અયૂબ 37 - પવિત્ર બાઇબલ C.L.

¹ “એને લીધે મારું હૃદય કંપે છે, જાણે કે, તે તેના સ્થાનમાંથી ઊછળી પડશે!

² તેમનો ગરજતો અવાજ સાંભળો; તેમના મુખમાંથી નીકળતો ગડગડાટ સાંભળો.

³ તે આખા આકાશમાં ચોમેર વીજળી ચમકાવે છે; એ વીજળી ધરતીના એક છેડાથી બીજા છેડા સુધી ફરી વળે છે.

⁴ વીજળીના ચમકારા પછી તેનો કડાકો સંભળાય છે, તે પછી મોટો ગડગડાટ ચાલુ રહે છે. તેનો કડાકો સાંભળતાં જ માણસો ધ્રૂજી જાય છે.

⁵ ઈશ્વરનો અવાજ અદ્‍ભુત રીતે ગર્જે છે, અને આપણે સમજી ન શકીએ એવાં મહાન કાર્યો કરે છે.

⁶ તે હિમને આજ્ઞા કરે છે, ‘ભૂમિ પર પડ’ અને મુશળધાર વરસાદને કહે છે, ‘પૃથ્વી પર ધોધમાર તૂટી પડ.’

⁷ સર્વ મનુષ્યોને ઈશ્વરની કાર્યશક્તિની પ્રતીતિ થાય તે માટે તે પ્રત્યેક માનવી પ્રવૃત્તિ સ્થગિત કરી દે છે.

⁸ ત્યારે જંગલી પશુઓ તેમની બોડમાં ભરાઈ જાય છે, અને તેમની ગુફાઓમાં આશરો લે છે.

⁹ દક્ષિણ દિશામાંથી તોફાની ઝંઝાવાત આવે છે, અને ઉત્તરના પવનો ક્તિલ ઠંડી લાવે છે.

¹⁰ ઈશ્વરના શ્વાસથી હિમ વરસે છે, અને મહાસાગરોનાં પાણી ઠરી જાય છે.

¹¹ તે ઘાડાં વાદળોને ભેજથી તર કરી દે છે અને વાદળાંમાંથી વીજળી પ્રસારે છે,

¹² એ વીજળી ઈશ્વરના માર્ગદર્શન પ્રમાણે ચોમેર ચમકે છે; અને ઈશ્વરના આદેશ મુજબ તે પૃથ્વીના પટ પરની માનવવસાહત પર ત્રાટકે છે.

¹³ ઈશ્વર શિક્ષા કરવા અથવા કૃપા દર્શાવવા તેને ધારેલે સ્થાને તાકે છે.

¹⁴ હે યોબ, આ વાત સાંભળ; શાંતિથી ઈશ્વરનાં અજાયબ કાર્યોનો વિચાર કર.

¹⁵ ઈશ્વર કુદરતી તત્ત્વો પર કઈ રીતે તેમનો આદેશ લાદે છે, અને વાદળોમાં વીજ ચમકાવે છે એ શું તું જાણે છે?

¹⁶ ઈશ્વર વાદળોને કઈ રીતે સમતોલનમાં રાખે છે એની તને ખબર છે? જ્ઞાનમાં સંપૂર્ણ ઈશ્વર એવાં અજાયબ કાર્યો કરે છે.

¹⁷ દક્ષિણના પવનને લીધે જ્યારે વાતાવરણ સ્તબ્ધ થઈ જાય, ત્યારે તારાં વસ્ત્રો પણ ગરમ થઈ જાય છે.

¹⁸ ઈશ્વરની જેમ તું પણ ગાળેલી ધાતુના ચમકદાર અરીસાના જેવું મજબૂત આકાશ પ્રસારી શકે ખરો?

¹⁹ ઈશ્વરને શું કહેવું તે તું અમને શીખવ; કારણ, જ્ઞાનના અભાવે કેવી દલીલ કરવી તે અમને સૂઝતું નથી.

²⁰ શું ઈશ્વરને એમ કહી શકાય કે, ‘મારે બોલવું છે?’ એવું ઇચ્છીને કોઈ માણસ પોતાનો નાશ નોતરે?

²¹ પવનથી વાદળો ઢસડાઈ જતાં આકાશ નિરભ્ર બને છે, ત્યારે તેના ઝળહળતા પ્રકાશ તરફ માણસો જોઈ શક્તા નથી.

²² ઉત્તરમાંથી સોનેરી પ્રકાશ પ્રસરે છે. ઈશ્વર ભયાવહ ગૌરવથી આભૂષિત છે.

²³ સર્વસમર્થ તો મહા પરાક્રમી છે; આપણે તેમનો પાર પામી શક્તા નથી. તેમની પાસે અદલ ઈન્સાફ અને નેકી છે અને તે જુલમ કરતા નથી.

²⁴ તેથી મર્ત્ય મનુષ્ય તેમનો આદરયુક્ત ભય રાખે છે, પણ જ્ઞાની હોવાનો દાવો કરનારની ઈશ્વર ઉપેક્ષા કરે છે.”