નિર્ગમન 26 - પવિત્ર બાઇબલ C.L.

મુલાકાતમંડપ

¹ “મંડપના અંદરના ભાગ માટે વાદળી, જાંબુડી અને ઘેરા લાલ રંગના રેસામાંથી તેમજ ઝીણા કાંતેલા અળસી રેસામાંથી પડદા બનાવવા. પડદા પર કરુબોની આકૃતિઓનું ભરતકામ કરવું.

² દરેક પડદો એક જ માપનો એટલે, બાર મીટર લાંબો, અને બે મીટર પહોળો બનાવવો.

³ પાંચ પડદા એકબીજા સાથે સીવીને એક સમૂહ બનાવવો અને એ જ પ્રમાણે બાકીના પાંચ પડદા પણ સીવવા.

⁴ દરેક સમૂહની બહારની કિનાર પર વાદળી રંગના કાપડમાંથી નાકાં બનાવવાં.

⁵ પ્રથમ સમૂહના પ્રથમ પડદા પર પચાસ નાકાં અને બીજા સમૂહના છેલ્લા પડદા પર પચાસ નાકાં બનાવવાં. નાકાં એકબીજાની સામસામે આવે એ રીતે બનાવવાં.

⁶ આ બન્‍ને સમૂહોને જોડી દઈ એક સળંગ પડદો બનાવવા સોનાની પચાસ કડીઓ બનાવવી.

⁷ “તારે બકરાંના વાળમાંથી બનાવેલ કાપડના અગિયાર પડદામાંથી મંડપનું આચ્છાદન બનાવવું.

⁸ આ અગિયારે પડદા એક જ માપના એટલે તેર મીટર લાંબા, અને બે મીટર પહોળા બનાવવા.

⁹ આમાંથી પાંચ પડદા એક સાથે સીવીને એક સમૂહ બનાવવો અને બાકીના છ પડદામાંથી બીજો સમૂહ બનાવવો. છઠ્ઠો પડદો મંડપના આગલા ભાગમાં બેવડો વાળી દેવો.

¹⁰ પ્રથમ સમૂહના છેલ્લા પડદાની બહારની કિનાર પર પચાસ નાકાં અને બીજા સમૂહના પહેલા પડદાની બહારની કિનાર પર પચાસ નાકાં બનાવવા.

¹¹ તાંબાની પચાસ કડીઓ બનાવવી અને એમને નાકાંમાં પરોવીને પડદાના બન્‍ને સમૂહો જોડી દઈ આખા મંડપનું આચ્છાદન બનાવવું.

¹² વધારાનો અડધો ટુકડો મંડપની પાછળના ભાગમાં લટક્તો રાખવો.

¹³ મંડપની બન્‍ને બાજુએ પચાસ સેન્ટીમીટર જેટલો વધારાનો પડદો મંડપને ઢાંકી દેવા બન્‍ને બાજુએ લટક્તો રાખવો.

¹⁴ “તારે બીજાં બે આચ્છાદન પણ બનાવવાં: એક આચ્છાદન ઘેટાંના લાલ રંગેલાં ચામડામાંથી બનાવવું. બીજું આચ્છાદન ઉત્તમ પ્રકારના મુલાયમ ચામડામાંથી બનાવવું અને તે ઉપરના આચ્છાદન તરીકે વપરાય.

¹⁵ “મંડપ માટે બાવળનાં લાકડાનાં પાટિયાં બનાવી ઊભા મૂકવાં.

¹⁶ દરેક પાટિયું 4 મીટર લાંબું અને 66 સેન્ટીમીટર પહોળું બનાવવું.

¹⁷ વળી, દરેક પાટિયામાં એકબીજાને સમાન્તર એવાં સરખા માપનાં બે સાલ હોવાં જોઈએ. બધાં પાટિયાંમાં આવાં સાલ હોવાં જોઈએ.

