ZACARÍAS 6 - Biblia Guarani Tumpa Iñee

Irundɨ käretou ñeraro pegua

¹ Cheäka aupi pɨau ye jare aecha irundɨ käretou oyekuaa mókoi ɨvɨtɨ ipäu güi; jókuae ɨvɨtɨ reta jiero iyu vae pegua.

² Tenondegua käretou omoata kavayu pɨ̈ta vae reta, jare mokoía käretou omoata kavayu jüu vae reta;

³ mboapɨa käretou omoata kavayu tïi vae reta, jare irundɨa käretou omoata kavayu ipara jare iñäkua yae vae.

⁴ Jare aparandu araɨgua imiari che ndive vae pe: “Cheya, ¿mbae pa ko kuae?”

⁵ Jare araɨgua jei cheve: “Kuae jae ko irundɨ ɨvɨtu reta oë yandeYa opaete ɨvɨ iya jóvai güi vae.

⁶ Käretou kavayu jüu vae reta omoata vae ojo ɨvɨtuguasu kotɨgua reta kotɨ; käretou kavayu tïi vae reta omoata vae ojo kuaraɨ oikea kotɨgua reta kotɨ, jare käretou kavayu ipara vae reta omoata vae ojo arayevɨ kotɨgua reta kotɨ.”

⁷ Jare kavayu pɨ̈ta vae reta oyemoambeko ojo vaerä opaete ɨvɨ rupi, araɨgua jei chupe reta: “Pekua, peguata opaete ɨvɨ rupi.” Jare yogüɨraja jei chupe reta rami.

⁸ Jaɨkue rupi chereenɨi jare jei cheve: “¡Mase, ɨvɨtuguasu kotɨ yogüɨraja vae reta cheEspíritu pe omee oputuu vaerä chearasɨ ɨvɨtuguasu kotɨgua reta pe vae güi!”

Josué iñäka regua

⁹ YandeYa jei cheve:

^10-11 “Tembipɨɨ Babilonia pegua güi yogüeru ye vae Heldai, Tobías jare Jedaías güi eipɨɨ korepoti, oro jare nde eraja voi jókuae ara Josías, Sofonías taɨ jo pe eyapo äka-regua, jare metei äka-regua eñono sacerdote Josué, Josadac taɨ iñäka re.

¹² Jare ere chupe körai: ‘YandeYa Imbaepuere yae ete vae jei körai: Mase, ko kuimbae Jokɨ pɨau jee vae jeñɨita japo güi aeño, jae omopüa pɨau yeta yandeYa itupao.

¹³ Jae omopüa pɨau yeta yandeYa itupao, jare jae imboetea yaeta, oguapɨta guapɨa mborookuaía pegua pe oporookuai, jare oimeta sacerdote iyɨke pe; oimeta yomboarakuaa mbɨakatu pegua oyoupii.

¹⁴ Jare äka-regua osiriveta Helem, Tobías, Jedaías jare Hen, Sofonías taɨ reta re oime avei vaerä yemomaendúa yandeYa itupao pe.’ ”

¹⁵ Jare mombɨrɨ ñogüɨnoi vae yogüeruta jare oporomborɨta omopüa pɨau ye yandeYa itupao, jayave peikuaata yandeYa Imbaepuere yae ete vae ko chembou pekotɨ. Kuae oyeapota peendu jare pekɨ̈reɨ ngatu peyapo yandeYa iñee yave.