અયૂબ 36 - પવિત્ર બાઇબલ C.L.

¹ પછી એલીહૂએ તેનો સંવાદ આગળ ચલાવ્યો;

² “થોડી ધીરજ રાખ, અને હું તને સમજાવીશ; કારણ, ઈશ્વરના પક્ષમાં મારે હજી કંઈક કહેવાનું છે.

³ હું દૂરદૂરથી બહુવિધ જ્ઞાન સંપાદન કરીને મારા સર્જક ઈશ્વરને સાચા પુરવાર કરીશ.

⁴ સાચે જ મારા શબ્દોમાં જૂઠ નથી; જ્ઞાનમાં પરિપકવ વ્યક્તિ તારી સામે છે.

⁵ જુઓ, ઈશ્વર કેવા મહાન છે, પણ તે કોઈને તુચ્છકારતા નથી; તેમની સમજશક્તિ પણ ગહન છે!

⁶ તે દુષ્ટોને જીવતા જવા દેતા નથી, પણ જુલમપીડિતોને તેમના હક્ક અપાવે છે.

⁷ તે નેકજનો ઉપરથી પોતાની દષ્ટિ ઉઠાવી લેતા નથી, તે તેમને રાજાઓ સાથે રાજ્યાસન પર બેસાડે છે, અને તેમને હમેશા ઉચ્ચપદે રાખે છે.

⁸ પરંતુ જો લોકો સાંકળોથી બંધાયેલા હોય, અને જુલમના બંધનમાં જકડાયા હોય,

⁹ તો ઈશ્વર તેમને તેમના અપરાધો બતાવે છે, અને અહંકારથી કરેલાં તેમનાં પાપ જણાવે છે.

¹⁰ તે તેમના કાન શિક્ષણ પ્રત્યે ઉઘાડે છે, અને તેમને દુષ્ટતાથી વિમુખ થવાની આજ્ઞા કરે છે.

¹¹ જો તેઓ ઈશ્વરનું માને અને તેમની સેવા કરે, તો તેઓ તેમની જિંદગી સમૃદ્ધિ અને સુખચેનમાં પૂરી કરે છે.

¹² પણ જો તેઓ ઈશ્વરનું ન સાંભળે તો તેઓ નાશને આરે આવી પડશે, અને જ્ઞાનના અભાવે મૃત્યુને ભેટશે.

¹³ અધર્મીઓ મનમાં રોષ ભરી રાખે છે, અને ઈશ્વર તેમને શિક્ષા કરે તો પણ સહાય માટે પોકારતા નથી.

¹⁴ તેઓ જુવાનીમાં જ મરણ પામે છે, અને વેશ્યાઓ પાછળ જિંદગી બરબાદ કરે છે.

¹⁵ ઈશ્વર દુ:ખીઓનો ઉદ્ધાર તેમના દુ:ખ દ્વારા જ કરે છે, અને વિપત્તિ દ્વારા તેમને ચેતવણી આપે છે.

¹⁶ યોબ, ઈશ્વરે તને સંકટમાંથી બહાર કાઢયો હતો, અને સંકડાશ વગરની વિશાળ જગામાં દોરી લાવ્યા હતા, અને તારી ભોજનની મેજને સ્વાદિષ્ટ વાનગીઓથી ભરી દીધું હતું.

¹⁷ પણ તું તો દુષ્ટોને સજા થતી નથી એ વાતને વળગી રહ્યો છે, અને ઈન્સાફ તથા સજા નથી તે વિષે હઠ પકડી રાખે છે.

¹⁸ જોજે, સમૃદ્ધિ તને ફોસલાવીને ભટકાવી ન દે, અને લાંચ તને લલચાવીને ભ્રષ્ટ બનાવી ન દે.

¹⁹ કારણ, જ્યારે સંકટ આવી પડે ત્યારે તારી સમૃદ્ધિ કામમાં આવશે? તેં મેળવેલી ભેટસોગાદો તને ઉગારશે ખરી?

²⁰ જ્યારે પ્રજાઓનો પોતપોતાના સ્થાનમાંથી મૂલોચ્છેદ થઈ જાય, એવી ન્યાયશાસનની ભયાનક રાત્રિની ઝંખના કરશો નહિ.

²¹ સાવધ થા, દુષ્ટતા તરફ પાછો ફરીશ નહિ. કારણ, તું ક્સોટીના દુ:ખને બદલે દુષ્ટતા તરફ ઢળે છે.

²² ઈશ્વરનું સામર્થ્ય કેવું અપાર છે! તેમના જેવો શિક્ષક બીજો કોણ છે?

²³ તેમનું આચરણ કોણ ઠરાવી શકે? અને ‘તમે ખોટું કર્યું’ એમ તેમને કોણ કહી શકે?

²⁴ લોકો પણ જેનાં ગુણગાન ગાય છે તે ઈશ્વરનાં કાર્યોની પ્રશંસા કરવાનું યાદ રાખ.

²⁵ ઈશ્વરના કાર્ય પર સઘળા માણસો મીટ માંડે છે, પણ તેઓ તેને માત્ર દૂરથી નિહાળે છે.

²⁶ સાચે જ ઈશ્વર મહાન છે, પણ આપણે તેમનો પાર પામી શક્તા નથી, અને તેમનાં વર્ષોની સંખ્યા અગમ્ય છે.

²⁷ ઈશ્વર સાગરના જલબિંદુઓને વરાળરૂપે ઉપર ખેંચી લે છે, અને તેમને વાદળાંમાં વરસાદનાં ટીપાં બનાવે છે.

²⁸ તે વાદળાંમાંથી વરસાદ વરસાવે છે, અને ભૂમિ પર ધોધમાર વર્ષા થાય છે.

²⁹ ઈશ્વરના ગગનમંડળમાં વાદળોનું પ્રસારણ અને તેમાંની મેઘગર્જના કેવી રીતે થાય છે તે કોણ સમજી શકે?

³⁰ જુઓ, ઈશ્વર આકાશમાં વીજળી ચમકાવે છે, અને મહાસાગરોનાં તળિયાંને અંધકારથી છાઈ દે છે.

³¹ વરસાદ અને વીજળીથી ઈશ્વર ન્યાયશાસન લાવે છે, અને તેમના દ્વારા મબલક ધાન્ય પણ પૂરું પાડે છે.

³² તેમના હાથમાંથી વીજળી પ્રક્ટે છે અને તેને ધારેલા નિશાન પર પાડે છે.

³³ ઈશ્વર વીજળીના કડાકા દ્વારા તોફાનની આગાહી કરે છે, ઢોરને પણ એની ખબર પડી જાય છે!