ઉત્પત્તિ 30 - પવિત્ર બાઇબલ C.L.

¹ જ્યારે રાહેલે જોયું કે પોતાને યાકોબથી બાળકો થતાં નથી ત્યારે તેને પોતાની બહેનની ઈર્ષા થઈ અને તેણે યાકોબને કહ્યું, “મને બાળકો આપો, નહિ તો હું મરી જઈશ.”

² યાકોબે રાહેલ પર ગુસ્સે થઈને કહ્યું, “હું કંઈ ઈશ્વર છું? તને સંતાનથી વંચિત રાખનાર તો તે છે.”

³ ત્યારે રાહેલે કહ્યું, “તમે મારી આ દાસી બિલ્હા સાથે સમાગમ કરો જેથી તે મારે માટે બાળકોને જન્મ આપે અને એમ તેની મારફતે હું માતા બની શકું.”

⁴ આથી તેણે પોતાની દાસી બિલ્હાને યાકોબની પત્ની તરીકે સોંપી અને યાકોબે તેની સાથે સમાગમ કર્યો.

⁵ બિલ્હા ગર્ભવતી થઈ અને તેણે યાકોબથી એક પુત્રને જન્મ આપ્યો.

⁶ ત્યારે રાહેલ બોલી, “ઈશ્વરે મારો ન્યાય કર્યો છે. તેમણે મારો પોકાર સાંભળ્યો છે અને મને પુત્ર આપ્યો છે.” આથી તેણે તેનું નામ દાન (ન્યાય કર્યો છે) પાડયું.

⁷ રાહેલની દાસી બિલ્હા ફરી ગર્ભવતી થઈ અને તેણે યાકોબથી બીજા પુત્રને જન્મ આપ્યો.

⁸ ત્યારે રાહેલે કહ્યું “મેં મારી બહેન સાથે જબરી બાથ ભીડી છે અને હું જીત પામી છું.” આથી તેણે તેનું નામ નાફતાલી (બાથ ભીડી છે) પાડયું.

⁹ જ્યારે લેઆહે જોયું કે તેને સંતાન થતાં નથી ત્યારે તેણે પોતાની દાસી ઝિલ્પાને યાકોબની પત્ની થવા સોંપી.

¹⁰ પછી લેઆહની દાસી ઝિલ્પાને યાકોબથી એક પુત્ર જન્મ્યો.

¹¹ ત્યારે લેઆહે કહ્યું, “સદ્ભાગ્ય!” માટે તેણે તેનું નામ ગાદ (સદ્ભાગ્ય) પાડયું.

¹² લેઆહની દાસી ઝિલ્પાને યાકોબથી બીજો પુત્ર જન્મ્યો.

¹³ ત્યારે લેઆહ બોલી, “મને ધન્ય છે, હવે સ્ત્રીઓ મને ધન્યવાદ આપશે.” આથી તેણે તેનું નામ આશેર (ધન્ય) પાડયું.

¹⁴ ઘઉંની કાપણીની મોસમમાં રૂબેન ખેતરમાં ગયો અને તેને કામોત્તેજક ભોરીંગડાં મળ્યાં. તેણે તે લાવીને પોતાની માતા લેઆહને આપ્યાં. ત્યારે રાહેલે કહ્યું, “તારો દીકરો ભોરીંગડાં લાવ્યો છે તેમાંથી મને થોડાં આપ.”

¹⁵ ત્યારે લેઆહે તેને કહ્યું, “તેં મારો પતિ લઈ લીધો છે એ કંઈ ઓછું છે કે મારા દીકરાએ લાવેલાં ભોરીંગડાં પણ તારે લઈ લેવાં છે?” રાહેલે કહ્યું, “તો તારા દીકરાના ભોરીંગડાંના બદલામાં આજે મારા પતિ તારી સાથે સૂઈ જશે.”

