા થાય છે.

²⁶ કોઈ તેને તલવારનો ઝટકો મારે તો તેને કંઈ અસર થતી નથી; તેમજ ભાલો, બાણ કે બરછી - કોઈ શસ્ત્ર તેને ઈજા કરી શકશે નહિ.

²⁷ લોખંડ તેને માટે પરાળ જેવું તકલાદી, અને તાંબુ તેને માટે સડેલા લાકડા જેવું નરમ છે.

²⁸ કોઈ બાણ તેને નસાડી શકતું નથી, ગોફણથી ફેંકેલા પથ્થરો તેને માટે ભૂંસા જેવા બની જાય છે.

²⁹ ડાંગોને પણ તે લાકડાના છોલ જેવી નબળી ગણે છે, અને ભાલાઓના ખણખણાટને તે હસી કાઢે છે.

³⁰ તેના પેટ પરનાં ભીંગડાં અણીદાર ઠીકરાં જેવાં છે; ક્દવની ઉપર તે અનાજ મસળવાના યંત્રની જેમ વિચરે છે.

³¹ તે ઊંડાં પાણીને હાલ્લાંની જેમ ઉકાળે છે, અને દરિયાને ડહોળે છે.

³² તે પોતાની પાછળ પ્રકાશિત શેરડા પાડે છે, અને પાતાળનાં પાણી સફેદ ફીણવાળાં કરી નાખે છે.

³³ આ પૃથ્વી પર તેના જેવું કોઈ અન્ય પ્રાણી નથી, તેના સરખું નિર્ભય પ્રાણી બીજું એકેય નથી.

³⁴ ગર્વિષ્ઠમાં ગર્વિષ્ઠ પ્રાણીઓને પણ તે હલકાં ગણે છે, તે સઘળાં જંગલી પ્રાણીઓનો રાજા છે.”