૧ રાજા 6 - પવિત્ર બાઇબલ C.L.

મંદિરનું બાંધકામ

¹ ઇઝરાયલી લોકો ઇજિપ્તમાંથી નીકળી આવ્યા પછી ચારસો એંસી વરસે, શલોમોનના ઇઝરાયલ ઉપરના અમલના ચોથા વરસે, વર્ષના બીજા એટલે ઝીવ માસમાં શલોમોને મંદિર બાંધવાનું શરૂ કર્યું.

² શલોમોને પ્રભુ માટે બાંધેલું મંદિર અંદરથી સત્તાવીશ મીટર લાંબુ, નવ મીટર પહોળું અને સાડા તેર મીટર ઊંચું હતું.

³ મંદિરની પરસાળ સાડાચાર મીટર લાંબી અને પવિત્રસ્થાનની પહોળાઈ જેટલી એટલે કે નવ મીટર પહોળી હતી.

⁴ મંદિરની દીવાલોમાં અંદરની બાજુએ પહોળી પણ બહારની બાજુએ સાંકડી એવી બારીઓ હતી.

⁵ મંદિરની ભીંતને અડીને, મંદિરની બે બાજુએ અને તેની પાછળની બાજુએ 2.2 મીટર ઊંચી એવી ત્રણ માળવાળી ઓરડીઓ હતી.

⁶ ઓરડીઓ સૌથી નીચેના માળે 2.2 મીટર પહોળી, વચલા માળે 2.7 મીટર પહોળી અને સૌથી ઉપલા માળે 3.1 મીટર પહોળી હતી. પ્રત્યેક માળે મંદિરની દીવાલ તેના નીચેના માળ કરતાં સાંકડી હતી; જેથી ઓરડીના ભારટિયાઓ મંદિરની દીવાલોમાં બાકોરાં પાડીને દાખલ ન કરતાં દીવાલના ખાંચામાં ટેકવી શક્યા હતા.

⁷ ખાણમાં જ ઘડેલા પથ્થરો મંદિરના બાંધકામમાં વપરાતા હતા, તેથી મંદિર બંધાતું હતું ત્યારે તેમાં હથોડીઓ, કુહાડીઓ કે અન્ય કોઈ લોખંડી ઓજારનો અવાજ થતો નહોતો.

⁸ ત્રિમાળી ઓરડીઓના સૌથી નીચેના માળનું પ્રવેશદ્વાર મંદિરની દક્ષિણે હતું અને ત્યાંથી વચલા તેમ જ સૌથી ઉપલે માળે જવા માટે સીડી હતી.

⁹ એમ શલોમોન રાજાએ મંદિરનું બાંધકામ પૂર્ણ કર્યું. તેણે ગંધતરુના પાટડા અને પાટિયાંની છત બનાવી.

¹⁰ ત્રિમાળી ઓરડીઓનો પ્રત્યેક માળ 22 મીટર ઊંચો હતો. મંદિરની ત્રણ બાજુએ બાંધેલી આ ઓરડીઓ ગંધતરુના ભારટિયાથી મંદિરની દીવાલ સાથે ટેકવેલી હતી.

¹¹ પ્રભુએ શલોમોનને કહ્યું,

¹² “તું મારા નિયમો અને મારી આજ્ઞાઓ પાળીશ તો તારા પિતા દાવિદને આપેલા વચન પ્રમાણે હું તારા હક્કમાં કરીશ.

¹³ તું જે મંદિર બાંધી રહ્યો છે તેમાં હું મારા ઇઝરાયલી લોકો મધ્યે વસીશ, અને હું તેમને કદી તજી દઈશ નહિ.”

¹⁴ એમ શલોમોને મંદિરનું બાંધકામ પૂરું કર્યું.

મંદિરનો અંદરનો ભાગ

¹⁵ મંદિરની અંદરની દીવાલો પર ભોંયતળિયાથી છત સુધી ગંધતરુનાં પાટિયાં લગાવ્યાં હતાં અને ભોંયતળિયું દેવદારનાં પાટિયાંથી જડેલું હતું.

¹⁶ મંદિરના પાછલા ભાગમાં પરમપવિત્રસ્થાન તરીકે ઓળખાતો ખંડ બાંધવામાં આવ્યો હતો. તે નવ મીટર લાંબો હતો અને ભોંયતળિયાથી છત સુધી ગંધતરુનાં પાટિયાં લગાવી અલગ પાડેલો હતો.

¹⁷ પરમપવિત્રસ્થાનની આગળનો ખંડ અઢાર મીટર લાંબો હતો.

