૧ કાળવૃત્તાંત 26 - પવિત્ર બાઇબલ C.L.

મંદિરના દ્વારપાળો

¹ મંદિરના દ્વારપાળો તરીકે લેવીઓની આ પ્રમાણે ટુકડીઓ પાડવામાં આવી હતી: કોરાહના ગોત્રમાં આસાફના કુટુંબના કોરેનો પુત્ર મેશેલેમ્યા હતો.

² તેને સાત પુત્રો હતા; વયાનુક્રમે તેમની યાદી આ પ્રમાણે છે: ઝખાર્યા, યદિયેલ, ઝબાદ્યા, યાથ્નીએલ,

³ એલામ, યહોહાનાન, એલ્યહોનાય.

⁴ ઓબેદ-અદોમને ઈશ્વરના આશીર્વાદથી આઠ પુત્રો હતા; વયાનુક્રમે તેમની યાદી આ પ્રમાણે છે: શમાયા, યહોઝાબાદ, યોઆહ, શાખાર, નથાનએલ,

⁵ આમ્મીએલ, ઈસ્સાખાર, પુલ્લથાય.

^6-7 ઓબેદ-અદોમના જયેષ્ઠ પુત્ર શમાયાને છ પુત્રો હતા: ઓથ્ની, રફાએલ, ઓબેદ, એલઝાબાદ, એલીહૂ અને સમાખ્યા. તેઓ બાહોશ હોઈ પોતાના પિતાના ગોત્રમાં અગ્રગણ્ય પુરુષો હતા; છેલ્લા બે પુત્રો તો વિશેષ શૂરવીર હતા.

⁸ ઓબેદ-અદોમના કુટુંબમાં પુત્રો અને ભાઈઓ મળી કુલ બાસઠ વંશજો હતા, તેઓ સૌ કાર્યદક્ષ હોઈ મંદિરના સેવાકાર્ય માટે લાયક હતા.

⁹ મેશેલેમ્યાના કુટુંબમાં પુત્રો અને ભાઈઓ મળી એકંદરે અઢાર સશક્ત શૂરવીરો હતા.

¹⁰ મરારીના ગોત્રમાં હોસાને ચાર પુત્રો હતા: શિમઈ (તે જયેષ્ઠ પુત્ર ન હતો, પણ તેના પિતાએ તેને આગેવાન ઠરાવ્યો).

¹¹ હિલકિયા, ટબાલ્યા, ઝખાર્યા. હોસાના કુટુંબમાં પુત્રો અને ભાઈઓ મળી કુલ તેર હતા.

¹² કુટુંબના વડા પ્રમાણે, આ દ્વારપાળોનાં જૂથ પાડવામાં આવ્યાં હતાં; જેથી તેઓ તેમના લેવી ભાઈઓની જેમ પ્રભુના મંદિરમાં વારા પ્રમાણે સેવા કરી શકે.

¹³ કુટુંબ નાનું કે મોટું છે તે લક્ષમાં લીધા સિવાય કોણ કયા દરવાજાની ચોકી કરશે તે નક્કી કરવા ચિઠ્ઠીઓ નાખી.

¹⁴ શલેમ્યાહે ચિઠ્ઠી ઉપાડી તો તેને માટે પૂર્વ દરવાજો આવ્યો, અને તેના પુત્ર ઝખાર્યાને માટે ઉત્તરના દરવાજાની ચિઠ્ઠી નીકળી. ઝખાર્યા તો શાણો સલાહકાર હતો.

¹⁵ ઓબેદ- અદોમને ફાળે દક્ષિણનો દરવાજો આવ્યો, અને તેના પુત્રોને ભંડારના સંરક્ષણની જવાબદારી સોંપાઈ.

¹⁶ શૂપ્પીમ અને હોસાહને પશ્ર્વિમનો દરવાજો અને ઉપરની સડક પરનો શાલ્લેખેથનો દરવાજો સોંપાયો. ફરજ પરના દ્વારપાળોના નિયત સમય માટે એક પછી એક વારા રાખ્યા હતા.

¹⁷ દરરોજ પૂર્વમાં છ, ઉત્તરમાં ચાર અને દક્ષિણમાં ચાર દ્વારપાળો રહેતા. દરેક ભંડારે બબ્બે એમ ચાર દ્વારપાળો દરરોજ ભંડારો આગળ રહેતા.

