ZACARÍAS 3 - Biblia Guarani Tumpa Iñee

Sacerdote tenondegua ete Josué oyekuaa vae

¹ YandeYa oechauka cheve, sacerdote tenondegua Josué oyemboɨ oï yandeYa iaraɨgua jóvai, jare Satanás oï iyakatu kotɨ, omboeko vaerä.

² Jare yandeYa jei Satanás pe: “¡YandeYa toñeengata ndeve Satanás! ¡YandeYa oaɨu Jerusalén vae toñeengata ndeve! Echa jae ko tatasɨgüe tata güi oñerenoegüe rami.”

³ Jare Josué jemimonde ikɨa vae ndive oï araɨgua jóvai.

⁴ Jare araɨgua oyókuai jóvai rupi ñogüɨnoi vae, jei reve: “Pemboi chugüi jókuae temimonde ikɨa vae.” Jare chupe jei: “Mase, ko aekɨ ndegüi ndeyoa, jare romboemimondeuka ikavi yae vae pe.”

⁵ Jaɨkue rupi jei: “Peñono äka-regua ikɨambae iñäka re.” Jare jae reta oñono jese güire omondeuka chupe temimonde. Jare yandeYa iaraɨgua jekuaeño oyemboɨ oï jóvai.

⁶ Javoi jókuae yandeYa iaraɨgua omboarakuaa Josué körai:

⁷ “YandeYa Imbaepuere yae ete vae jei körai: ‘Reguata jare reiko yave cheremimbota rupi, reporookuaita chero pe, reyangarekota vi cheroka re, jare ameeta ndeve reï vaerä kuae oyeokuai cheve vae reta ndive.

⁸ Eendu añave, sacerdote tenondegua Josué, nde jare ndevɨa-ïru reta oguapɨ nderóvai vae, echa pe reta ko jae yembojaangaa. Mase, ko che aru cherembiokuai jokɨ pɨau vae.

⁹ Echa, ko Josué jóvai añono ita; kuae ita jaevaeño vae güɨnoi chiu iyɨke; mase, ko che aikuatiata jei yandeYa Imbaepuere yae ete vae, jare ɨvɨ pegua reta iyoa aekɨta metei ara pe.

¹⁰ Jókuae ara metei ñavo pegüi reta opareata iñeïru pe okaru päve vaerä uva igüɨ pe jare ɨva igüɨ pe, jei yandeYa Imbaepuere yae ete vae.’ ”