ઉત્પત્તિ 25 - પવિત્ર બાઇબલ C.L.

અબ્રાહામના અન્ય વંશજો

¹ અબ્રાહામે બીજી સ્ત્રી સાથે લગ્ન કર્યાં; તે સ્ત્રીનું નામ કટૂરા હતું.

² તેને પેટે અબ્રાહામને આ પુત્રો થયા: ઝિમ્રાન, યોકશાન, મદાન, મિદ્યાન, યિશલાક અને શૂઆહ.

³ યોકશાનના બે પુત્રો હતા: શબા અને દદાન. દદાનના પુત્રો: આશૂરીમ, લટુશીમ, લઉસીમ.

⁴ મિદ્યાનના પુત્રોનાં નામ આ છે: એફા, એફેર, હનોખ, અબીદા અને એલ્દા. એ બધા કટૂરાના વંશજો હતા.

⁵ અબ્રાહામે પોતાની બધી સંપત્તિ ઇસ્હાકને આપી;

⁶ પણ પોતાની ઉપપત્નીઓના પુત્રોને તો તેણે બક્ષિસો આપીને પોતે જીવતો હતો તે જ દરમ્યાન ઇસ્હાકથી દૂર પૂર્વપ્રદેશમાં મોકલી દીધા.

અબ્રાહામનું અવસાન અને દફન

⁷ અબ્રાહામનું આયુષ્ય એકંદરે એક્સો પંચોતેર વર્ષનું હતું.

⁸ તે પોતાની વૃદ્ધાવસ્થામાં ઘણી મોટી ઉંમરે મરણ પામ્યો અને પોતાના પૂર્વજો સાથે મળી ગયો.

⁹ તેના પુત્રો ઇસ્હાક અને ઇશ્માએલે તેને મામરેની પૂર્વમાં આવેલા સોહાર હિત્તીના પુત્ર એફ્રોનના ખેતરમાં આવેલી માખ્પેલાની ગુફામાં દફનાવ્યો.

¹⁰ એ ખેતર અબ્રાહામે હિત્તીઓ પાસેથી ખરીદ્યું હતું. તેમાં અબ્રાહામને તેની પત્ની સારા પાસે દફનાવવામાં આવ્યો.

¹¹ અબ્રાહામના મૃત્યુ પછી ઈશ્વરે તેના પુત્ર ઇસ્હાકને આશિષ આપી અને ઇસ્હાક બેર-લાહાય-રોઈ પાસે રહેવા લાગ્યો.

ઇશ્માએલના વંશજો

¹² અબ્રાહામને સારાની ઇજિપ્તી દાસી હાગારથી થયેલા પુત્ર ઇસ્માએલના વંશજો આ પ્રમાણે છે:

¹³ ઇશ્માએલના પુત્રોનાં નામ વયાનુક્રમે આ પ્રમાણે છે: જયેષ્ઠ પુત્ર નબાયોથ, પછી કેદાર, આદબએલ, મિબ્સામ,

¹⁴ મિશ્મા, દુમા, માસ્સા,

¹⁵ હદાદ, તેમા, યટુર, નાફીશ, કેદમા.

¹⁶ એ ઇશ્માએલના પુત્રો છે. એમનાં નામ પરથી એમનાં નગરો અને મુકામોનાં નામ પડયાં છે. એ બારે જણ પોતપોતાના કુળના પ્રથમ પૂર્વજો હતા.

¹⁷ ઇશ્માએલ એક્સો સાડત્રીસ વર્ષની ઉંમરે મૃત્યુ પામ્યો અને પોતાના પૂર્વજો સાથે મળી ગયો.

¹⁸ ઇશ્માએલના વંશજો આશ્શૂર જવાને રસ્તે ઇજિપ્તની પૂર્વ દિશામાં હવીલાથી શૂરની વચ્ચેના પ્રદેશમાં તેમના અન્ય ભાઈઓથી જુદા વસ્યા હતા.

એસાવ અને યાકોબનો જન્મ

¹⁹ અબ્રાહામના પુત્ર ઇસ્હાકની વંશાવળી આ પ્રમાણે છે: અબ્રાહામ ઇસ્હાકનો પિતા હતો.

