હઝકિયેલ 27 - પવિત્ર બાઇબલ C.L.

વહાણસમા તૂર નગર માટે શોકગીત

¹ પ્રભુનો સંદેશ મને મળ્યો:

² “હે મનુષ્યપુત્ર, તું તૂર વિષે એક શોકગીત ગા.

³ તૂર તો મોખરાનું બંદર છે અને સમુદ્રકિનારાની પ્રજાઓ સાથે વેપાર કરે છે. તેને કહે કે પ્રભુ પરમેશ્વર આમ કહે છે: “હે તૂર, તેં તારા સંપૂર્ણ સૌંદર્ય વિષે બડાઈ હાંકી છે.

⁴ તારું નિવાસસ્થાન તો સમુદ્રમાં છે. તારા બાંધનારાઓએ પણ તને સુંદર વહાણ જેવું બનાવ્યું છે.

⁵ તારે માટે તેમણે સનીર ઉર્ફે હેર્મોન પહાડ પરનાં સરુનાં વૃક્ષોનાં કાપેલાં લાકડાં વાપર્યાં હતાં. લબાનોનનાં ગંધતરુમાંથી તેમણે તારો કૂવાથંભ બનાવ્યો હતો.

⁶ તેમણે તારાં હલેસાં બાશાનનાં ઓક વૃક્ષનાં લાકડામાંથી બનાવ્યાં હતાં અને તારું તૂતક સાઇપ્રસમાંથી આણેલા સરુમાંથી બનાવ્યું હતું અને તેને હાથીદાંતથી મઢયું હતું.

⁷ બહુ દૂરથીય ઓળખાઈ જાય તેવાં તારાં સઢ ઇજિપ્તના ભરત ભરેલાં અળસીરેસાનાં કાપડનાં હતાં. જે તારે માટે વજની ગરજ સારતાં હતાં. તારી છત એલીશા બેટોના નીલા તથા જાંબુડિયા કાપડની હતી.

⁸ સિદોન અને આર્વાદ નગરોના રહેવાસીઓ તારાં હલેસાં મારનારા હતા; જ્યારે નિપુણ સુકાનીઓ તારા પોતાના જ માણસો હતા.

⁹ તારી મરામત કરનાર સુથારો ગેબાલના કુશળ કારીગરો હતા. સમુદ્રમાં અવરજવર કરતાં બધાં વહાણોના ખલાસીઓ તારે ત્યાં માલ ખરીદવા આવતા હતા.

¹⁰ ઇરાન, લુદ અને પુટના માણસો તારા લશ્કરમાં યોદ્ધાઓ હતા. તેઓ તારા સૈનિકગૃહોમાં પોતાની ઢાલો અને ટોપાઓ લટકાવતા હતા. તેમને કારણે તારો વૈભવ હતો.

¹¹ આર્વાદના સૈનિકો તારા કોટની ચોકી કરતા હતા અને ગામાદના માણસો તારા બુરજો સાચવતા હતા. તેઓ તારા કોટ પર પોતાની ઢાલો લટકાવતા હતા. તેમણે જ તને સર્વાંગસુંદર બનાવ્યું હતું.

¹² તારા માલની વિપુલતાને લીધે તાર્શિશ સાથે તારો વેપાર હતો અને તારા માલના બદલામાં તું ત્યાંથી રૂપું, લોખંડ, કલાઈ અને સીસું લાવતું.

¹³ ગ્રીસ, તુબાલ અને મેશેખ સાથે તારો વેપાર ચાલતો અને તેઓ ગુલામો અને તાંબાનાં વાસણો આપીને બદલામાં તારો માલ લેતાં.

¹⁴ બેથ-તોગાર્માના લોકો ભારવાહક ઘોડા, લશ્કરી ઘોડા તથા ખચ્ચરો આપીને તારો માલ ખરીદતા.

¹⁵ રોદસના લોકો તારી સાથે વેપાર કરતા હતા. સમુદ્રતટના ઘણા દેશોના લોકો તારા માલના બદલામાં તને હાથીદાંત અને અબનૂસ આપતા હતા.

¹⁶ અરામના લોકો તારો વિવિધ જાતનો માલ ખરીદતા અને બદલામાં તને નીલમ, જાંબુડિયા રંગનું કાપડ, બુટ્ટાદાર વસ્ત્રો, બારીક શણ, પરવાળાં અને માણેક આપતા હતા.

¹⁷ યહૂદા અને ઇઝરાયલના લોકો પણ તારો માલ ખરીદતા અને બદલામાં તને ઘઉં, મધ અને ઓલિવ તેલ તથા ગૂગળ આપતા હતા.

