અયૂબ 34 - પવિત્ર બાઇબલ C.L.

¹ એલીહૂએ પોતાનું નિવેદન જારી રાખ્યું.

² “હે શાણા લોકો, મારી વાત સાંભળો; હે અનુભવી જનો, મારા કહેવા તરફ કાન દઈને લક્ષ આપો.

³ જેમ જીભનું ટેરવું ખોરાકનો સ્વાદ ચાખે છે, તેમ કાન શબ્દોને પારખે છે.

⁴ ચાલો, આપણે સાચું શું છે તે શોધી કાઢીએ; સારું શું છે તે આપણે નક્કી કરીએ.

⁵ કારણ, યોબ કહે છે, ‘હું નિર્દોષ છું, પણ ઈશ્વરે મારો હક્ક છીનવી લીધો છે;

⁶ હું સાચો છું, છતાં મને જૂઠો ગણવામાં આવે છે; હું અપરાધી નથી, છતાં તેમના બાણથી મરણતોલ ઘવાયો છું.’

⁷ આ યોબ જેવો તો કોઈ માણસ હશે? તે પાણીની જેમ ઈશ્વરનિંદા ઘટઘટાવે છે!

⁸ તે દુરાચારીઓના સંઘમાં જાય છે, અને દુષ્ટોની સાથે ભટકે છે.

⁹ તે કહે છે, ‘ઈશ્વરમાં મગ્ન થવાથી માણસને કોઈ પ્રકારનો લાભ થતો નથી.’

¹⁰ તેથી હે સમજુ માણસો, મારી વાત સાંભળો; ‘ઈશ્વર દુષ્ટતા આચરે કે સર્વસમર્થ ખોટું કરે,’ એવું કથન તો અઘોર ઈશ્વરનિંદા કહેવાય.

¹¹ બલ્કે, ઈશ્વર તો માણસનાં કામ પ્રમાણે તેને ફળ આપે છે, અને તેનાં આચરણ પ્રમાણે તેને બદલો આપે છે.

¹² સાચે જ ઈશ્વર કદી દુષ્ટતા આચરે જ નહિ, અને સર્વસમર્થ ન્યાય ઊંધો વાળે જ નહિ.

¹³ કોણે ઈશ્વરને પૃથ્વી પર અધિકાર સોંપ્યો છે? કોણે સકળ સૃષ્ટિની જવાબદારી તેમને સોંપી છે?

¹⁴ જો ઈશ્વર મનમાં ધારે, અને તેમનો આત્મા અને તેમનો શ્વાસ પોતાની પાસે પાછો ખેંચી લે;

¹⁵ તો સમગ્ર સજીવો એક સાથે નષ્ટ થઈ જાય, અને માનવજાત ધૂળ ભેગી થઈ જાય!

¹⁶ તારામાં જરા ય સમજ હોય, તો મારી વાત સાંભળ; મારા શબ્દો કાને ધર.

¹⁷ સચ્ચાઈને ધિક્કારનાર શું અધિકાર ભોગવી શકે? ભલભલાનો ન્યાય કરનાર ઈશ્વરને તું દોષપાત્ર ઠરાવે છે?

¹⁸ શું કોઈ રાજાને ‘હરામખોર’ અને ઉમરાવોને ‘ગુનેગાર’ કહે છે?

¹⁹ ઈશ્વર તો રાજવંશીઓની શરમ ભરતા નથી, અને ગરીબોને ભોગે ધનવાનોની તરફેણ કરતા નથી. કારણ, એ બધું જ તેમના હાથનું સર્જન છે.

²⁰ ઘણા લોકો મયરાત્રિએ એક ક્ષણમાં મૃત્યુ પામે છે, કેટલાકને આઘાત લાગે છે અને નષ્ટ થાય છે, અરે, બળવાનો પણ કોઈ માણસના માર્યા વિના મરી જાય છે.

²¹ કારણ, ઈશ્વરની દષ્ટિ માણસની ચાલચલગત પર છે, અને તે તેના પ્રત્યેક પગલાની તપાસ રાખે છે.

²² એવો કોઈ અંધકાર કે ઘેરી છાયા નથી જ્યાં દુરાચારીઓ પોતાને છુપાવી શકે.

²³ ઈશ્વરને માણસના ન્યાયચુકાદા માટે કોઈ સમય મુકરર કરવાની જરૂર નથી.

²⁴ તે જુલમગારોને તોડી પાડે, તે માટે તેમને તપાસ કરવી પડતી નથી; તે તેમને સ્થાને બીજાઓને સ્થાપન કરે છે.

²⁵ ઈશ્વર એમનાં કાર્યો જાણે છે, તેથી તે તેમને રાતોરાત ઉથલાવી નાખે છે અને તેઓ કચડાઈ જાય છે.

²⁶ તે તેમને ગુનેગારોની જેમ લોકોના દેખતાં જાહેરમાં ફટકારે છે.

²⁷ કારણ, તેમણે ઈશ્વરને અનુસરવાનું મૂકી દીધું, અને તેમનાથી વિમુખ થઈને તેમના માર્ગોની ઉપેક્ષા કરી.

²⁸ જુલમગારોએ ગરીબો પર એટલો જુલમ કર્યો કે તેમણે ઈશ્વરને પોકાર કર્યો, અને ઈશ્વરે પીડિતોની ફરિયાદ સાંભળી.

²⁹ ઈશ્વર એ વિષે કંઈ ન કરે તો ય એમની ટીકા કોણ કરી શકે? અથવા તે પોતાનું મુખ સંતાડે તો તેમને કોણ જોઈ શકે? કોઈ પ્રજા કે કોઈ વ્યક્તિની એવી મગદૂર નથી.

³⁰ લોકો અધર્મીઓને તેમના પર રાજ કરતા રોકી શક્તા નથી; તેઓ તેમને ફાંદામાં ફસાવનારાથી બચાવી શક્તા નથી.

³¹ જો કોઈ ઈશ્વરને કહે કે, ‘હું બેફામપણે વર્ત્યો હતો પણ હવેથી ગુના કરીશ નહિ;

³² જે હું પોતે સમજી શક્તો નથી તે મને શીખવો, જો મેં દુષ્ટતા આચરી હોય તો હવેથી એમ કરીશ નહિ.’

³³ તો યોબ, માત્ર તારા જ વિરોધને લીધે ઈશ્વર તેને માફ નહિ કરે? હું નહિ, તું પોતે જ નક્કી કર; તું જે જાણતો હો તે પ્રગટ કર.

³⁴ સમજદાર માણસો મને કહેશે અને મારી વાત સાંભળનારા શાણા લોકો સહમત થશે કે,

³⁵ ‘યોબ જ્ઞાન વિના બોલે છે, અને તેના શબ્દો અર્થહીન છે.’

³⁶ અરે, યોબની પૂરેપૂરી ઊલટતપાસ થાય તો કેવું સારું! કારણ, તે દુષ્ટની જેમ બોલ્યો છે.

³⁷ તે પોતાનાં પાપમાં વિદ્રોહ ઉમેરે છે, આપણી વચ્ચે અપરાધનો નકાર કરે છે, અને ઈશ્વર વિરુદ્ધ લાંબી લવરી કરે છે.