ZACARÍAS 2 - Biblia Guarani Tumpa Iñee

Tembipɨɨ reta oñeenɨi

¹ Jaɨkue rupi amae aecha vi metei kuimbae ipo pe güɨnoi tɨmasa raɨ omaejäa pɨpe vae.

² Jare jae chupe: “¿Ketɨ pa reo?” Jae jei cheve: “Ayu ajäa Jerusalén aikuaa vaerä mbovɨ ra ipɨguasugüe jare mbovɨ ra ipukugüe vae.”

³ Jare jókuae araɨgua imiari che ndive vae oë ojo, jare ko ïru araɨgua oë oövaiti.

⁴ Jare jei chupe: “Esɨi ekua nemiari kunumi güɨnoi tɨmasa raɨ vae pe, körai: ‘Jerusalén ikëseambaeñota, kuimbae jare mbaemɨmba jeta yae vae jeko pegua.

⁵ Ërei yandeYa jei: Che aïta chupe reta ikësearä tata rami, jare aïta ipɨte pe mbaemboetea peguarä.’ ”

YandeYa güɨroasayepe imbae vae reta

⁶ YandeYa jei: “Che ko opa pomoai moai kerupi, petekuarai añave ɨvɨtuguasu kotɨ güi.

⁷ Sión pegua Babilonia pe peiko vae, petekuarai.”

⁸ Echa yandeYa Imbaepuere yae ete vae chembou tëtaguasu reta pepogüɨrai pereeya vae pe kuae ñee ndive. “Echa opoko pere yave kia nunga vae, cheresäɨ kunumi re opoko rami ko.

⁹ Mase, ko chepo añono jese reta, jembiokuai ae reta opɨ̈rota imbaembae reta chugüi.” Jökorai peikuaata yandeYa Imbaepuere yae ete vae ko chembou.

¹⁰ YandeYa jei: “Petairari jare peyerovia Sión pegua reta, echa ko ayu, jare aikota pepɨte pe.”

¹¹ Oñemoïruta jeta tëtaguasu reta yandeYa re jókuae ara, jare jeita: “Toyogüɨreko chembaerä, che aikota jae reta ipɨte pe.” Jökorai peikuaata yandeYa imbaepuere yae ete vae ko chembou.

¹² Jare yandeYa güɨnoi yeta Judá imbae vae ɨvɨ oñeñono teea pe, jare tëta Jerusalén jekuae oiparavo yeta iyeupe.

¹³ ¡Tikïrii opaete vae yandeYa jóvai; echa jae ou jëta ikɨambaea güi!