નિર્ગમન 25 - પવિત્ર બાઇબલ C.L.

મુલાકાતમંડપ માટે ભેટો

¹ પ્રભુએ મોશેને કહ્યું,

² “તું મારે માટે ઇઝરાયલીઓને ભેટ લાવવા જણાવ. દરેક માણસ રાજીખુશીથી જે કંઈ આપે તે તમારે સ્વીકારવું.

³ તમારે આટલી વસ્તુઓની ભેટ ઉઘરાવવી: સોનું, રૂપું, તાંબુ; વાદળી, જાંબુડી અને ઘેરા લાલ રંગના રેસા,

⁴ અળસી રેસાનું ઝીણું કાંતેલું કાપડ, બકરાના વાળ,

⁵ ઘેટાંનાં ચામડાં, ઉત્તમ મુલાયમ ચામડાં, બાવળનાં લાકડાં,

⁶ દીવાઓ માટે તેલ, અભિષેકના તેલ માટે તથા સુગંધીદાર ધૂપ માટે સુગંધીદ્રવ્યો,

⁷ મુખ્ય યજ્ઞકારના એફોદમાં અને તેના ઉરપત્રમાં જડવા માટે ગોમેદના પથ્થરો અને બીજાં રત્નો.

⁸ લોકો મારે માટે પવિત્ર નિવાસસ્થાન બનાવે, જેથી હું તેમની વચમાં રહું.

⁹ હું તને જે નમૂનો દેખાડું તે જ પ્રમાણે તારે મંડપ તથા તેની સર્વ સાધનસામગ્રી બનાવવી.

કરારપેટી

¹⁰ “તારે બાવળના લાકડામાંથી 110 સેન્ટીમીટર લાંબી, 66 સેન્ટીમીટર પહોળી અને 66 સેન્ટીમીટર ઊંચી કરારપેટી બનાવવી.

¹¹ તેને અંદરથી તેમજ બહારથી શુદ્ધ સોના વડે મઢી લેવી અને તેની ફરતે સોનાની કિનાર બનાવવી.

¹² તેને ઊંચકવા માટે સોનાનાં ચાર કડાં ઢાળીને બનાવવાં. તે કડાંને કરારપેટીના ચાર પાયા સાથે જોડવાં; જેથી દરેક બાજુએ બે કડાં રહે.

¹³ તેને ઊંચકવા માટે બાવળના લાકડાના દાંડા બનાવીને તેમને સોનાથી મઢી લેવા,

¹⁴ અને દાંડા કરારપેટીની બાજુમાંના કડાંમાં પરોવી દેવા.

¹⁵ આ દાંડા કડાંમાં જ રહેવા દેવા અને તેમને બહાર કાઢવા નહિ.

¹⁶ પછી હું તને આજ્ઞા લખેલી જે બે શિલાપાટીઓ આપું તે સાક્ષ્યલેખની પાટીઓ કરારપેટીમાં મૂકવી.

¹⁷ “તારે 110 સેન્ટીમીટર લાંબું, અને 66 સેન્ટીમીટર પહોળું સોનાનું ઢાંકણ, એટલે દયાસન બનાવવું.

¹⁸ વળી, નક્કર સોનાના બે કરુબો બનાવવા.

¹⁹ દયાસનના બન્‍ને છેડા માટે એકએક કરુબ બનાવવો. આ ઢાંકણ અને કરુબો જાણે એક વસ્તુ હોય એ રીતે સળંગ બનાવવાં.

²⁰ કરુબોનાં મુખ એકબીજાની સામસામે અને દયાસનના મધ્યભાગ તરફ રાખવાં. વળી, તેમની પાંખો દયાસન પર આચ્છાદન થાય એ રીતે ઊંચે ફેલાયેલી રાખવી.

²¹ સાક્ષ્યલેખની બે શિલાપાટીઓ કરારપેટીમાં મૂકીને તેના પર દયાસન અર્થાત્ ઢાંકણ ઢાંકી દેવું.