¹⁶ યાકોબ સાંજે સીમમાંથી પાછો આવ્યો ત્યારે લેઆહ તેને મળવા માટે સામે ગઈ અને તેને કહ્યું, “આજે તમારે મારી સાથે સૂવું પડશે. કારણ, મારા દીકરાએ લાવેલાં ભોરીંગડા આપીને મેં તમને રાખી લીધા છે.” આથી તે રાત્રે યાકોબ તેની સાથે સૂઈ ગયો.

¹⁷ ઈશ્વરે લેઆહની વિનંતી સાંભળી અને તે ગર્ભવતી થઈ અને યાકોબથી તેને પાંચમો પુત્ર જન્મ્યો.

¹⁸ લેઆહ બોલી, “મેં મારી દાસી મારા પતિને આપી એટલે ઈશ્વરે મને મારો બદલો આપ્યો છે.” આથી તેણે તેનું નામ ઇસ્સાખાર (બદલો) પાડયું.

¹⁹ લેઆહ ફરી ગર્ભવતી થઈ અને તેણે યાકોબથી છઠ્ઠા પુત્રને જન્મ આપ્યો.

²⁰ ત્યારે લેઆહ બોલી, “ઈશ્વરે મને ઉત્તમ ભેટ આપી છે, હવે મારા પતિ મારું સન્માન કરશે; કારણ મેં એમને છ છ પુત્રો આપ્યા છે.” માટે તેણે તેનું નામ ઝબુલૂન (ભેટ) પાડયું.

²¹ ત્યાર પછી તેણે એક પુત્રીને જન્મ આપ્યો અને તેણે તેનું નામ દીના પાડયું.

²² પછી ઈશ્વરે રાહેલને સંભારી અને તેની વિનંતી માન્ય કરી અને તેનું વંધ્યત્વ દૂર કર્યું.

²³ તે ગર્ભવતી થઈ અને તેણે એક પુત્રને જન્મ આપ્યો. તે બોલી, “ઈશ્વરે મારું અપમાન દૂર કર્યું છે.

²⁴ હવે પ્રભુ મને બીજો એક દીકરો પણ ઉમેરી આપો.” તેણે તેનું નામ યોસેફ (ઉમેરો કરો) પાડયું.

²⁵ રાહેલે યોસેફને જન્મ આપ્યો ત્યાર પછી યાકોબે લાબાનને કહ્યું, “હવે મને વિદાય કરો કે હું મારા દેશમાં એટલે મારા વતનમાં જાઉં.

²⁶ જેમને લીધે મેં તમારી નોકરી કરી તે મારી પત્નીઓ અને મારાં બાળકો મને સોંપી દો અને મને જવા દો. મેં તમારે ત્યાં કેવી સારી નોકરી કરી છે તે તમે જાણો છો.”

²⁷ પણ લાબાને તેને કહ્યું, “જો તારી રહેમ નજર મારા પર હોય તો તું અહીં જ રહે. કારણ, મેં જોષ જોઈને શોધી કાઢયું છે કે તારે લીધે પ્રભુએ મને આશિષ આપી છે.

^28-29 હવે તારે જે વેતન જોઈએ તે કહે અને હું તને તે આપીશ.” યાકોબે કહ્યું, “તમારે ત્યાં મેં કેવી સારી નોકરી કરી છે તે તમે જાણો છો.

³⁰ હું તમારી પાસે આવ્યો તે પહેલાં તમારી પાસે થોડાં જ ઢોર હતાં, પણ હવે તેમાં ધરખમ વધારો થયો છે. જ્યાં જ્યાં મારાં પગલાં પડયાં ત્યાં ત્યાં પ્રભુએ તમને આશિષ બક્ષી છે. પણ હું મારા પોતાના કુટુંબની જોગવાઈ ક્યારે કરીશ?”

³¹ લાબાને તેને પૂછયું, “હું તને શું આપું?” યાકોબે કહ્યું, “તમે મને કંઈ જ આપશો નહિ. પણ તમે આટલું કરશો તો હું ફરી તમારાં ઘેટાં બકરાં ચરાવીશ અને સાચવીશ.

