ZACARÍAS 8 - Biblia Guarani Tumpa Iñee

Jerusalén oyeapo kavi yeta vae regua

¹ YandeYa Imbaepuere yae ete vae jei cheve körai:

² “Körai che peYa Imbaepuere yae ete vae jae: Cherägüɨro yae Sión re, chearasɨ yae reve cherägüɨro jese.

³ Che ayapo kavi ye Sión, jare aikota Jerusalén pe; Jerusalén jeeta Tëta guasu Jupi vae, jare che peYa Imbaepuere yae ete vae iɨvɨtɨ jeeta, Ɨvɨtɨ Ikɨambae.

⁴ Jekuaeño oime yeta oyekuaa ndechi reta jare tɨ̈aro reta Jerusalén joka rupi, metei ñavo ipopokata, echa oasa eteta indechi ani itɨ̈aro.

⁵ Jerusalén joka rupi tɨnɨeta kunumi jare kuñatai reta oyuvanga.

⁶ Kuae omopɨakañɨ yave kuri jókuae ara rupi, tëta chembae güi jembɨregüe. ¿Cheve mɨakañɨta vi pa kuri?

⁷ Mase, ko che ayorata tëta chembae, ïru tëta guasu kuaraɨ oëa kotɨgua imbaepuere güi; jare tëta guasu kuaraɨ oikea kotɨgua imbaepuere güi,

⁸ jare aruta yogüɨreko ye Jerusalén pe; joko pe jae reta yogüɨrekota chembaerä, jare che aikota jae reta iTumparä añete pegua jare jupi rupi.”

⁹ YandeYa Imbaepuere yae ete vae jei körai: “Peñemomɨ̈rata pe reta peendu ñee kuae ara rupi ñeemombeúa reta rupi vae, jókuae ara oyemboɨpɨ güive oñeñono o iguapɨka oñemopüa vaerä yave yandeYa Imbaepuere yae ete vae jo.

¹⁰ Echa kuae ara pe mbaetɨ vɨteri mbaerepɨ kuimbae reta peguarä, jare mɨmba reta peguarä ave mbaetɨ, mbaetɨ vi mbɨakatu mbae oyeapo vaerä japɨpe pe ani ikatu pe ave tovaicho reta jeko pegua; jare che aeya opaete kuimbae reta oyokotɨ.

¹¹ Ërei ngatu añave ngaraa ayapo kuae tëta güi jembɨregüe reta ndive tenonde rupi oasagüe rami; jei yandeYa Imbaepuere yae ete vae.

¹² Echa mbɨakatu oimeta chupe reta: Uva iata, jare ɨvɨ omeeta mbaagüɨye, ara güi oata ɨsápɨi; kuae tëta güi jembɨregüe pe ayapota güɨnoi vaerä opaete kuae.

¹³ Jare peiko yepopeyurä ïru tëtaguasu reta ipɨte rupi, pe Judá jare Israel pegua reta, jökorai pogüɨroasayepeta jare peïta mborerekuarä. Agüɨye peyembopɨtu ¡Agüɨye pekɨɨye! ¡Jaeño peñemomɨ̈rata yae!”

¹⁴ YandeYa Imbaepuere yae ete vae jei körai: “Ayemongeta ikavimbae ayapo vaerä peñemuñagüe reta pe chemboarasɨuka ramo, jare mbaetɨ aipoepɨ cheyemongeta.

¹⁵ Ërei añave ayemongeta ayapo ikavi vae Jerusalén kotɨ, jare Judá pegua reta kotɨ; agüɨye pekɨɨye.

¹⁶ Kuaekuae jae peyapo aveita vae: Pemiari añetete rupi perapicha pe; peporojäa jupi rupi jare toime avei mbɨakatu morojäa oyeapo yave.

¹⁷ Jare metei ave pegüi agüɨye peyemongeta pɨ̈chɨi pepɨa pe perapicha kotɨ, agüɨye pemomora mbae pere añetete rami Tumpa jee re ave; echa opaete kuae mbaembae ko aröɨro, jei yandeYa.”

¹⁸ YandeYa Imbaepuere yae ete vae jei cheve körai:

¹⁹ “Yekuaku tembíu güi irundɨa yasɨ pegua vae, jare pandepoa pegua jare chiúa pegua, jare payandepoa pegua vae oyepoepɨta Judá pegua reta pe mbɨakatu pe, yerovia katu pe, jare arete ikavi yae vae pe. Peaɨu añetete vae jare mbɨakatu.”

²⁰ YandeYa Imbaepuere yae ete vae jei körai: “Yogüeru vɨterita jeta vae ïru tëta guasu pegua reta.

²¹ Jare metei tëta pegua reta yogüɨrajata ïru tëta pe jare jei retata: ‘Yaja yaiporu Tumpa ipɨakavi, jare yaeka yandeYa Imbaepuere yae ete vae.’ ‘¡Torojo vi ore!’ Jeita ïru reta.

²² Jare jeta vae jare tëtaguasu reta imbaepuere yae vae yogüɨrajata oeka yandeYa Imbaepuere yae ete vae Jerusalén pe, oiporu vaerä yandeYa iporerekua.

²³ YandeYa Imbaepuere yae ete vae jei körai: Jókuae ara payandepo kuimbae reta ïru tëtaguasu pegua reta oipɨɨ retata metei judío jemimonde, jei reve: ‘¡Torojo perupíe, echa roendu Tumpa oiko pe ndive!’ ”