ઉત્પત્તિ 36 - પવિત્ર બાઇબલ C.L.

એસાવના વંશજોની યાદી

¹ આ એસાવ એટલે અદોમની વંશાવળી છે. એસાવે કનાની લોકોમાંથી પત્નીઓ કરી હતી:

^2-3 એલોન હિત્તીની પુત્રી આદા, સિબયોન હિવ્વીના પુત્ર આનાની પુત્રી ઓહલીબામા અને ઇશ્માએલની પુત્રી એટલે નબાયોથની બહેન બાસમાથ.

^4-5 એસાવને કનાનમાં થયેલા પુત્રો આ પ્રમાણે છે: આદાએ એલિફાઝને જન્મ આપ્યો, બાસમાથે રેઉએલને જન્મ આપ્યો અને ઓહલીબામાએ યેઉશ, યાલામ અને કોરાને જન્મ આપ્યો.

⁶ પછી એસાવ તેની પત્નીઓ, પુત્રો અને પુત્રીઓ તથા સર્વ કુટુંબીજનો તથા ઘેટાંબકરાં, ઢોરઢાંક અને કનાનમાં મેળવેલી પોતાની સર્વ સંપત્તિ લઈને તેના ભાઈ યાકોબની પાસેથી દૂર દેશમાં જતો રહ્યો.

⁷ કારણ, તેમની સંપત્તિ ઘણી હોવાથી તેઓ સાથે રહી શકે તેમ નહોતા. વળી, તેમનાં ઢોર એટલાં બધાં હતાં કે તેમના પ્રવાસના દેશમાં તેમનો નિભાવ થઈ શકે તેમ નહોતું.

⁸ તેથી એસાવ સેઈરના પહાડીપ્રદેશમાં જઈને વસ્યો. એસાવ એ જ અદોમ છે.

⁹ સેઈરના પહાડી પ્રદેશમાં વસેલા અદોમવાસીઓના પૂર્વજ એસાવની આ વંશાવળી છે.

¹⁰ એસાવના પુત્રો આ છે: એસાવની પત્ની આદાનો પુત્ર એલિફાઝ અને તેની બીજી પત્ની બાસમાથનો પુત્ર રેઉએલ.

^11-12 એલિફાઝના પુત્રો: તેમાન, ઓમાર, સફો, ગાતામ, કનાઝ. એસાવના પુત્ર એલિફાઝની ઉપપત્ની તિમ્ના હતી. તેનો પુત્ર અમાલેક હતો. આ એસાવની પત્ની આદાના વંશજો છે.

¹³ રેઉએલના પુત્રો: નાહાથ, ઝેરા, શામ્મા અને મિઝ્ઝા. એ એસાવની પત્ની બાસમાથના વંશજો છે.

¹⁴ સિબયોનના પુત્ર આનાની પુત્રી ઓહલીબામા, જે એસાવની પત્ની હતી તેના વંશજો આ છે: યેઉશ, યાલામ તથા કોરા.

^15-16 એસાવના પુત્રોમાંના મુખ્ય સરદારો આ પ્રમાણે હતા. એસાવના પ્રથમ પુત્ર એલિફાઝના પુત્રો: તેમાન, ઓમાર, સફો, કનાઝ, કોરા, ગાતામ, અમાલેક. એલિફાઝને અદોમ દેશમાં થયેલા એ સરદારો છે. તેઓ આદાના વંશજો છે.

¹⁷ એસાવના પુત્ર રેઉએલના પુત્રો: નાહાથ, ઝેરા, શામ્મા, મિઝ્ઝા. અદોમ દેશમાં રેઉએલથી થયેલા એ સરદારો છે. તેઓ એસાવની પત્ની બાસમાથના વંશજો છે.

¹⁸ એસાવની પત્ની ઓહલીબામાના પુત્રો: યેઉશ, યાલામ અને કોરા. આ સરદારો એસાવની પત્ની, એટલે આનાની પુત્રી ઓહલીબામાના પુત્રો છે.

¹⁹ આ એસાવના પુત્રો તથા સરદારો છે. એસાવ એ જ અદોમ છે.