¹⁸ પશ્ર્વિમના આંગણા પાસેના રસ્તા પર ચાર અને એ આગણાંમાં બે દ્વારપાળો રહેતા.

¹⁹ કોરા અને મરારીના ગોત્રોના ફરજ પરના દ્વારપાળોને એ રીતે વારા પ્રમાણે કામ સોંપાયેલું હતું.

મંદિરની અન્ય સેવાઓ

²⁰ લેવીઓમાંથી અહિયા ઈશ્વરના મંદિરના ભંડાર અને ઈશ્વરને અર્પિત ભેટોના ભંડારો પર હતો.

²¹ લાદાન ગેર્શોની ઘણાં કુટુંબોનો પૂર્વજ હતો; તેનો પુત્ર યહિયેલ તેમાં મુખ્ય હતો.

²² લાદાનના બીજા બે પુત્રો ઝેથામ અને યોએલ પ્રભુના મંદિરના ભંડારો પર હતા.

²³ આમ્રામ, યિસ્હાર, હેબ્રોન અને ઉઝિયેલના વંશજોને પણ કામ ફાળવી આપ્યું હતું.

²⁴ મોશેના પુત્ર ગેર્શોનના ગોત્રનો શબૂએલ મંદિરના ભંડારનો મુખ્ય જવાબદાર અધિકારી હતો.

²⁵ ગેર્શોનના ભાઈ એલિએઝેરના પક્ષે તે શલોમીથનો સંબંધી હતો. એલિએઝેર રહાબ્યાનો પિતા હતો, રહાબ્યા યેશિયાનો પિતા હતો. યેશિયા યોરામનો પિતા હતો, યોરામ ઝિખ્રીનો પિતા હતો અને ઝિખ્રી શલોમીથનો પિતા હતો.

²⁶ દાવિદ રાજા, કુટુંબના વડાઓ, ગોત્રના આગેવાનો અને લશ્કરી સહાધિપતિઓ અને શતાધિપતિઓ દ્વારા ઈશ્વરને અર્પાયેલી સર્વ ભેટો શલોમીથ અને તેના કુટુંબના સભ્યોની સાચવણીમાં હતી.

²⁷ લડાઈમાં મળેલી લૂંટનો કેટલોક ભાગ તેઓએ પ્રભુના મંદિરના ઉપયોગને માટે અર્પ્યો હતો.

²⁸ સંદેશવાહક શમુએલ, રાજા શાઉલ, નેરના પુત્ર આબ્નેર અને સરુયાના પુત્ર યોઆબની ભેટો સહિત પ્રભુના મંદિરમાં વપરાશ માટે અર્પેલી સર્વ ભેટો શલોમીથ અને તેના કુટુંબના હવાલામાં હતી.

બીજા લેવીઓની ફરજો

²⁹ યિસ્હારના વંશજો કનાન્યા અને તેના પુત્રોને નોંધ રાખવાની અને ઇઝરાયલ લોકોના વિવાદોના નિરાકરણની વહીવટી કામગીરી સોંપવામાં આવી હતી.

³⁰ હેબ્રોનના વંશજો પૈકી યશાબ્યાહ અને તેના સત્તરસો સંબંધીઓ કાર્યદક્ષ હતા; તેમને યર્દન નદીની પશ્ર્વિમ બાજુએ ઇઝરાયલીઓની ધાર્મિક અને રાજકીય સેવાને લગતી બધી બાબતોનો વહીવટ સોંપવામાં આવ્યો હતો.

³¹ યેરિયા હેબ્રોનનો વંશજ હતો. દાવિદના અમલના ચાલીસમે વર્ષે હેબ્રોનના વંશજોને તેમની વંશાવળી પ્રમાણે શોધી કાઢવામાં આવ્યા, ને આ કુટુંબમાંના શૂરવીર યોદ્ધાઓ ગિલ્યાદ પ્રાંતના યાઝેરમાંથી મળી આવ્યા.

³² દાવિદ રાજાએ યેરિયાના સગાંસંબંધીઓમાંથી બે હજાર સાતસો કાર્યદક્ષ કુટુંબ-વડાઓ પસંદ કર્યા, અને યર્દન નદીની પૂર્વગમ રૂબેન, ગાદ અને પૂર્વ મનાશ્શાના પ્રાંતોમાં ઇઝરાયલીઓની ધાર્મિક અને રાજકીય સેવાને લગતી બાબતોનો વહીવટ તેમને સોંપ્યો.