૨ કાળવૃત્તાંત 17 - પવિત્ર બાઇબલ C.L.

યહોશાફાટ રાજગાદીએ

¹ યહોશાફાટ તેના પિતા આસાની જગાએ રાજા થયો, અને તેણે ઇઝરાયલની વિરુદ્ધ પોતાની સત્તા સંગીન બનાવી.

² તેણે યહૂદિયાનાં કિલ્લેબંધીવાળાં નગરોમાં, યહૂદિયાના ગ્રામ્ય વિસ્તારોમાં અને એફ્રાઈમના પ્રદેશમાં તેના પિતાએ જીતેલાં નગરોમાં લશ્કરી દળો ગોઠવ્યાં.

³ પ્રભુએ યહોશાફાટને આશીર્વાદ આપ્યો, કારણ, તે તેના પિતાના શરૂઆતના જીવનને અનુસર્યો અને બઆલની મૂર્તિઓની ભક્તિ કરી નહિ.

⁴ તેણે પોતાના પૂર્વજોના ઈશ્વર પ્રત્યે નિષ્ઠા દાખવી. વળી, ઇઝરાયલી રાજાઓનું અનુસરણ નહિ કરતાં તે ઈશ્વરની આજ્ઞા પ્રમાણે વર્ત્યો.

⁵ પ્રભુએ યહોશાફાટને યહૂદિયાના રાજ્ય પર પૂરો અંકુશ આપ્યો અને સઘળા લોકો તેને માટે ભેટસોગાદો લાવતા, જેથી તે સમૃદ્ધ અને ખૂબ જ સન્માનનીય બન્યો.

⁶ પ્રભુની સેવા કરવામાં તેણે ભારે ઉત્સાહ દાખવ્યો અને તેણે યહૂદિયામાંથી પૂજાનાં સર્વ ઉચ્ચસ્થાનો અને અશેરા દેવીનાં પ્રતીકોનો સમૂળગો નાશ કર્યો.

⁷ તેથી પોતાના અમલને ત્રીજે વર્ષે તેણે યહૂદિયાનાં નગરોમાં શિક્ષણ આપવા માટે બેનહાઈલ, ઓબાદ્યા, ઝખાર્યા, નાથાનાએલ અને મીખાયા અધિકારીઓને મોકલ્યા.

⁸ તેમની સાથે શમાયા, નથાન્યા, ઝબાદ્યા, અસાહેલ, શમીરામોથ, યહોનાથાન, અદોનિયા, ટોબિયા અને ટોબ અદોનિયા એ નવ લેવીઓ તથા એલિશામા અને યહોરામ એ બે યજ્ઞકારો હતા.

⁹ તેઓ પ્રભુના નિયમશાસ્ત્રનું પુસ્તક લઈને યહૂદિયાનાં બધાં નગરોમાં ગયા અને લોકોને શિક્ષણ આપ્યું.

યહોશાફાટની મહાનતા

¹⁰ આથી યહૂદિયાની આસપાસનાં સર્વ રાજ્યો પ્રભુથી ડરવા લાગ્યાં અને તેમણે યહોશાફાટ સામે લડાઈ કરવાની હિંમત કરી નહિ.

¹¹ કેટલાક પલિસ્તીઓ યહોશાફાટ પાસે મોટા પ્રમાણમાં ચાંદી અને બીજી ભેટો લાવ્યા, તો કેટલાક આરબો તેને માટે સાત હજાર સાતસો ઘેટાં અને સાત હજાર સાતસો બકરા લાવ્યા.

¹² આમ, યહોશાફાટ વધારે ને વધારે બળવાન થતો ગયો. સમસ્ત યહૂદિયામાં તેણે કિલ્લાઓ અને નગરો બાંધ્યાં;

¹³ ત્યાં વિપુલ જથ્થામાં પુરવઠો રાખવામાં આવતો.

¹⁴ યરુશાલેમમાં તેણે ગોત્ર પ્રમાણે શૂરવીર સેનાધિકારીઓ રાખ્યા. યહૂદાના ગોત્રનો અધિપતિ આદના હતો અને તેની હેઠળ ત્રણ લાખ શૂરવીર સૈનિકો હતા.

¹⁵ બીજા સ્થાને યહોહાનાન હતો અને તેના નિયંત્રણ હેઠળ બે લાખ એંસી હજાર સૈનિકો હતા.

¹⁶ ત્રીજા સ્થાને ઝીખ્રીનો પુત્ર અમાસ્યા હતો અને તેના નિયંત્રણ હેઠળ બે લાખ સૈનિકો હતા. (અમાસ્યાએ પ્રભુની સેવા કરવાનું સ્વેચ્છાએ સ્વીકાર્યું હતું).

¹⁷ બિન્યામીનના ગોત્રનો અધિપતિ એલ્યાદા શ્રેષ્ઠ સૈનિક હતો અને તેના હસ્તક ઢાલ અને ધનુષ્ય ધારણ કરતા બે લાખ પુરુષો હતા.

¹⁸ તેના પછીના સ્થાને યહોઝાબાદ હતો અને તેની હસ્તક યુદ્ધ માટે સુસજ્જ થયેલા એક લાખ એંસી હજાર પુરુષો હતા.

¹⁹ આ માણસો યરુશાલેમમાં રાજાની સેવા કરતા. એ સર્વ ઉપરાંત તેણે યહૂદિયાનાં કિલ્લેબંધીવાળાં નગરોમાં બીજા સૈનિકો રાખ્યા હતા.