અયૂબ 39 - પવિત્ર બાઇબલ C.L.

¹ પહાડોની જંગલી બકરીઓના વિયાવાનો સમય શું તું જાણે છે? અને હરણીઓને વિયાતાં જોઈ છે?

² તેમના ગર્ભધારણના મહિનાની સંખ્યા તને ખબર છે? અને તેમના જણવાના સમયની તને માહિતી છે?

³ તેઓ વાંકી વળીને ગર્ભ પર દબાણ લાવે છે અને બચ્ચાંને જમીન પર ધકેલે છે.

⁴ તેમનાં બચ્ચાં ખુલ્લામાં વૃદ્ધિ પામીને મજબૂત બને છે. પછી બચ્ચાં સ્વતંત્ર થઈ જાય છે અને પાછાં ફરતાં નથી.

⁵ કોણે જંગલી ગધેડાંને છૂટાં મૂક્યાં છે? કોણે ઝડપી ગધેડાનાં બંધન છોડી નાખ્યાં છે?

⁶ મેં તેનું રહેઠાણ રણમાં આપ્યું છે, અને તેમને ખારાપાટો પર વસાવ્યાં છે.

⁷ તેને શહેરની ધાંધલધમાલ ગમતી નથી, અને તેને હાંકનારની બૂમો સાંભળવી પડતી નથી.

⁸ ટેકરીઓનાં ગૌચરો પર તે ચરે છે. અને કોઈ ને કોઈ લીલા છોડની શોધમાં ભટકે છે.

⁹ શું જંગલી સાંઢ તારું કામ કરવા રાજી થશે? શું તે તારી કોઢમાં રહેવા તૈયાર થશે?

¹⁰ શું તું તેને અછોડાથી બાંધીને ચાસમાં ચલાવી શકે? અને શું તે તારી પાછળ રાંપ કાઢવા તૈયાર થશે?

¹¹ તેની પ્રચંડ શક્તિ પર શું તું આધાર રાખી શકે? અને તારું ભારે કામ શું તેની પાસે કરાવી શકીશ?

¹² તે તારે ઘેર ગાડું ખેંચી લાવે, અને તારા ખળાનું અનાજ ભરી લાવે એવો ભરોસો રાખીશ?

¹³ શાહમૃગ તેની પાંખો ઝડપથી ફફડાવે છે, પણ તેની પાંખોને વધારે પીંછાં હોતાં નથી.

¹⁴ તે પોતાનાં ઈંડાં જમીન પર મૂકે છે, અને તે ધૂળમાં ગરમીથી સેવાય છે.

¹⁵ કોઈકના પગ નીચે ઈંડાં છુંદાઈ જશે, અથવા કોઈ જંગલી જનાવર તેમને ખૂંદી વળશે એની તેને દરકાર નથી.

¹⁶ તે તેનાં બચ્ચાં પારકાં હોય તેમ નિષ્ઠુરતાથી વર્તે છે. પ્રજનનનો શ્રમ નિષ્ફળ જશે એવી તેને બીક નથી.

¹⁷ કારણ, ઈશ્વરે જ તેને અક્કલ આપી નથી, અને તેને સમજણ ફાળવી નથી.

¹⁸ પણ જ્યારે તે દોડવાનું શરૂ કરે, ત્યારે તે ઘોડેસ્વારને પાછળ પાડી દે છે.

¹⁹ યોબ, શું ઘોડાને તેં બળ આપ્યું છે? કે તેની ડોક પર ભવ્ય કેશવાળી તેં પહેરાવી છે?

²⁰ શું તેં અશ્વને તીડની પેઠે કૂદવાની શક્તિ આપી છે, અને તેનો હણહણાટ કેવો પ્રતાપી અને ભયાનક હોય છે!

²¹ તે આનંદમાં કૂદે છે અને ખીણપ્રદેશમાં તેની ખરીનાં ઊંડાં પગલાં પડે છે, અને તે શસ્ત્રસજ્જ માણસો તરફ ઘસી જાય છે.

²² તે ભયને હસી કાઢે છે અને નિર્ભયતાથી આગળ વધે છે અને તરવાર જોઈને પીછેહઠ કરતો નથી.

²³ તેની પીઠ પર બાણના ભાથાનો ખણખણાટ છે, અને ભાલાઓ તથા બરછીઓ ચમકે છે.

²⁴ તે જુસ્સામાં અને પૂરજોશ છલાંગો ભરી અંતર કાપે છે, રણશિંગડું ફુંક્ય ત્યારે તેને ઝાલી રાખી શક્તો નથી.

²⁵ રણશિંગડું વાગે ત્યારે તે જુસ્સાથી હણહણે છે, સેનાનાયકોના હોંકારા અને પડકારો અને ચાલી રહેલી લડાઈની તેને દૂરથી જ ગંધ આવે છે.

²⁶ શું બાજપક્ષી તારા ડહાપણથી ઊંચે ઊડે છે, અને પોતાની પાંખો દક્ષિણ દિશા તરફ ફેલાવે છે?

²⁷ શું તારી આજ્ઞાથી ગરૂડ ઊંચે ચડે છે, અને ઊંચાણોમાં પોતાનો માળો બાંધે છે?

²⁸ તે ખડકો પર વસે છે અને વિહરે છે, અને ઊંચી ભેખડને પોતાનો ગઢ બનાવે છે.

²⁹ ત્યાંથી તે પોતાના શિકારની તપાસ કરે છે; દૂરથી તેની આંખો તેને જોઈ લે છે.

³⁰ જ્યાં મૃતદેહો હોય ત્યાં ગીધડાં એકઠાં થાય છે, અને તેમનાં બચ્ચાં લોહી ચૂસે છે.”