²⁰ ઇસ્હાકે 40 વર્ષની ઉંમરે મેસોપોટેમિયાના અરામી બથુએલની પુત્રી અને અરામી લાબાનની બહેન રિબકા સાથે લગ્ન કર્યાં.

²¹ તેની પત્ની વંધ્યા હતી. તેથી તેણે તેને માટે પ્રભુને પ્રાર્થના કરી અને પ્રભુએ તે માન્ય કરી. રિબકા ગર્ભવતી થઈ.

²² તેના પેટમાં બાળકોએ બાઝાબાઝ કરી. તેથી તે બોલી, “જો એમ જ હોય, તો મારા જીવવાનો શો અર્થ?” તે પ્રભુને પૂછવા ગઈ

²³ તો પ્રભુએ તેને કહ્યું, “તારા પેટમાં બે પ્રજાઓ છે; જન્મથી જ પરસ્પર વિરોધી એવી બે પ્રજાઓ છે. એક પ્રજા બીજી કરતાં વધારે બળવાન બનશે અને મોટો નાનાનો દાસ થશે.”

²⁴ જ્યારે તેનો પ્રસૂતિકાળ આવી પહોંચ્યો તો જુઓ તેના પેટમાં જોડકાં બાળકો હતાં.

²⁵ પહેલો જન્મ્યો તે લાલ હતો. તેને આખા શરીરે વાળ હતા, જાણે રુંવાટીવાળું કપડું ન હોય! તેથી તેમણે તેનું નામ એસાવ (વાળવાળો) પાડયું.

²⁶ ત્યાર પછી તેનો ભાઈ એસાવની એડી પકડીને નીકળ્યો. તેનું નામ તેમણે યાકોબ (અર્થાત્ એડી પકડનાર) પાડયું. તેઓ જન્મ્યા ત્યારે ઇસ્હાક 60 વર્ષનો હતો.

²⁷ છોકરા મોટા થયા ત્યારે એસાવ કુશળ શિકારી બન્યો અને તેને વનવગડામાં ફરતા રહેવાનું ગમતું; જ્યારે યાકોબ સ્વભાવે શાંત હતો અને તે તંબુઓમાં સ્થાયી જીવન ગાળતો.

²⁸ ઇસ્હાક એસાવ પર પ્રેમ રાખતો હતો; કારણ, એસાવ જે શિકાર લાવે તેમાંથી તે ખાતો હતો. પણ રિબકા યાકોબ પર પ્રેમ રાખતી હતી.

એસાવ જયેષ્ઠપુત્ર તરીકેનો હક્ક વેચે છે

²⁹ એકવાર યાકોબ શાક રાંધતો હતો. એવામાં એસાવ વનવગડામાંથી આવ્યો. તે ખૂબ ભૂખ્યો થયો હતો.

³⁰ એસાવે યાકોબને કહ્યું, “મને આ લાલ શાકમાંથી થોડું ખાવા દે. મને કકડીને ભૂખ લાગી છે.” તેથી તેનું નામ અદોમ (લાલ)પણ પડયું.

³¹ યાકોબે કહ્યું, “પહેલાં તું મને તારો જયેષ્ઠપુત્ર તરીકેનો હક્ક વેચાતો આપ.”

³² એસાવે કહ્યું, “હું મરવા પડયો છું. જયેષ્ઠપુત્ર તરીકેનો એ મારો હક્ક મને શા કામમાં આવવાનો છે?”

³³ યાકોબે કહ્યું, “તું પહેલાં મારી આગળ સોગંદ ખા.” એટલે તેણે તેની આગળ સોગંદ ખાધા અને જયેષ્ઠપુત્ર તરીકેનો પોતાનો હક્ક યાકોબને વેચી દીધો.

³⁴ પછી યાકોબે એસાવને રોટલી અને મસુરની લાલ દાળ આપ્યાં. એસાવ ખાઈપીને ઊઠયો અને પોતાને રસ્તે પડયો. આમ, એસાવે જયેષ્ઠપુત્ર તરીકેનો પોતાનો હક્ક તુચ્છ ગણ્યો.