અયૂબ 32 - પવિત્ર બાઇબલ C.L.

¹ પોતાની દષ્ટિમાં પોતે નિર્દોષ છે, એ વાત યોબે પકડી રાખી. તેથી આ ત્રણ જણે વાર્તાલાપ બંધ કર્યો.

² પરંતુ રામ ગોત્રના, બારાકેલ બુઝીના પુત્ર એલીહૂનો ક્રોધ યોબ પર તપી ઊઠયો; કારણ કે યોબ ઈશ્વરને બદલે પોતાને નેક ઠરાવતો હતો.

³ તે યોબના ત્રણ મિત્રો પર પણ ક્રોધિત થયો, કારણ કે, યોબ દોષિત છે એવું પ્રતિપાદિત કરવા છતાં તેઓ યોબની દલીલોનો કોઈ ઉત્તર આપી શક્યા નહોતા.

⁴ પેલા ત્રણ પુરુષો એલીહૂથી વયમાં મોટા હોવાથી તેઓ બોલતા હતા ત્યાં સુધી તેણે રાહ જોઈ.

⁵ પણ જ્યારે એલીહૂએ જોયું કે પેલા ત્રણ પુરુષો પાસે કોઈ ઉત્તર નથી. ત્યારે તેને ક્રોધ ચઢયો.

⁶ તેથી બારાકેલ બૂઝીના પુત્ર એલીહૂએ ઉત્તર આપતાં કહ્યું: “હું વયમાં નાનો છું અને તમે વયોવૃદ્ધ છો તેથી હું શાંત રહ્યો, અને મારું મંતવ્ય જણાવતાં સંકોચ પામતો હતો.”

⁷ મેં વિચાર્યું, ‘ભલે, વયોવૃદ્ધો બોલે અને વયમાં મોટાઓ જ્ઞાન શીખવે,’

⁸ પરંતુ ઈશ્વરનો આત્મા માણસમાં જ્ઞાન પ્રેરે છે, અને સર્વસમર્થનો શ્વાસ તેને સમજણ આપે છે.

⁹ માત્ર વયમાં વૃદ્ધિ થવાથી જ જ્ઞાન આવતું નથી.

¹⁰ તેથી હું કહું છું કે મારી વાત સાંભળો, અને મને મારો અભિપ્રાય પ્રગટ કરવા દો.

¹¹ મેં તમારાં ડહાપણભર્યાં કથનો ધ્યનથી સાંભળ્યાં હતાં, અને તમે દલીલો શોધતા હતા, ત્યારે મેં તમારા શબ્દોની રાહ જોઈ હતી.

¹² મેં યાનપૂર્વક તમારી વાત સાંભળી છે, પરંતુ તમારામાંથી કોઈએ યોબની દલીલોનું ખંડન કર્યું નથી અને યોબના શબ્દોનો પ્રત્યુત્તર આપી શક્યા નથી.

¹³ કદાચ તમે કહેશો, ‘હવે અમને સમજ પડી છે; યોબને વિવાદમાં માણસ નહિ, પણ ઈશ્વર હરાવશે.’

¹⁴ યોબે મારી સાથે નહિ, પણ તમારી સાથે વિવાદ કર્યો છે, તો પણ મારો પ્રત્યુત્તર હું તમારા વક્તવ્યોને આધારે આપીશ નહિ.

¹⁵ યોબ જો, તેઓ અવાકા થઈ ગયા છે, તેઓ પાસે ઉત્તર નથી. તેમની પાસે શબ્દો ખૂટી ગયા છે.

¹⁶ તેઓ ત્યાં ઊભા છે પરંતુ તેમની પાસે કંઈ બોલવાનું રહ્યું નથી, તેઓ બોલતા બંધ થયા છે. છતાં ય શું મારે વાટ જોઈ બેસી રહેવું?

¹⁷ હું મારો ઉત્તર રજૂ કરીશ, હું પણ મારો અભિપ્રાય પ્રગટ કરીશ.

¹⁸ મારામાં શબ્દોનો ઊભરો ચડયો છે; જાણે મારું પેટ ફૂલીને ડમડોલ થઈ ગયું છે.

¹⁹ બંધ પાત્રમાં આસવ રાખ્યો હોય એવું મારું મન છે; દ્રાક્ષારસની નવી મશક પણ ફાટી જાય એવું એ છે.

²⁰ મને નિરાંત થાય માટે મારે બોલવું જ રહ્યું; મારે મોં ઉઘાડીને ઉત્તર આપવો જ પડશે.

²¹ હું કોઈ વ્યક્તિની તરફેણ કરીશ નહિ અને કોઈને ખુશામતના ખિતાબો આપીશ નહિ.

²² કારણ, મને ખુશામત કરતાં આવડતું નથી; જો હું એમ કરું, તો ઈશ્વર મને તત્કાળ ઉઠાવી લે.