અયૂબ 20 - પવિત્ર બાઇબલ C.L.

સોફારનું વક્તવ્ય

¹ તે પછી સોફાર નાઅમાથીએ પ્રત્યુત્તર આપતાં કહ્યું;

² “યોબ, મારા વિચારો મને પ્રત્યુત્તર માટે પ્રેરે છે, અને એથી હું એ માટે અધીરો બની ગયો છું.

³ અમારી દલીલો વિષેનો તારો રદિયો શરમજનક છે, અને મારી આંતરસૂઝ મને ઉત્તર સૂઝાડે છે.

⁴ શું તું જાણે છે કે પ્રાચીન સમયથી, એટલે માનવજાતને પૃથ્વી પર વસાવવામાં આવી ત્યારથી,

⁵ દુષ્ટની ખુશાલી અલ્પજીવી હોય છે, અને અધર્મીનો આનંદ ક્ષણિક હોય છે?

⁶ તેની ઉન્‍નતિ આકાશ સુધી પહોંચે, અને તેનું માથું વાદળાંને ય આંબી જાય,

⁷ તેમ છતાં પોતાની વિષ્ટાની જેમ તે નષ્ટ થશે. તેના ઓળખીતા પૂછશે, ‘તે ક્યાં ગયો?’

⁸ તે સ્વપ્નની જેમ ઊડી જશે અને શોયો જડશે નહિ; રાત્રિના સંદર્શનની જેમ તે લોપ થશે.

⁹ તેની દેખરેખ રાખનાર આંખો તેને ફરીથી જોશે નહિ; તેનું નિવાસસ્થાન તેને ફરીથી જોવા પામશે નહિ.

¹⁰ તેનાં સંતાનો ગરીબોની મહેરબાની શોધશે અને તેણે તેના હાથોએ પડાવી લીધેલ સંપત્તિ પાછી આપવી પડશે.

¹¹ તેનાં હાડકાંમાં જુવાનીનું જોમ છે, પણ તે તેની સાથે જ ધૂળમાં ભળી જશે.

¹² જો કે દુષ્ટતા તેના મુખને મીઠી લાગે છે, અને તે તેને પોતાની જીભ નીચે ભલે સંતાડે,

¹³ અને તેની લહેજત માણવાને તેને કાઢી નાખવા તૈયાર ન હોય અને તેના પોતાના મુખમાં વાગોળ્યા કરે,

¹⁴ તો પણ તેનો એ ખોરાક તેના પેટમાં બદલાઈ જશે, અને તેના જઠરમાં સાપના ઝેર જેવો બની જશે.

¹⁵ તેણે હોઈયાં કરેલું ધન તે ઓકી નાખે છે. ઈશ્વર તેને તેના પેટમાંથી પાછું કઢાવે છે.

¹⁶ દુષ્ટે સાપનું ઝેર ચૂસવું પડશે, અને નાગનો ક્તિલ ડંખ તેને હણી નાખશે.

¹⁷ તે તેલની નદીઓ જોવા જીવતો રહેશે નહિ; તે દૂધમધની ધારા પણ જોવા પામશે નહિ.

¹⁸ તેણે પોતાના પરિશ્રમનું ફળ ખાધા વિના પાછું આવવું પડશે, અને તે પોતાની કમાણી માણી શકશે નહિ.

¹⁹ કારણ, તેણે ગરીબો પર જુલમ ગુજાર્યો છે અને તેમની અવગણના કરી છે; બીજાનાં બાંધેલાં ઘર તેણે પચાવી પાડયાં છે.

²⁰ તેના લોભને થોભ નથી, તોપણ પોતે સંઘરેલી સંપત્તિ તે સાચવી શકશે નહિ.

²¹ તેની ભૂખ આગળ કશું બાકી રહેવા પામ્યું નથી, તેથી તેની સમૃદ્ધિ ટકશે નહિ.

²² તેની વિપુલ સમૃદ્ધિના સમયે જ તે તંગીમાં આવી પડશે, અને તેના પર દરેક જાતની વિપત્તિ ત્રાટકશે.

²³ તેને પોતાનું પેટ પૂરેપૂરું ભરવા દો; કારણ, ઈશ્વર તેના પર પોતાનો ભયાનક ક્રોધાગ્નિ મોકલશે, અને તેના પર પોતાનો કોપ વરસાવશે.

²⁴ તે લોખંડના હથિયારથી બચી જવા યત્ન કરશે, ત્યારે તાંબાનું બાણ તેને વીંધી નાખશે.

²⁵ તેની પીઠમાંથી બાણ આરપાર નીકળી જશે, એની તેજદાર અણી તેના પિત્તાશયને વીંધીને બહાર આવશે; ત્યારે તેના પર આતંક છવાઈ જશે.

²⁶ તેના ખજાના પર ઘોર અંધકાર વ્યાપી જશે, જેને પેટાવવી પડતી નથી એવી વીજળી તેને ભસ્મ કરી નાખશે, અને તેના તંબૂમાં બચેલું સઘળું સળગી જશે.

²⁷ આકાશ એ દુષ્ટ માણસની ભ્રષ્ટતા ખુલ્લી પાડે છે. અને પૃથ્વી તેની વિરુદ્ધ સાક્ષી પૂરે છે.

²⁸ તેના ઘરની સંપત્તિ તણાઈ જશે, ઈશ્વરના કોપને દિવસે એ ઘસડાઈ જશે.

²⁹ દુષ્ટને ઈશ્વર તરફથી મળેલો એ હિસ્સો છે; તેમણે નીમેલો એ તેનો વારસો છે.