નિર્ગમન 40 - પવિત્ર બાઇબલ C.L.

મુલાકાતમંડપની સ્થાપના અને સમર્પણ વિધિ

¹ પ્રભુએ મોશેને કહ્યું,

² પ્રથમ માસના પ્રથમ દિવસે મુલાકાતમંડપ ઊભો કરજે.

³ તે મંડપમાં સાક્ષ્યલેખ રાખેલી કરારપેટી મૂકજે અને તેને પડદાથી ઢાંકી દેજે. મેજ લાવીને તેના પર તેનાં સર્વ સાધનો ગોઠવજે.

⁴ વળી, દીપવૃક્ષ લાવીને તેના પર દીવા મૂકજે.

⁵ સોનાની ધૂપવેદીને તું સાક્ષ્યલેખ રાખેલી કરારપેટી આગળ મૂકજે, અને મંડપના પ્રવેશદ્વાર આગળ પડદો લટકાવજે.

⁶ મંડપની આગળ બલિદાન માટે યજ્ઞવેદી મૂકજે.

⁷ મંડપ તથા યજ્ઞવેદીની વચમાં જળકુંડ મૂકજે અને તેને પાણીથી ભરજે.

⁸ પછી આસપાસનું આંગણું તૈયાર કરીને તેના પ્રવેશદ્વાર પર પડદો લટકાવજે.

⁹ “પછી તમે મંડપનું તેનાં સર્વ સાધનો સહિત સમર્પણ કરજો. પવિત્ર તેલ વડે તેનો અભિષેક કરીને તેનું સમર્પણ કરજો એટલે તે પવિત્ર થશે.

¹⁰ પછી વેદીનો તથા તેનાં સર્વ સાધનોનો અભિષેક કરીને તેમનું સમર્પણ કરજો, એટલે તે સંપૂર્ણ પવિત્ર થશે.

¹¹ તે જ રીતે જળકુંડ અને તેની બેઠકનું પણ સમર્પણ કરજો.

¹² “આરોન અને તેના પુત્રોને મંડપના પ્રવેશદ્વાર આગળ લાવીને તેમને વિધિગત રીતે સ્નાન કરવા જણાવ.

¹³ યજ્ઞકારનાં વસ્ત્રો પહેરાવીને આરોનનો અભિષેક કર અને એ રીતે તેનું સમર્પણ કર; જેથી તે યજ્ઞકાર તરીકે મારી સેવા બજાવે.

¹⁴ તેના પુત્રોને લાવીને તેમના ડગલા પહેરાવ.

¹⁵ પછી જેવી રીતે તેમના પિતાનો અભિષેક કર્યો તે જ રીતે તેમનો પણ અભિષેક કર; જેથી તેઓ યજ્ઞકાર તરીકે મારી સેવા બજાવે. આ અભિષેક દ્વારા તેઓ અને તેમના વંશજોને પેઢી દરપેઢી કાયમી ધોરણનું યજ્ઞકારપદ પ્રાપ્ત થશે.”

¹⁶ મોશેએ સઘળું પ્રભુની આજ્ઞા પ્રમાણે કર્યું.

¹⁷ તેથી તેમના ઇજિપ્તમાંથી નીકળ્યાના બીજા વર્ષના પ્રથમ માસના પ્રથમ દિવસે મુલાકાતમંડપની સ્થાપના કરવામાં આવી.

¹⁸ મોશેએ મંડપની કૂંભીઓ બેસાડી, તેનાં પાટિયાં ઊભાં કર્યાં, તેની વળીઓ બેસાડી અને તેના સ્તંભો ઊભા કર્યા.

¹⁹ પ્રભુની આજ્ઞા પ્રમાણે તેણે મંડપ પર આચ્છાદન લગાડયું અને તેના પર બહારનું આચ્છાદન ઢાંકયું.

²⁰ પછી તેણે સાક્ષ્યલેખની બન્‍ને શિલાપાટીઓ લઈને કરારપેટીમાં મૂકી. તેના દાંડાઓ તેના કડાંઓમાં પરોવ્યા અને કરારપેટી પર તેનું ઢાંકણ ઢાંકયું.

²¹ પછી તેણે સાક્ષ્યલેખની કરારપેટી મંડપમાં મૂકી અને તેના પર આડશનો પડદો ઢાંકયો. તેણે એ બધું પ્રભુની આજ્ઞા પ્રમાણે જ કર્યું.

²² તેણે મંડપની અંદર આડશના પડદાની બહાર ઉત્તર દિશામાં મેજ મૂકી.

²³ અને તેના પર અર્પિત રોટલી મૂકી. તેણે એ પ્રભુની આજ્ઞા પ્રમાણે જ કર્યું.

²⁴ તેણે મંડપની અંદર દક્ષિણ દિશામાં મેજની સામેની બાજુએ દીપવૃક્ષ મૂકયું.

²⁵ અને પ્રભુની સમક્ષ તેણે દીવા સળગાવ્યાં. તેણે એ પ્રભુની આજ્ઞા પ્રમાણે જ કર્યું.

²⁶ તેણે મંડપની અંદર પડદાની આગળ સોનાની ધૂપવેદી મૂકી

²⁷ અને સુગંધીદાર ધૂપ સળગાવ્યો. તેણે એ પ્રભુની આજ્ઞા પ્રમાણે જ કર્યું.

²⁸ તેણે મંડપના પ્રવેશદ્વાર આગળ પડદો લટકાવ્યો.

²⁹ અને તે પડદાની આગળ બલિદાન ચડાવવાની યજ્ઞવેદી મૂકી. તે વેદી પર તેણે દહનબલિ અને ધાન્ય-અર્પણો ચડાવ્યાં. તેણે એ પ્રભુની આજ્ઞા પ્રમાણે કર્યું.

³⁰ તેણે મંડપ અને વેદીની વચ્ચે જળકુંડ મૂકયો અને તેને પાણીથી ભર્યો.

^31-32 મોશે, આરોન અને આરોનના પુત્રો જ્યારે જ્યારે મંડપમાં અથવા વેદી પાસે જતા ત્યારે તે જળકુંડમાં પોતાના હાથપગ ધોતા. તેમણે એ પ્રભુની આજ્ઞા પ્રમાણે જ કર્યું.

³³ મોશેએ મંડપની આસપાસ આંગણું બનાવ્યું અને તેમાં વેદી મૂકી તથા આંગણાના પ્રવેશદ્વાર પર પડદો લટકાવ્યો. એમ તેણે બધું કામ પૂર્ણ કર્યું.

મુલાકાતમંડપ પર વાદળ

³⁴ પછી વાદળે આવીને મંડપને ઢાંકી દીધો અને પ્રભુની હાજરીના ગૌરવથી મંડપ ભરાઈ ગયો.

³⁵ એને લીધે મોશે મંડપમાં જઈ શકાયો નહિ.

³⁶ જ્યારે મંડપ પરથી વાદળ ખસી જતું ત્યારે જ ઇઝરાયલીઓ પોતાની છાવણી બીજે સ્થળે લઈ જતા.

³⁷ જ્યાં સુધી મંડપ પર વાદળ રહેતું ત્યાં સુધી તેઓ પોતાની છાવણી તે સ્થળેથી ખસેડતા નહિ.

³⁸ પોતાના સમગ્ર પ્રવાસ દરમ્યાન સર્વ ઇઝરાયલીઓ પ્રભુના વાદળને મુલાકાતમંડપ પર દિવસ દરમ્યાન સ્થિર રહેતું અને રાત્રે તેમાં અગ્નિ સળગતો જોઈ શક્તા.