¹⁸ તારા માલની વિપુલતા અને વૈવિયને લીધે દમાસ્ક્સના લોકો તારી સાથે વેપાર કરતા અને બદલામાં તને હેલ્લોનનો દ્રાક્ષાસવ અને સહારનું ઊન આપતા.

¹⁹ દેદાન પ્રદેશના લોકો અને ગ્રીકો સૂતર આપીને તારો માલ લેતા. તેઓ તારા માલના બદલામાં ઘડતરનું લોઢું, દાલીચીની અને તજ પણ આપતા.

²⁰ દેદાનના લોકો ઘોડાના જીન માટેનાં કપડાના બદલામાં તારો માલ ખરીદતા.

²¹ અરબસ્તાનના લોકો અને કેદાર દેશના બધા રાજવીઓ તારી સાથે વેપાર કરતા અને હલવાનો તથા ઘેટાંબકરાંના બદલામાં તારો માલ ખરીદતા.

²² શેબા તથા રામાના વેપારીઓ સર્વોત્તમ મસાલા, મૂલ્યવાન રત્નો, સોનું તથા રૂપું આપીને તારો માલ લેતા.

²³ હારાન, કાને તથા એદેન શહેરો અને શેબા, આશ્શૂર તથા ખિલ્માદના વેપારીઓ તારી સાથે વેપાર કરતા હતા.

²⁴ તેઓ તને કીમતી કાપડ, જાંબુડિયા રંગનું કાપડ, ભરતકામ, જાજરમાન રંગબેરંગી ગાલીચા અને ગૂંથેલાં મજબૂત દોરડાં વેચતા.

²⁵ તાર્શિશનાં વિશાળ માલવાહક વહાણોના કાફલામાં તારો માલ લઈ જવાતો. તું સમુદ્રમાં ફરતા વહાણ સમાન હતું કે જેમાં ભરચક માલસામાન ભરવામાં આવ્યો હોય.

²⁶ તારા હલેસાંબાજો તને ભરદરિયે લઈ ગયા અને ત્યાં પવને તને કાંઠાથી દૂર મધદરિયે ભાંગી નાંખ્યું.

²⁷ તું ભાંગી ગયું તે દિવસે તારી ધનસંપત્તિ, તારી બધી વેપારસામગ્રી, તારા સર્વ ખલાસીઓ અને સુકાનીઓ, મરામત કરનાર કારીગરો અને વેપારીઓ અને બધા સૈનિકો દરિયામાં ડૂબી ગયા.

²⁸ ડૂબતા ખલાસીઓની ચીસોના પડઘાથી કિનારા ધ્રૂજી ઊઠયા.

²⁹ હલેસાંબાજો, ખલાસીઓ અને સુકાનીઓ પોતપોતાનાં વહાણોમાંથી ઊતરી પડીને કિનારે ઊભા રહ્યા.

³⁰ તેઓ સૌ તારે માટે પોક મૂકીને વિલાપ કરે છે, પોતાના માથાં પર ધૂળ નાખે છે અને રાખમાં આળોટે છે.

³¹ તેઓ તારા વિનાશને લીધે પોતાનાં માથાં મૂંડાવે છે અને ટાટનાં વસ્ત્રો પહેરીને હૈયાફાટ આક્રંદ કરે છે.

³² તેઓ તારે માટે વિલાપ કરે છે અને શોકગીત ગાય છે. સમુદ્રમાં શાંત થઈ પોઢી ગયેલા તૂરને કોની સાથે સરખાવી શકાય?

³³ તારી વેપારસામગ્રી સમુદ્રો વટાવી દેશવિદેશ પહોંચતી ત્યારે તું ઘણી પ્રજાઓને સંતુષ્ટ કરતું. તારા વિપુલ માલથી રાજાઓ ધનાઢય બનતા.

³⁴ હવે સાગરમાં તારા ભૂકેભૂકા બોલી ગયા છે. તું ડૂબી ગયું છે. તારી સાથે તારો સર્વ માલસામાન અને તારાં બધાં માણસો સમુદ્રમાં તળિયે ડૂબી ગયાં છે.

³⁵ તારી પાયમાલી જોઈને દરિયાકાંઠાના પ્રદેશોના લોકો સ્તબ્ધ થઈ ગયા છે. રાજાઓ પણ ભયભીત થઈ ગયા છે ને તેમના ચહેરા પર ગભરાટ છવાયો છે.

³⁶ તું કાયમને માટે નાશ પામ્યું છે. તારો ભયંકર નાશ જોઈને આખી દુનિયાના વેપારીઓ ગભરાઈ ઊઠયા છે.”