પુનર્નિયમ 34 - પવિત્ર બાઇબલ C.L.

મોશેનું મૃત્યુ

¹ પછી મોશે મોઆબની તળેટીમાંથી યરીખો નગરની પૂર્વે આવેલ નબો પર્વતના પિસ્ગા નામના શિખર પર ચડયો અને ત્યાંથી પ્રભુએ તેને સમગ્ર દેશ દેખાડયો: એટલે, ઉત્તરે છેક દાન સુધી ગિલ્યાદનો આખો પ્રદેશ,

² નાફતાલીનો આખો પ્રદેશ, એફ્રાઈમ તથા મનાશ્શાના પ્રદેશો, પશ્ર્વિમે છેક ભૂમધ્ય સમુદ્ર સુધી યહૂદાનો આખો પ્રદેશ,

³ દક્ષિણનો નેગેબ વિસ્તાર, ખજૂરીઓના નગર યરીખોના ખીણપ્રદેશથી છેક સોઆર નગર સુધીના પ્રદેશ તેણે જોયા.

⁴ પ્રભુએ મોશેને કહ્યું, “આ દેશ વિષે મેં અબ્રાહામ, ઇસ્હાક અને યાકોબ આગળ શપથ લીધા હતા કે હું તે તેમના વંશજોને આપીશ. મેં તને તે દેશ નજરોનજર દેખાડયો છે પણ યર્દન પાર કરીને તું ત્યાં જવા પામશે નહિ.”

⁵ તેથી પ્રભુના કહ્યા પ્રમાણે પ્રભુનો સેવક મોશે ત્યાં મોઆબ દેશમાં મૃત્યુ પામ્યો,

⁶ અને મોઆબ દેશના બેથ-પયોર નગરની સામે આવેલા ખીણપ્રદેશમાં તેને દફનાવવામાં આવ્યો, પણ આજ સુધી તેની કબર વિષે કોઈ જાણતું નથી.

⁷ મૃત્યુ સમયે મોશેની ઉંમર એક્સો વીસ વર્ષની હતી, છતાં તેની આંખ ઝાંખી પડી નહોતી કે તેની શક્તિ ઓસરી નહોતી.

⁸ ઇઝરાયલી લોકોએ મોઆબના સપાટ પ્રદેશમાં ત્રીસ દિવસ સુધી મોશે માટે શોક પાળ્યો. પછી મોશે માટે શોકનો સમય પૂરો થયો.

⁹ નૂનનો પુત્ર યહોશુઆ ઈશ્વરીય જ્ઞાનથી ભરપૂર હતો; કારણ, મોશેએ તેને શિરે હાથ મૂકી તેને પોતાના અનુગામી તરીકે નીમ્યો હતો. ઇઝરાયલી લોકો તેને આધીન થયા અને એમ પ્રભુએ મોશે દ્વારા તેમને આપેલી આજ્ઞાઓનું પાલન કર્યું.

¹⁰ ઇઝરાયલમાં મોશે જેવો બીજો કોઈ સંદેશવાહક ઊભો થયો નથી; પ્રભુએ મોશેને પોતાનો પ્રત્યક્ષ પરિચય આપ્યો હતો.

¹¹ મોશેએ ઇજિપ્ત દેશમાં ફેરોની, અધિકારીઓની અને તેના સમગ્ર દેશની વિરુધ જે ચમત્કારો અને અજાયબ કાર્યો કર્યાં તેવાં કાર્યો બીજા કોઈ સંદેશવાહકે કર્યા નથી.

¹² તે જ પ્રમાણે મોશેએ સમગ્ર ઇઝરાયલની સમક્ષ જે મહાન અને પ્રતાપી કાર્યો કર્યા તેવાં કાર્યો પણ બીજા કોઈ સંદેશવાહકે કર્યાં નથી.