અયૂબ 40 - પવિત્ર બાઇબલ C.L.

બીજો સંવાદ: યોબને ઈશ્વરનો પડકાર

¹ પ્રભુએ યોબને પ્રત્યુત્તર આપતાં કહ્યું:

² “સર્વસમર્થ પર દોષ મૂકનાર હવે વિવાદ કરવા માગે છે? ઈશ્વર સાથે વિવાદમાં ઊતરનાર શું હવે ઉત્તર આપશે?”

³ ત્યારે યોબે પ્રભુને પ્રત્યુત્તર આપતાં કહ્યું કે,

⁴ “પ્રભુ, મારી શી વિસાત કે હું તમને ઉત્તર આપું? મારા મુખ પર હાથ મૂકીને હું મૌન ધારણ કરું છું.

⁵ એક વાર બોલ્યો, પણ હવે બોલીશ નહિ; બે વાર બોલ્યો છું, પણ હવે આગળ જરાય બોલીશ નહિ.”

⁶ તે પછી પ્રભુએ યોબને વંટોળમાંથી પ્રત્યુત્તર આપતાં કહ્યું:

⁷ “હવે કમર કાસીને મરદની જેમ ઊભો થા, અને મારા પ્રશ્ર્નોનો ઉત્તર આપ.

⁸ મારા ચુકાદાને શું તું નકામો ઠરાવીશ? પોતાને નેક ઠરાવવા શું તું મને દોષિત ઠરાવીશ?

⁹ શું તારી પાસે ઈશ્વરના જેવા બળવાન ભુજ છે? શું તેમના સાદ જેવી ગર્જના તું કરી શકે છે?

¹⁰ જો એમ હોય તો ભવ્યતા અને મહત્તાથી સજ્જ થા, તથા ગૌરવ અને પ્રતાપ ધારણ કર.

¹¹ ઈશ્વરની જેમ તારા કોપનો ઊભરો ઠાલવ, અને દરેક અહંકારી જન તરફ આંખ કાઢીને તેને નમાવી દે.

¹² પ્રત્યેક ગર્વિષ્ઠને તું પાડી નાખ, દુષ્ટો જ્યાં ઊભા હોય ત્યાં જ તેમને કચડી નાખ.

¹³ બધા દુષ્ટોને તું ધૂળમાં દાટી દે, અને મૃત્યુલોક શેઓલમાં તેમનાં મુખ ઢાંકી દે.

¹⁴ ત્યારે હું તારે વિષે કબૂલ કરીશ કે તારા જમણા હાથે તને વિજય અપાવ્યો છે.” બહેમોથ (અથવા હિપોપોટેમસ)

¹⁵ “વિશાળ બહેમોથને નિહાળ, તારી જેમ તેને પણ મેં જ સર્જ્યો છે; તે બળદની માફક ઘાસ ખાય છે.

¹⁶ જો તેની કમરમાં કેવી પ્રચંડ શક્તિ છે, અને તેના પેટના સ્નાયુઓમાં કેવું બળ છે!

¹⁷ તે તેની પૂંછડી ગંધતરુ સમાન ટટાર બનાવે છે, અને તેની જાંઘના સ્નાયુઓ એકબીજા સાથે ગુંથાયેલા હોય છે.

¹⁸ તેનાં હાડકાં તાંબાની નળી જેવાં મજબૂત છે, અને તેની પાંસળીઓ લોખંડના પાટા જેવી સખત છે.

¹⁹ ઈશ્વરની કૃતિઓમાં તે અગ્રિમ છે, માત્ર તેના સર્જક તેના પર તલવાર ચલાવી શકે.

²⁰ જ્યાં સર્વ રાની પશુઓ રાચે છે તેવા પર્વતો પર તેને માટે ખોરાક ઊપજે છે.

²¹ તે કાંટાળા ઝેલવૃક્ષની ઝાડીમાં અને ભેજવાળી જગાઓમાં ઊગેલા બરૂઓમાં પડી રહે છે.

²² ઝેલવૃક્ષની ઝાડીનો છાંયો તેને ઢાંકે છે, અને ઝરણા પાસે ઊગેલા વેલા તેને વીંટળાઈ વળે છે.

²³ નદીનાં તોફાની વમળોથી તે ગભરાતો નથી, અને યર્દન નદીનાં પૂર તેના મોં સુધી પહોંચે તોપણ તે નિશ્ર્વિંત રહે છે.

²⁴ તેની નજર ચુકાવીને તેને કોણ પકડી શકે? અથવા કોણ તેના નાકમાં ગલ પરોવી શકે?