¹⁸ દક્ષિણ બાજુ માટે વીસ પાટિયાં બનાવવાં

¹⁹ અને તેમની નીચે મૂકવા ચાંદીની ચાળીસ કૂંભીઓ બનાવવી. દરેક પાટિયાનાં બે સાલ માટે બે કૂંભીઓ બનાવવી.

²⁰ મંડપની ઉત્તર બાજુ માટે પણ વીસ પાટિયાં રાખવાં

²¹ અને દરેક પાટિયાં નીચે બે એમ ચાંદીની ચાળીસ કૂંભીઓ બનાવવી.

²² મંડપની પાછળની બાજુએ એટલે પશ્ર્વિમ બાજુએ છ પાટિયાં રાખવાં

²³ અને ખૂણાઓ માટે બે પાટિયાં બનાવવાં.

²⁴ ખૂણાનાં પાટિયાં નીચેથી ઉપર સુધી સળંગ જોડાયેલાં હોવાં જોઈએ. બન્‍ને ખૂણા માટે એ રીતે પાટિયાં બનાવવાં.

²⁵ આમ, ચાર ખૂણા માટે આઠ પાટિયાં અને દરેક પાટિયાં નીચે બે એમ ચાંદીની સોળ કૂંભીઓ હોય.

²⁶ “તારે બાવળના લાકડાંની પંદર વળીઓ બનાવવી. મંડપના એક બાજુનાં પાટિયાં માટે પાંચ,

²⁷ તેની બીજી બાજુનાં પાટિયાં માટે પાંચ અને મંડપની પાછળની એટલે પશ્ર્વિમ બાજુના પાટિયાં માટે પાંચ વળીઓ બનાવવી.

²⁸ વચલી વળી પાટિયાંની મધ્યમાં મંડપના એક છેડાથી બીજા છેડા સુધી આવે. પાટિયાં સોનાથી મઢી લેવાં અને તેમાં વળીઓ પરોવવા સોનાનાં કડાં બનાવવાં.

²⁹ વળીઓ પણ સોનાથી મઢી લેવી.

³⁰ મેં તને પર્વત પર જે નમૂનો બતાવ્યો તે જ પ્રમાણે મંડપ ઊભો કરવાનો છે.

³¹ “તારે વાદળી, જાંબુડી અને ઘેરા લાલ રંગના રેસામાંથી અને ઝીણા કાંતેલા અળસી રેસામાંથી પડદો બનાવવો અને તેના પર કરુબોની આકૃતિઓનું ભરતકામ કરવું.

³² તે પડદાને બાવળનાં લાકડાનાં ચાર થાંભલા પર લટકાવવો. એ થાંભલા સોનાથી મઢી લેવા. તેમની કડીઓ પણ સોનાની બનાવવી. આ થાંભલા ચાંદીની કૂંભીઓમાં બેસાડવા.

³³ મંડપના આચ્છાદનમાં બેસાડેલી કડીઓની હાર નીચે પડદો લટકાવવો. સાક્ષ્યલેખની બે શિલાપાટીઓ સંચિત કરારપેટી આ પડદાની પાછળ મૂકવી. આ પડદો પરમ પવિત્રસ્થાનને પવિત્રસ્થાનથી અલગ પાડશે.

³⁴ સાક્ષ્યલેખની કરારપેટીને દયાસનથી ઢાંકી દેવી.

³⁵ પરમ પવિત્રસ્થાનની બહાર ઉત્તર તરફ મેજ મૂકવું અને દક્ષિણ તરફ દીપવૃક્ષ મૂકવું.

³⁶ “મંડપના પ્રવેશદ્વાર માટે વાદળી, જાંબુડી અને ઘેરા લાલ રંગના રેસામાંથી અને ઝીણા કાંતેલા અળસી રેસામાંથી ભરત ભરેલો પડદો બનાવવો.

³⁷ આ પડદા માટે સોનાથી મઢેલ બાવળના લાકડાના પાંચ થાંભલા બનાવવા. તેની કડીઓ સોનાની હોવી જોઈએ. વળી, આ થાંભલા માટે તાંબાની પાંચ કૂંભીઓ બનાવવી.”