અયૂબ 22 - પવિત્ર બાઇબલ C.L.

તૃતીય સંવાદ ( 22:1—27:23 ) એલિફાઝનું વક્તવ્ય

¹ ત્યાર પછી એલિફાઝ તેમાનીએ પ્રત્યુત્તર આપતાં કહ્યું,

² “શું કોઈ માણસ ઈશ્વરને ઉપયોગી થાય ખરો? અરે, કોઈ મહાજ્ઞાની માણસ પણ ઈશ્વરને લાભકારક નીવડે ખરો?

³ તું નેક હો તો તેમાં સર્વસમર્થને રાજી થવા જેવું શું છે? અને તારા સદાચરણથી તેમને શો લાભ થાય?

⁴ શું તે તને ભક્તિભાવને લીધે ઠપકો આપે છે, અને તારા પર મુકદમો ચલાવે છે?

⁵ ના, એ તો તારી ઘોર દુષ્ટતાનું પરિણામ છે; તારા અપરાધોનો પાર નથી.

⁶ તેં તારા જાતભાઈએ ગીરે મૂકેલી થાપણ અન્યાયથી પડાવી લીધી છે; અને દેણદારોનાં વસ્ત્ર ઉતારી લઈ તેમને નગ્ન કર્યાં છે.

⁷ થાકેલાંને પીવાનું પાણી ય આપ્યું નથી, અને ભૂખ્યાંને ભોજનથી વંચિત રાખ્યાં છે.

⁸ તેં જબરદસ્તીથી લોકોની જમીન પચાવી પાડી છે અને તારા ઉચ્ચ પદનો ગેરલાભ લઈ તેમાં વસવાટ કર્યો.

⁹ તેં સહાય માટે આવેલી વિધવાઓને ખાલી હાથે પાછી કાઢી છે, અને અનાથો પર અત્યાચાર કર્યો છે.

¹⁰ તેથી જ હવે તારી આસપાસ જાળ પથરાયેલી છે, અને અણધાર્યો આતંક તને ડરાવે છે.

¹¹ જેમાં થઈને જોઈ ન શકાય એવો અંધકાર તને ગભરાવે છે, અને પૂરનાં પાણી તારા પર ફરી વળ્યાં છે.

¹² શું ઈશ્વર સ્વર્ગમાં સર્વોચ્ચ સ્થાને બિરાજેલા નથી? તે ઉપરથી તારાઓને જુએ છે; અને તારા યે કેટલા ઊંચા છે!

¹³ તેમ છતાં તું કહે છે; ‘ઈશ્વર શું જાણે? ગાઢ વાદળાંમાં થઈને તેમને શું દેખાવાનું છે કે તે ન્યાય કરી શકે?’

¹⁴ ઈશ્વર આકાશના ગુંબજ પર વિચરે છે. ત્યારે ઘાડાં વાદળો તેમને આવરી લે છે, તેથી તે જોઈ શક્તા નથી.

¹⁵ જે અંધારે માર્ગે દુષ્ટો ચાલ્યા તે જ માર્ગને તું વળગી રહેવા માગે છે?

¹⁶ તેઓ તો તેમનો નિયત સમય પૂરો થાય તે પહેલાં ઝડપી લેવાયા, અને ધરમૂળથી પૂરમાં તણાઈ ગયા.

¹⁷ તેઓ ઈશ્વરને કહેતા, ‘અમારાથી દૂર રહો’ સર્વસમર્થ અમને શું કરી લેવાના છે?’

¹⁸ પરંતુ ઈશ્વરે જ તેમનાં ઘર સારાં વાનાથી ભરી દીધાં હતાં; દુષ્ટો માટેના એ ઈરાદા મને સમજાતા નથી.

¹⁹ દુષ્ટોને થતી સજા જોઈને નેકજનો હરખાશે અને નિર્દોષજનો ઘૃણાપૂર્વક તેમની મશ્કરી કરશે.

²⁰ તેઓ કહે છે, ‘અમારા વૈરીઓ સંહાર પામ્યા છે, અને તેમાંથી બચી છૂટયા તેમને અગ્નિએ ભસ્મ કર્યા છે.’

²¹ તેથી યોબ, તું ઈશ્વર સાથે સમાધાન કર અને શાંતિ સ્થાપ; તેમ કરવાથી જ તારું ભલું થશે.

²² તેમના મુખનો બોધ ગ્રહણ કર, અને તેમનાં કથનો તારા હૃદયમાં રાખ.

²³ જો તું સર્વસમર્થ પાસે પાછો ફરીશ, તો તું સંસ્થાપિત થશે; તેથી તારા નિવાસમાંથી ભૂંડાઈ દૂર કર.

²⁴ તારું સોનું ધૂળમાં ફેંકી દે; ઓફિરનું શુદ્ધ સોનું નાળાના પથરામાં નાખી દે.

²⁵ પછી તો સર્વસમર્થ તારું સોનું બની રહેશે; તે જ તારું કિંમતી રૂપું બની જશે.

²⁶ તું સર્વસમર્થમાં આનંદ કરીશ, અને ઈશ્વર તરફ આનંદથી તારું મુખ ઉઠાવશે.

²⁷ તું પ્રાર્થના કરશે ત્યારે ઈશ્વર ઉત્તર દેશે, અને તું તારી માનતાઓ પૂરી કરશે.

²⁸ તારો પ્રત્યેક નિર્ણય સફળ થશે, અને તારા માર્ગો પર પ્રકાશ પથરાશે.

²⁹ લોકો કોઈને ઉતારી પાડે ત્યારે તું તેની ઉન્‍નતિ માટે પ્રાર્થના કરશે, તો ઈશ્વર એવા પતિતોનો ઉદ્ધાર કરશે.

³⁰ નિર્દોષ ન હોય તેને પણ ઈશ્વર ઉગારશે, અને તારા હાથોની શુદ્ધતા તેને બચાવશે.