ZACARÍAS 5 - Biblia Guarani Tumpa Iñee

Tembikuatía oveve vae

¹ Aupi cheäka jare aecha, ko tembikuatía oñemama vae oveve.

² Jare araɨgua jei cheve: “¿Mbae pa reecha?” Jare che jae chupe: “Aecha metei tembikuatía oñemama vae oveve; güɨnoi chau metro ipukugüe jare ipɨgüe irundɨ metro y medio.”

³ Jayave jei cheve: “Kuae jae ko oyekuatía yoyavi yepopeyu outa opaete ɨvɨ pe vae, metei jovaicho oyekuatía vae pe jei: Opaete imonda vae oyemboaita, jare jovaicho re oyekuatía vae pe jei: Añetete rami mbae jei Tumpa jee re vae oyemboaita.

⁴ YandeYa Imbaepuere yae ete vae jei: ‘Che ko amondo yepopeyu imonda vae jo pe jare añetete rami mbae jei cheree re vae jo pe. Jare oïta joko pe opaetei regua omboai jo ndive, okɨta jare ita reta ave.’ ”

Mbaejäaka pe kuña oï vae

⁵ Araɨgua imiari oiko che ndive vae jei cheve: “Eupi añave neäka jare emae, kuae mbae oë vae re.”

⁶ Jare aparandu chupe: “¿Mbae pa jókuae?” Jae jei cheve: “Kuae ko jae metei mbaejäaka, jae ko opaete kuae ɨvɨ pegua reta iyoa oñejäa pɨpe vae.”

⁷ Jare itapa plomo pegua oyepea yave, ko metei kuña oguapɨ oï jókuae mbaejäaka pe.

⁸ Jare araɨgua jei cheve: “Kuae kuña jae ko ikavimbae vae.” Jare omoaña mbaejäaka japɨpe pe, jare oyokenda mbaejäaka itapa plomo pegua pe.

⁹ Amae ye jare aecha oyekuaa mókoi kuña ipepo güɨratï rami vae ɨvɨtu güeru jare oupi reta mbaejäaka ɨvate rupi.

¹⁰ Jayave aparandu araɨgua imiari che ndive vae pe: “¿Ketɨ pa güɨraja reta mbaejäaka?”

¹¹ Jayave jae jei cheve: “Oñemopüa vaerä chupe o, ɨvɨ Sinar pe. Jare opa ma oyeapo yave oñono retata jenda re.”