³² આજે હું તમારાં ઘેટાંબકરાંના બધાં ટોળામાં ફરી વળીશ અને તેમાંથી ચટાપટાવાળાં અને ટપકાંવાળાં બધાં બકરાં તેમજ બધાં કાળાં હલવાન અલગ પાડી દઈશ. એ મારું વેતન થશે.

³³ તમે પાછળથી મારા વેતન તરીકે મળેલાં ઘેટાંબકરાંની તપાસ કરવા આવશો ત્યારે મારી પ્રામાણિક્તા પુરવાર થશે. મારી પાસેનાં ઘેટાંબકરાંમાંથી કોઈ બકરું ચટાપટાવાળું કે ટપકાંવળું ન હોય અને કોઈ ઘેટું કાળું ન હોય તો તે ચોરેલું છે તેમ ગણાશે.”

³⁴ લાબાને કહ્યું, “ભલે, તારી વાત મને મંજૂર છે.”

³⁵ પણ તે દિવસે લાબાને ચટાપટાવાળા અને ટપકાંવાળા બધા બકરા, ચટાપટાવાળી અને ટપકાંવાળી બધી બકરીઓ અને બધાં કાળાં ઘેટાં જુદાં પાડી દઈને પોતાના દીકરાઓને સાચવવા સોંપી દીધાં.

³⁶ અને પોતાની અને યાકોબની વચ્ચે ત્રણ દિવસની મુસાફરી જેટલું અંતર રાખ્યું. યાકોબે લાબાનનાં બાકીનાં ઘેટાંબકરાં સંભાળી લીધાં.

³⁷ પછી યાકોબે લીમડાની, બદામની અને ચિનારની લીલી સોટીઓ લીધી અને તેમને છોલીને તેમનો સફેદ ભાગ ખુલ્લો કરી તેમાં સફેદ પટા પાડયા.

³⁸ પછી તેણે એ છોલેલી સોટીઓ ઘેટાંબકરાં જ્યાં પાણી પીવા આવતાં હતાં ત્યાં પાણીના હવાડા આગળ ઘેટાંબકરાંની સામે ઊભી કરી. ઘેટાંબકરાં પાણી પીવા આવે ત્યારે તેઓ સંવનન કરતાં.

³⁹ પેલી સોટીઓ સામે સંવનન કરતાં ગર્ભાધાન થાય એટલે તેમને કાબરચીતરાં, ચટાપટાવાળાં અને ટપકાંવાળાં બચ્ચાં જનમતાં.

⁴⁰ યાકોબ એવાં ટપકાંવાળાં અને પૂરેપરાં કાળાં બચ્ચાંને જુદાં જ રાખતો. એમ તેણે પોતાનાં ટોળાં જુદાં પાડયાં અને તેમને લાબાનનાં ઘેટાં સાથે ભળવા દીધાં નહિ.

⁴¹ જ્યારે જ્યારે ટોળામાંનાં હૃષ્ટપુષ્ટ ઘેટાંબકરાં સંવનન કરતાં ત્યારે તે તેમની સામે પેલા હવાડા આગળ પેલી સોટીઓ મૂક્તો, જેથી એ સોટીઓ સામે તેમનું ગર્ભાધાન થાય.

⁴² પણ ટોળામાંનાં નબળાં ઘેટાંબકરાં સામે તે હવાડા આગળ સોટીઓ મૂક્તો નહિ. આથી લાબાનનાં ઘેટાંબકરાં નબળાં હતાં, જ્યારે યાકોબનાં હૃષ્ટપુષ્ટ થયાં.

⁴³ આમ, એ માણસ ખૂબ સમૃદ્ધ બની ગયો, અને તેની પાસે ઘેટાંબકરાંનાં મોટાં ટોળાં, દાસદાસીઓ, ઊંટો અને ગધેડાં હતાં.