¹⁸ ગંધતરુનાં પાટિયાં વેલ અને ફૂલોની કોતરણીથી શણગારેલાં હતાં. દીવાલના પથ્થરો દેખાય નહિ તે માટે અંદરનો આખોય ભાગ ગંધતરુનાં પાટિયાંથી મઢેલો હતો.

¹⁹ પ્રભુની કરારપેટી મૂકવા માટે તેણે મંદિરની છેક અંદરની ગમ પરમ પવિત્રસ્થાનનો ખંડ બાંધ્યો.

²⁰ આ ખંડ નવ મીટર લાંબો, અને નવ મીટર પહોળો અને નવ મીટર ઊંચો હતો, અને આખોય ખંડ સોનાથી મઢેલો હતો. વેદી ગંધતરુનાં પાટિયાંથી મઢેલી હતી.

²¹ મંદિરને તેની અંદરની બાજુએ સોનાથી મઢયું હતું. આ અંદરના ખંડનું પ્રવેશદ્વાર સોનાથી મઢયું હતું અને તેની આગળ સોનાની સાંકળો લટકાવેલી હતી.

²² આખું મંદિર અંદરથી સોને મઢયું હતું ને પરમ પવિત્રસ્થાનની વેદી પણ સોને મઢેલી હતી.

²³ ઓલિવવૃક્ષના લાકડામાંથી પાંખોવાળા બે પ્રાણી એટલે કરુબો બનાવીને પરમપવિત્રસ્થાનમાં મૂક્યા.

^24-26 પ્રત્યેક કરુબની ઊંચાઈ 4.4. મીટર હતી. બન્‍ને કરુબો એક જ આકાર અને કદના હતા. દરેકને બે પાંખો હતી; પ્રત્યેક પાંખ 2.2 મીટર લાંબી હતી. જેથી એક પાંખના છેડાથી બીજી પાંખના છેડા વચ્ચેનું અંતર 4.4 મીટર હતું.

²⁷ તેમને પરમ-પવિત્રસ્થાનમાં પાસપાસે એ રીતે મૂક્યાં હતા કે જેથી તેમની પ્રસરેલી પાંખો ખંડની મધ્યમાં એકબીજીને સ્પર્શે અને બીજી બે પાંખો બન્‍ને તરફ દીવાલોને સ્પર્શે.

²⁸ એ બે પાંખવાળા કરુબો સોને મઢયા હતા.

²⁹ મુખ્યખંડની તેમ જ અંદરના ખંડની બધી દીવાલો પાંખોવાળા કરુબો, ખજૂરીઓ અને ફૂલોની કોતરણીથી શણગારેલી હતી.

³⁰ ભોંયતળિયું પણ સોને મઢયું હતું.

³¹ પરમપવિત્રસ્થાનમાં પ્રવેશદ્વારનાં બે કમાડો ઓલિવવૃક્ષના લાકડામાંથી બનાવેલા હતાં. પ્રવેશદ્વાર પંચકોણ આકારનું હતું; એટલે કે તેની ઉપરના ભાગમાં અણીદાર કમાન હતી.

³² કમાડો, પાંખોવાળા પ્રાણી, કરુબો, ખજૂરીઓ અને ફૂલો સોને મઢયાં હતાં.

³³ મુખ્યખંડના પ્રવેશદ્વાર માટે ઓલિવવૃક્ષના લાકડામાંથી બારણાનું લંબચોરસ ચોકઠું બનાવેલું હતું.

³⁴ દેવદારના લાકડામાંથી બનાવેલા બન્‍ને કમાડમાં બબ્બે મિજાગરે જોડેલા બે ભાગ હતા.

³⁵ એના પર પાંખોવાળાં પ્રાણી કરુબો, ખજૂરીઓ અને ફૂલો કોતરેલા હતાં અને એ નકશીકામ સોનાથી બંધબેસતું મઢેલું હતું.

³⁶ મંદિરની આગળ પરસાળ બનાવી હતી. પરસાળની ચારેબાજુની દીવાલમાં પથ્થરના ત્રણ થર અને એક થર ગંધતરુના લાકડાનો હતો.

³⁷ શલોમોનના અમલના ચોથા વર્ષે વર્ષના બીજા માસમાં એટલે ઝીવ માસમાં મંદિરનો પાયો નાખવામાં આવ્યો હતો.

³⁸ શલોમોન રાજાના અમલના અગિયારમે વર્ષે, આઠમા એટલે બુલ માસમાં, અગાઉ કરેલા આયોજિત નમૂના પ્રમાણે જ મંદિર પૂરું થયું. શલોમોનને એ બાંધતાં સાત વર્ષ લાગ્યાં.