૨ કાળવૃત્તાંત 10 - પવિત્ર બાઇબલ C.L.

ઉત્તરનાં કુળોનો વિદ્રોહ

¹ રહાબામ શખેમ ગયો; કારણ, ત્યાં સર્વ ઇઝરાયલીઓ તેને રાજા ઠરાવવા એકત્ર થયા હતા.

² શલોમોન રાજા પાસેથી નાસી છૂટીને ઇજિપ્ત જતો રહેલો નબાટનો પુત્ર યરોબામ એ સમાચાર સાંભળી ઘેર પાછો ફર્યો.

³ કારણ, ઉત્તરનાં કુળોના લોકોએ તેને સંદેશ મોકલીને બોલાવી લીધો હતો. તેઓ યરોબામને સાથે લઈને રહાબામ પાસે ગયા અને તેને કહ્યું,

⁴ “તમારા પિતાએ અમારા પર લાદેલી રાજસેવા ભારે ઝૂંસરી સમાન હતી. તમારા પિતાએ લાદેલી વેઠ અને એ ઝૂંસરીનો બોજ તમે હળવો કરશો તો અમે તમારી નિષ્ઠાપૂર્વક સેવા કરીશું.”

⁵ રહાબામે જવાબ આપ્યો, “તમે ત્રણ દિવસ પછી આવજો.” તેથી લોકો ત્યાંથી વિદાય થયા.

⁶ રહાબામે પોતાના પિતા શલોમોનના વડીલ સલાહકારો સાથે પરામર્શ કર્યો. તેણે પૂછયું, “આ લોકોને મારે શું જવાબ આપવો? એ વિષે તમારી શી સલાહ છે?”

⁷ તેમણે ઉત્તર આપ્યો, “તમે આ લોકો પ્રત્યે માયાળુ બનશો, અને તેમને સહાનુભૂતિપૂર્વક જવાબ આપી તેમને પ્રસન્‍ન કરશો તો તેઓ વફાદારીપૂર્વક તમારી સેવા કરશે.”

⁸ પણ તેણે વડીલ સલાહકારોની સલાહ ગણકારી નહિ; એને બદલે, તેની સાથે ઉછરેલા અને હવે તેના સલાહકાર બનેલા જુવાનો પાસે તે ગયો.

⁹ તેણે પૂછયું, “તમે શી સલાહ આપો છો? પોતાનો બોજ હળવો કરવા લોકો વિનંતી કરે છે તો મારે તેમને શું કહેવું?”

¹⁰ તેમણે જવાબ આપ્યો, “તમે તેમને આમ કહેજો: ‘મારી ટચલી આંગળી મારા પિતાની કમર કરતાં જાડી છે.’

¹¹ તેમને કહેજો, ‘મારા પિતાએ તમારા પર ભારે બોજ નાખ્યો, તો હું એ બોજ એથીય ભારે કરીશ. તે તેમને કોરડાથી શિક્ષા કરતા હતા, તો હું તમને ઘોડાના ચાબુકથી શિક્ષા કરીશ!’ ”

¹² રહાબામ રાજાની સૂચના પ્રમાણે યરોબામ અને સર્વ લોકો ત્રણ દિવસ પછી તેની પાસે આવ્યા.

¹³ રાજાએ વડીલોની સલાહની અવગણના કરીને જુવાનોની સલાહ પ્રમાણે લોકો સાથે કડકાઈથી વાત કરી.

¹⁴ તેણે કહ્યું, “મારા પિતાએ તમારા પર ભારે બોજ નાખ્યો હતો, તો હું એ બોજ એથી ય ભારે કરીશ. તે તમને કોરડાથી શિક્ષા કરતા હતા તો હું તમને ઘોડાના ચાબુકથી શિક્ષા કરીશ!”

¹⁵ શીલોના દષ્ટા એલિયા મારફતે નબાટના પુત્ર યરોબામને પ્રભુ પરમેશ્વરે જે કહ્યું હતું તે પૂરું થાય તે માટે એ પ્રભુની ઇચ્છા હતી. તેથી રાજાએ લોકોનું સાંભળ્યું નહિ.

¹⁶ લોકોએ જોયું કે રાજા તેમનું સાંભળતો નથી ત્યારે તેમણે પોકાર કર્યો: “દાવિદ સાથે અમારે શો સંબંધ છે? યિશાઈના વંશજ સાથે અમારો શો લાગભાગ છે? હે ઇઝરાયલીઓ, સૌ પોતપોતાને ઘેર જાઓ! દાવિદ, તું તારું ઘર સંભાળી લે.” એમ ઇઝરાયલના લોકોએ બળવો પોકાર્યો અને પોતાને ઘેર ચાલ્યા ગયા.

¹⁷ રહાબામ માત્ર યહૂદિયા પ્રાંતના લોકોનો રાજા રહ્યો.

¹⁸ પછી રહાબામ રાજાએ વેઠિયાઓ પર દેખરેખ રાખનાર હદોરામને ઇઝરાયલીઓ પાસે મોકલ્યો, પણ તેમણે તેને પથ્થરે મારી નાખ્યો. તેથી રહાબામ પોતાના રથમાં ચઢી જઈને ઉતાવળે યરુશાલેમ આવતો રહ્યો.

¹⁹ તે સમયથી આજ સુધી ઉત્તરના ઇઝરાયલના રાજ્યના લોકો દાવિદના રાજવંશની વિરુદ્ધમાં જ રહ્યા છે.