²² હું તને ત્યાં મળીશ અને દયાસન ઉપરથી સાક્ષ્યપેટી પરના બે કરુબો વચ્ચેથી હું તને ઇઝરાયલીઓ માટેના મારા સર્વ નિયમો આપીશ.

અર્પિત રોટલી માટેનું મેજ

²³ “તારે બાવળના લાકડામાંથી 88 સેન્ટીમીટર લાંબી, 44 સેન્ટીમીટર પહોળી અને 66 સેન્ટીમીટર ઊંચી મેજ બનાવવી.

²⁴ તેને શુદ્ધ સોનાથી મઢી લેવી અને તેની ફરતે શુદ્ધ સોનાની કિનાર બનાવવી.

²⁵ તેની આસપાસ 75 મિલિમીટર પહોળી ધાર બનાવીને તેની ફરતે સોનાની કિનાર મૂકવી.

²⁶ તેને ઊંચકવા માટે સોનાનાં ચાર કડાં બનાવીને તેમને ચાર ખૂણે પાયાઓ સાથે જડી દેવાં.

²⁷ મેજ ઊંચકવાના દાંડા પરોવવાનાં આ કડાં મેજની ધારની નજીક મૂકવાં.

²⁸ બાવળના લાકડામાંથી દાંડા બનાવીને તેમને સોનાથી મઢી લેવા.

²⁹ વળી, થાળીઓ, વાટકાઓ, બરણીઓ અને દ્રાક્ષાસવનાં પેયાર્પણો માટે વાપરવાનાં પ્યાલાં બનાવવાં. આ સર્વ વસ્તુઓ શુદ્ધ સોનામાંથી બનાવવી.

³⁰ મેજ કરારપેટી આગળ મૂકવી અને તેના પર મને અર્પેલી પવિત્ર રોટલી હમેશાં મૂકેલી રાખવી.

દીપવૃક્ષ

³¹ “તારે શુદ્ધ સોનાનું દીપવૃક્ષ બનાવવું. તેની બેઠક તથા તેનો દાંડો સોનામાંથી ઘડતરકામ કરી બનાવવાં. તેનાં શોભાનાં ફૂલ, કળીઓ અને પાંખડીઓ તેની સાથે સળંગ જોડાયેલાં હોવાં જોઈએ.

³² દરેક બાજુએ ત્રણ એ રીતે તેની બાજુઓમાંથી છ શાખાઓ નીકળતી હોવી જોઈએ.

³³ તેને દરેક શાખા પર બદામના ફૂલના આકારની કળીઓ અને પાંખડીઓવાળાં શોભાનાં ત્રણ ફૂલ હોય.

³⁴ દીપવૃક્ષના મુખ્ય દાંડા પર બદામના ફૂલના આકારની કળીઓ અને પાંખડીઓ સહિતનાં શોભાનાં ચાર ફૂલ હોય.

³⁵ શાખાઓની ત્રણેય જોડમાં દરેક જોડ નીચે એક એક કળી હોય.

³⁶ કળીઓ, શાખાઓ અને આખું દીપવૃક્ષ સોનામાંથી ઘડેલું અને સળંગ હોવું જોઈએ.

³⁷ વળી, દીપવૃક્ષ માટે સાત દીવા બનાવવા અને દીપવૃક્ષની મોખરે પ્રકાશ પડે એ રીતે તેમને ગોઠવવા.

³⁸ તેનાં ચીપિયા અને તાસકો પણ શુદ્ધ સોનાનાં બનાવવાં.

³⁹ દીપવૃક્ષ તથા તેનાં સર્વ સાધનો બનાવવા માટે 35 કિલોગ્રામ શુદ્ધ સોનું વાપરવું.

⁴⁰ મેં તને પર્વત પર જે નમૂનો બતાવ્યો હતો તે પ્રમાણે જ એ બધું બનાવવામાં આવે તેની કાળજી રાખવી.