સેઈરના વંશજો

^20-21 અદોમ દેશના મૂળ વતનીઓ હૂર વંશના સેઈરના પુત્રો આ છે: લોટાન, શોબાલ, સિબયોન, આના, દીશોન, એસેર, દીશાન. તેઓ હૂર વંશના સરદારો અને અદોમ દેશમાં વસેલા સેઈરના પુત્રો છે.

²² લોટાનના પુત્રો હોરી તથા હોમામ હતા. વળી, લોટાનની બહેન તિમ્ના હતી.

²³ શોબાલના પુત્રો: આલ્વાન, માનાહાથ, એબાલ, સફો અને ઓનામ હતા.

²⁴ સિબયોનના પુત્રો આયા અને આના હતા. આના વેરાન પ્રદેશમાં પોતાના પિતાનાં ગધેડાં ચરાવતો હતો ત્યારે તેને ગરમ પાણીના ઝરા મળી આવ્યા.

²⁵ આનાનો પુત્ર દીશોન તથા પુત્રી ઓહલીબામા હતાં.

²⁶ દીશોનના પુત્રો: હેમ્દાન, એશ્બાન, યિથ્રામ અને ખારાન હતા.

²⁷ એસેરના પુત્રો બિલ્હાન, ઝાઅવાન અને અકાન.

²⁸ દીશાનના પુત્રો: ઉસ અને અરાન.

^29-30 હૂર વંશના સરદારો આ છે: લોટાન, શોબાલ, સિબયોન, આના, દીશોન, એસેર અને દીશાન. આ બધા પોતાના ગોત્ર પ્રમાણે સેઈર દેશના હુર વંશના સરદારો છે.

અદોમના રાજાઓ

³¹ ઇઝરાયલીઓ પર કોઈ રાજા નહોતો તે પહેલાં અદોમ દેશ પર રાજ્ય કરનાર રાજાઓ આ છે.

³² બેઓરનો પુત્ર બેલા અદોમનો રાજા બન્યો. તેના શહેરનું નામ દીનહાબા હતું.

³³ બેલા મૃત્યુ પામ્યો, અને તેને સ્થાને બોસ્રાના વતની ઝેરાનો પુત્ર યોબાબ રાજા બન્યો.

³⁴ યોબાબ મૃત્યુ પામ્યો, અને તેને સ્થાને તેમાન પ્રદેશના હુશામે રાજ કર્યું.

³⁵ હુશામના મૃત્યુ પછી બિદાદના પુત્ર હદાદે રાજ કર્યું. તેણે મોઆબના પ્રદેશમાં મિદ્યાનીઓને હરાવ્યા. હદાદના શહેરનું નામ અવીથ હતું.

³⁶ હદાદના મૃત્યુ પછી માસરેકાના વતની સામ્લાએ રાજ કર્યું.

³⁷ સામ્લાના મૃત્યુ પછી નદી પાસેના રહોબોથના વતની શાઉલે રાજ કર્યું.

³⁸ શાઉલના મૃત્યુ પછી તેને સ્થાને આખ્બોરનો પુત્ર બાઆલ-હાનાન રાજા બન્યો.

³⁹ બાઆલ- હાનાનના મૃત્યુ પછી હદારે રાજ કર્યું. હદારના શહેરનું નામ પાઉ હતું. તેની પત્નીનું નામ મહેટાબએલ હતું. તે મેઝાહાલના પુત્ર માટરેદની પુત્રી હતી.

⁴⁰ પોતાનાં કુટુંબ અને વસવાટનાં સ્થળ પ્રમાણે એસાવથી થયેલા સરદારોનાં આ નામ છે: તિમ્ના, આલ્વા, યથેથ,

⁴¹ ઓહલીબામા, એલા, પીનોન,

⁴² કનાઝ, તેમાન, મિલ્સાર, માગ્દીએલ, ઈરામ.

⁴³ પોતાના વસવાટના પ્રદેશ પ્રમાણે એ અદોમના સરદારો છે. અદોમાસીઓનો પૂર્વજ એસાવ જ છે.