અયૂબ 4 - પવિત્ર બાઇબલ C.L.

પ્રથમ સંવાદ ( 4:1—14:22 ) એલિફાઝનું વક્તવ્ય

¹ ત્યારે એલિફાઝ તેમાનીએ ઉત્તર આપતાં કહ્યું:

² “જો કોઈ તને એક બે શબ્દ કહેવાની હિંમત કરે, તો તારાથી સહન થશે? પણ બોલ્યા વગર તો કોણ રહી શકે?

³ તેં તો ઘણાને શિખામણ આપી છે; તેં નિર્બળ હાથવાળાને સબળ કર્યા છે.

⁴ તારા શબ્દોએ ઠોકર ખાનારાઓને ટેકો આપ્યો છે; લથડતા ધૂંટણોવાળાને તેં સહારો આપ્યો છે.

⁵ પરંતુ હવે તારા પર વિપત્તિ આવી પડી છે ત્યારે તું શિથિલ બની જાય છે. તે તને સ્પર્શે છે એટલે તું ગભરાઈ જાય છે.

⁶ શું તને તારી નિષ્ઠા પર ભરોસો નથી? તારા સદાચાર પર તને કોઈ આશા નથી?

⁷ યાદ કરી જો કે કોઈ નિર્દોષનો કદી વિનાશ થયો છે? અથવા કોઈ સદાચારીનો કદી નાશ થયો છે?

⁸ મેં તો જોયું છે કે જેઓ ભૂંડાઈનાં ખેતર ખેડે છે અને અનિષ્ટનાં બી વાવે છે તેઓ તેવું જ લણે છે.

⁹ ઈશ્વરના કોપરૂપી શ્વાસથી તેમનો વિનાશ થાય છે અને તેમના ક્રોધના ભડકાથી તેઓ ભસ્મીભૂત થાય છે.

¹⁰ સિંહ ગર્જે છે અને વિકરાળ સિંહ ધૂરકે છે; પરંતુ જુવાન સિંહના દાંત તોડી નંખાય છે.

¹¹ શિકારના અભાવે સિંહ પણ નાશ પામે છે; અને સિંહણનાં બચ્ચાં વિખેરાઈ જાય છે.

¹² મારી પાસે એક સંદેશ ગુપ્ત રીતે આવ્યો છે; મારે કાને માત્ર તેના ભણકારા જ પડયા છે.

¹³ માણસો જ્યારે ગાઢ નિદ્રામાં પોઢી જાય છે એવી એક રાતે મને વિમળ બનાવી દેતું એક દુ:સ્વપ્ન આવ્યું.

¹⁴ હું તો ભયથી ધ્રૂજી ઊઠયો, મારાં સર્વ હાડકાંયે ધ્રૂજવા લાગ્યાં.

¹⁵ એક આત્મા મારા મુખ પાસેથી સરક્યો અને ભયથી મારાં રૂંવાડાં ખડાં થઈ ગયાં.

¹⁶ એક આકૃતિ ત્યાં ઊભી હોય એવું મને લાગ્યું. મેં તાકીને જોયું પણ કશું કરી શક્યો નહિ. નીરવ શાંતિમાં મેં એક મૃદુવાણી સાંભળી:

¹⁷ મર્ત્ય માનવ ઈશ્વરની સમક્ષ નેક ઠરી શકે? અથવા કોઈ માણસ તેના સર્જક આગળ વિશુદ્ધ હોઈ શકે?

¹⁸ ઈશ્વર તો પોતાના આકાશી સેવકોમાંય ભરોસો મૂક્તા નથી, અને પોતાના સ્વર્ગદૂતોમાંય તેમને ક્ષતિઓ દેખાય છે;

¹⁹ તો જેનો પાયો ધૂળમાં છે એવી માટીની મઢૂલી જેવા શરીરમાં વસતો માનવી, જે પતંગિયાની પેઠે કચડાઈ જાય છે, તેની શી વિસાત?

²⁰ સવારથી સાંજ સુધીમાં તો તેમનો નાશ થઈ જાય છે; અને તેમનું નામનિશાન રહેતું નથી.

²¹ તેમના તંબૂની મેખો ઉખાડી લેવામાં આવે છે, અને તેઓ જ્ઞાન વિના મૃત્યુ પામે છે.