નિર્ગમન 27 - પવિત્ર બાઇબલ C.L.

યજ્ઞવેદી

¹ “તારે બાવળના લાકડાની વેદી બનાવવી. તે વેદી ચોરસ હોય; તેની લંબાઈ ચાર મીટર, પહોળાઈ 2.2 મીટર અને ઊંચાઈ 1.3 મીટર હોય.

² તેના ચાર ખૂણા પર વેદીની સાથે એકરૂપ હોય તેવાં શિંગ બનાવવાં. આખી વેદી તાંબાથી મઢવી.

³ વેદીની રાખ માટે ભસ્મપાત્રો, પાવડીઓ, કટોરા, ચીપિયા અને અંગારપાત્રો બનાવવાં. આ સર્વ સાધનો તાંબાનાં બનાવવાં.

⁴ તાંબાની જાળી પણ બનાવવી અને જાળીના ચારે ખૂણાએ તાંબાનાં ચાર કડાં લગાડવાં.

⁵ તાંબાની જાળીને વેદીની ધાર નીચે એવી રીતે મૂકવી કે તે વેદીના મધ્યભાગ સુધી પહોંચે.

⁶ વેદી ઊંચકવા માટેના દાંડા બાવળનાં લાકડાંના બનાવવા અને તેમને તાંબાથી મઢવા.

⁷ જ્યારે વેદી ઊંચકવામાં આવે ત્યારે વેદીની બાજુઓનાં એ કડાંમાં પરોવવા.

⁸ વેદી પાટિયાંની બનાવવી અને તેને પોલાણવાળી રાખવી. મેં તને પર્વત પર જે નમૂનો બતાવ્યો તે પ્રમાણે જ એ બનાવવી.

મુલાકાતમંડપનું આંગણું

⁹ “તારે મુલાકાતમંડપ માટે ઝીણા કાંતેલા અળસી રેસાના કાપડમાંથી પડદાઓનું આંગણું બનાવવું. દક્ષિણ બાજુના પડદા 44 મીટર લાંબા

¹⁰ અને તાંબાની વીસ કૂંભીઓમાં ગોઠવેલા તાંબાના વીસ સ્તંભો પર લટકાવેલા હોય. તેની કડીઓ અને સળિયાઓ ચાંદીનાં હોવા જોઈએ.

¹¹ આંગણાની ઉત્તર બાજુ માટે પણ એ જ પ્રમાણે કરવું.

¹² પશ્ર્વિમ બાજુના પડદા 22 મીટર લાંબા હોય અને તેને માટે દસ કૂંભીઓમાં ગોઠવેલા દસ સ્તંભ હોય.

¹³ પૂર્વ બાજુએ પ્રવેશદ્વાર આગળ આંગણું 22 મીટર પહોળું રાખવું.

^14-15 પ્રવેશ દ્વારની બન્‍ને બાજુએ 6.6 મીટરના પડદા હોય અને તેને માટે ત્રણ સ્તંભ અને ત્રણ કૂંભીઓ રાખવાં.

¹⁶ આંગણાના પ્રવેશદ્વાર માટેનો પડદો 9 મીટર લાંબો અને વાદળી, જાંબુડી અને ઘેરા લાલ રેસાનો તથા ઝીણા કાંતેલા અળસી રેસાનો તથા ભરત ભરેલો હોવો જોઈએ. તે ચાર સ્તંભોમાં લટકાવેલો હોય. આ સ્તંભો ચાર કૂંભીઓમાં ગોઠવેલા હોય. તેની કડીઓ ચાંદીની અને કૂંભીઓ તાંબાની બનાવવી.

¹⁷ આંગણાની આસપાસના બધા સ્તંભો ચાંદીના સળિયાથી જોડાયેલા હોય. તેની કડીઓ ચાંદીની અને કૂંભીઓ તાંબાની બનાવવી.

¹⁸ આંગણું 44 મીટર લાંબું, 22 મીટર પહોળું અને 2.2 મીટર ઊંચુ હોવું જોઈએ. તેના પડદા અળસી રેસાના બારીક વસ્ત્રના અને તેની કૂંભીઓ તાંબાની હોય.

¹⁹ મંડપમાં વપરાતા સર્વ સાધનો તથા મંડપ અને તેના આંગણાના બધા ખીલાઓ તાંબાના બનાવેલા હોવા જોઈએ.

દીવાની કાળજી

²⁰ “તું ઇઝરાયલીઓને તારી પાસે દીવાઓ માટે પીલેલું શુદ્ધ ઓલિવ તેલ લાવવાની સૂચના આપ; જેથી દીવા રોજ સાંજે હમેશાં સળગાવી શકાય.

²¹ મુલાકાતમંડપમાં સાક્ષ્યલેખની કરારપેટીની સામેના પડદાની બહારની બાજુએ આરોન તથા તેના પુત્રો આ દીવા મૂકે; ત્યાં મારી સન્મુખ સાંજથી સવાર સુધી એ દીવા સતત સળગતા રાખવા. ઇઝરાયલીઓ તથા તેમના વંશજો સદાને માટે આ આજ્ઞા પાળે.