૧ કાળવૃત્તાંત 14 - પવિત્ર બાઇબલ C.L.

દાવિદનું કુટુંબ

¹ તુરના રાજા હિરામે દાવિદ પાસે એલચીઓ મોકલ્યા અને રાજમહેલ બાંધવા ગંધતરુનાં લાકડાં, કડિયા તથા સુથારો મોકલ્યા.

² તેથી દાવિદને ખબર પડી કે પ્રભુએ તેને ઇઝરાયલના રાજા તરીકે સ્થાપન કર્યો છે અને તેના લોકને માટે તેના રાજ્યનો વૈભવ ઘણો વધાર્યો છે.

³ દાવિદે યરુશાલેમમાં બીજી વધારે પત્નીઓ કરી અને તેને ઘણા પુત્રો-પુત્રીઓ થયાં.

⁴ યરુશાલેમમાં થયેલાં તેનાં સંતાન આ પ્રમાણે છે: શામ્મૂઆ, શોબાબ, નાથાન, શલોમોન,

⁵ યિબ્હાર, એલિશૂઆ, એલપેલેટ,

⁶ નોગા, નેફેગ, યાફિયા,

⁷ એલિશામા, બિલ્યાદા અને એલિફેલેટ.

પલિસ્તીઓ પર વિજય

⁸ દાવિદને આખા ઇઝરાયલ દેશનો રાજા બનાવવામાં આવ્યો છે એવું પલિસ્તીઓએ સાંભળ્યું ત્યારે તેઓ તેને પકડવા ચઢી આવ્યા. તેથી દાવિદે પણ તેમનો સામનો કરવા કૂચ કરી.

⁹ પલિસ્તીઓએ રફાઈમના ખીણપ્રદેશમાં આવીને લૂંટ ચલાવી.

¹⁰ દાવિદે ઈશ્વરને પૂછયું, “હું પલિસ્તીઓ પર હુમલો કરું? મને વિજય અપાવશો?” પ્રભુએ કહ્યું, “જા, હુમલો કર! હું તને વિજય અપાવીશ.”

¹¹ તેથી દાવિદે બઆલ-પરાસીમ પાસે તેમના પર હુમલો કરી તેમને હરાવ્યા. તેણે કહ્યું, “પૂરનાં પાણી પાળ તોડી પાડે તેમ ઈશ્વરે મારા દ્વારા શત્રુના સૈન્યનો સંહાર કર્યો છે.” તેથી તે સ્થળનું નામ બઆલ-પરાસીમ (તોડી પાડનાર પ્રભુ) પાડયું.

¹² પલિસ્તીઓ તેમની મૂર્તિઓને પોતાની પાછળ છોડી દઈને ભાગી છૂટયા. દાવિદે તે મૂર્તિઓને બાળી નંખાવી.

¹³ થોડા જ વખત પછી પલિસ્તીઓ રફાઈમના ખીણપ્રદેશમાં ફરી વાર આવીને લૂંટ ચલાવવા લાગ્યા.

¹⁴ દાવિદે ફરી ઈશ્વરને પૂછયું, તો તેમણે જવાબ આપ્યો, “અહીંથી હુમલો કરીશ નહિ, પણ ચકરાવો ખાઈને સામેની બાજુએ જા અને ત્યાં શેતુરનાં વૃક્ષો પાસે હુમલો કરવા તૈયાર રહે.

¹⁵ તું વૃક્ષોની ટોચ પર કૂચ કરવાનો અવાજ સાંભળે ત્યારે હુમલો કરજે; કારણ પલિસ્તીઓનો પરાજય કરવા હું તારી આગળ આગળ કૂચ કરીશ.”

¹⁶ દાવિદે ઈશ્વરના આદેશ પ્રમાણે કર્યું અને એમ તેમણે ગિબ્યોનથી છેક ગેઝર સુધી પલિસ્તીઓને મારી હઠાવ્યા.

¹⁷ દાવિદની કીર્તિ સર્વત્ર પ્રસરી ગઈ અને પ્રભુએ બધાં રાષ્ટ્રો પર તેની ધાક બેસાડી.