ZACARÍAS 4 - Biblia Guarani Tumpa Iñee

Mechero jenda jare olivo reta

¹ Araɨgua imiari che ndive vae cheke pe chemomba, metei kuimbae oke vae güi oyemomba rami.

² Jare jei cheve: “¿Mbae pa reecha?” Che jae chupe: “Mase, ko aecha metei mechero jenda oro katuai vae, güɨnoi iárambo asaite jɨru, jare chiu mechero jókuae jenda iárambo, metei ñavo güɨnoi asaite jape mechero peguarä.

³ Jare mechero renda iyɨpɨ pe oï mókoi olivo, metei iyakatu kotɨ ïru iyasu kotɨ.”

⁴ Jare aparandu araɨgua imiari che ndive vae pe: “¿Mbae pa ko kuae cheYa?”

⁵ Jare araɨgua imiari che ndive vae jei cheve: “¿Mbaetɨ ya reikuaa mbae ko vae?” Che jae chupe: “Mbaetɨ aikuaa cheya.”

⁶ Jayave jei cheve: “Kuae ko jae yandeYa iñee Zorobabel peguarä: ‘Mbaetɨ sundaro ndive ani mɨ̈rata pe, jaeño cheEspíritu ndive jei yandeYa Imbaepuere yae ete vae.

⁷ ¿Mbae pa nde ɨvɨtɨ? Zorobabel jóvai repɨtata ñuu ipe kavi vae rami; jae oekɨta tenondegua ita jeta vae isapúkai reve: ¡Ikavi yae ko! ¡Ikavi yae ko!’ ”

⁸ Jaɨkue rupi yandeYa jei ye cheve körai:

⁹ “Zorobabel oñonota kuae o iguapɨka, jae ipo pe opata oyapo.” Jökorai peikuaata yandeYa Imbaepuere yae ete vae ko chembou.

¹⁰ “Echa jókuae ara oyemboɨpɨ ramo yave mbaeä etei omae jese vae reta oyeroviata, jare oecha retata Zorobabel ipo pe güɨnoi plomada.” Kuae jaɨkue rupi araɨgua jei ye: “Kuae chiu mechero vae reta jae ko yandeYa jesa omae opaete ɨvɨ re vae.”

¹¹ Aparandu ye chupe: “¿Mbae pa ko oipota jei kuae mókoi ɨvɨra olivo mechero renda iyakatu kotɨ jare iyasu kotɨ ñogüɨnoi vae?”

¹² Aparandu pɨau ye chupe: “¿Mbae pa ombojaanga kuae mókoi ɨvɨra olivo jäka asaite jape oro pegua mechero pe ou vae re ñogüɨnoi vae?”

¹³ Araɨgua jei cheve: “¿Mbaetɨ ya reikuaa mbae ko vae?” Jare jae: “Mbaetɨ aikuaa cheya.”

¹⁴ Jare jae jei: “Kuae ko jae mókoi oñeñono tee oyeokuai vaerä yandeYa pe ɨvɨ iyapoa pe.”