અયૂબ 28 - પવિત્ર બાઇબલ C.L.

જ્ઞાન ક્યાંથી મળે?

¹ “ચાંદી માટે ખાણ હોય છે, અને સોનાને શુદ્ધ કરવાની જગા હોય છે.

² લોખંડ જમીનમાંથી ખોદી કાઢવામાં આવે છે, અને ખડકમાંથી તાંબુ ગાળવામાં આવે છે.

³ માણસો અંધકારને ભેદે છે, તેઓ ઘોર અંધારી ખાણમાં છેક ઊંડે ઊતરીને પથ્થરો ખણી કાઢે છે.

⁴ માનવવસવાટથી દૂર ખાણોમાં તેઓ ઊંડા બાકોરાં ખોદે છે; જ્યાં રાહદારીઓ ભૂલથીય જતા નથી, ત્યાં એકાંતમાં તેઓ દોરડાં પર લટકીને ઝૂલે છે.

⁵ ધરતીમાંથી અન્‍ન ઊપજે છે, પણ તેના પેટાળમાં બધું અગ્નિમાં ખદબદે છે.

⁶ ત્યાંથી જ કીમતી પથ્થરો અને નીલમણિ મળી આવે છે, અને તેની ધૂળમાં સોનું ભળેલું હોય છે.

⁷ કોઈ શિકારી પક્ષી તે ખાણોનો માર્ગ જાણતું નથી, અને ગરૂડની નજરે પણ તે માર્ગ પડયો નથી.

⁸ હિંસક પશુઓનાં પગલાં ત્યાં પડયાં નથી, અને સિંહ પણ ત્યાંથી પસાર થયો નથી.

⁹ ચકમકના ખડકો પર માણસો હાથ અજમાવે છે, અને પહાડોને પણ પાયામાંથી ઉથલાવી નાખે છે.

^10-11 ખડકો કોતરીને તેઓ ભોંયરાં બનાવે છે અને તેમની આંખો મૂલ્યવાન રત્નો નિહાળે છે. તેઓ નદીઓનાં ઉગમસ્થાનો પણ શોધી કાઢે છે અને છુપાયેલી વસ્તુઓને પ્રકાશમાં લાવે છે.

¹² પરંતુ જ્ઞાન! તે ક્યાંથી જડે, અને સમજશક્તિ ક્યાંથી પ્રાપ્ત થાય?

¹³ એ કેવું અપ્રાપ્ય છે તેની માણસને ખબર નથી, અને તે સજીવોની ભૂમિમાં જડતું નથી.

¹⁴ પાતાળ કહે છે, ‘તે મારામાં ઉપલબ્ધ નથી’ અને સમુદ્ર કહે છે, ‘તે મારી પાસે પણ નથી.’

¹⁵ સોનાની લગડીઓના બદલામાં તે ખરીદી શકાય નહિ, ચાંદી જોખીને પણ એનું મૂલ્ય ચૂકવી શકાય નહિ.

¹⁶ ઓફિરના વિશુદ્ધ સોનાથી પણ તે ખરીદી શકાય નહિ, કે મૂલ્યવાન ગોમેદ કે નીલમણિથી તેની કીમત થાય નહિ.

¹⁷ તેની તુલના સુવર્ણ કે સ્ફટિક સાથે થઈ શકે નહિ, અને અતિ કીમતી સુવર્ણ અલંકારોના સાટામાં તે મળે નહિ.

¹⁸ પરવાળાં અને સ્ફટીકમણિની વાત જ કરવી નહિ, કારણ, કીમતી માણેક કરતાં પણ જ્ઞાન અધિક મૂલ્યવાન છે.

¹⁹ કૂશ દેશનો પોખરાજ મણિ તેની બરાબરી કરી શકે નહિ અને શુદ્ધ સુવર્ણથી તેની કીમત આંકી શકાય નહિ.

²⁰ એ જ્ઞાનનું ઉગમસ્થાન કયાં? અને સમજશક્તિ ક્યાંથી પ્રાપ્ત થાય?

²¹ કારણ, સર્વ સજીવોની આંખોથી તે છુપાયેલું છે, અને આકાશનાં પક્ષીઓથી પણ તે સંતાયેલું છે.

²² અધોલોક અને મૃત્યુલોક કહે છે, ‘અમારા કાનોએ માત્ર તેની અફવા સાંભળી છે!’

²³ કેવળ ઈશ્વર જ જ્ઞાન તરફ જતો માર્ગ જાણે છે અને તેમને જ તેના નિવાસસ્થાનની ખબર છે.

²⁴ કારણ, ઈશ્વર ધરતીના છેડા સુધી જોઈ શકે છે, અને આકાશ તળે સઘળાંને નિહાળે છે.

²⁵ જ્યારે ઈશ્વરે વાયુને વજન બક્ષ્યું, અને સાગરોની સીમા ઠરાવી;

²⁶ જ્યારે તેમણે વરસાદ માટે નિયમ ઠરાવ્યો, અને ગાજવીજનો માર્ગ નિર્ધારિત કર્યો;

²⁷ ત્યારે તેમણે જ્ઞાનને નિહાળ્યું અને તેની તુલના અને ચક્સણી કરીને તેને અનુમોદન આપ્યું.

²⁸ ઈશ્વરે માણસોને કહ્યું, ‘પ્રભુનો આદરપૂર્વક ભય રાખવો એ જ સાચું જ્ઞાન છે, દુષ્ટતાથી વિમુખ થવું તે જ સાચી સમજ છે.”