ZACARÍAS 14 - Biblia Guarani Tumpa Iñee

Jerusalén jare tëta guasu reta

¹ Mase, ko yandeYa iporojäa iara ou ma, ndembaembae opata oyemboyao yao ndegüi Jerusalén.

² Echa che amboatɨta opaete tëtaguasu reta oñeraro vaerä Jerusalén ndive jare opɨ̈rota tëta, omboaita o reta, jare kuña reta re oyuvangata: Jare tëta mbɨte rupi oyererajata tembipɨɨrä, jaeño mbovɨ opɨtata.

³ Jaɨkue rupi yandeYa oëta jare oñerarota jókuae tëtaguasu reta ndive, ñeraro iara pe oñoraro rami.

⁴ Jókuae ara ogüeyɨta ɨvɨtɨ Olivo jee vae re, Jerusalén jóvai kuaraɨ oëa kotɨ oï vae re; jare ɨvɨtɨ Olivo jee vae oyemboyaota mbɨte rupi, kuaraɨ oëa kotɨ jare oikea kotɨ rupi, jare opɨtata ɨvɨtɨ päu ipe kavi jare ɨvɨtɨ jovaichogüe opɨtata ɨvɨtuguasu kotɨ, jare ïru jovaichogüe opɨtata arayevɨ kotɨ.

⁵ Jare petekuaraita jókuae ɨvɨtɨ päu ipe kavi rupi, echa jókuae ɨvɨtɨ päu ipe kavi vae ojoita oväe Azal pe; petekuaraita petenondegua reta ɨvɨkana güi otekuarai rami, Uzías oiko mburuvicha guasurä Judá pe yave. CheYa Tumpa outa opaete oñeñono tee vae reta ndive.

⁶ Jókuae ara mbaetɨta jembipe kavi, mbaetɨta vi pɨtumimbi.

⁷ Jaeño jókuae ara yandeYa oikuaata, mbaetɨta ara ani pɨ̈tu. Kuaraɨ oike yave oimeñota tembipe.

⁸ Jare jókuae ara Jerusalén güi oëta ɨ tɨpambae, mbɨte rupi ojota Ɨguasu Jembochɨ vae pe, jare ïru mbɨte rupi ojota Ɨguasu Mediterráneo pe, kuaraɨ guasu iara pe jare iroɨ guasu iara pe.

⁹ YandeYa oïta mburuvicha guasurä opaete ɨvɨ re, jókuae ara yandeYa jaeño oïta, jare jee meteiñota vi.

¹⁰ Opaete ɨvɨ ipe kavi vae rami opɨtata Geba güive Rimón kotɨ, Jerusalén güi arayevɨ kotɨ. Jerusalén tuicha yaeta jare jeta yaeta pɨpe vae, öke Benjamín Röke jee vae güive tenondegua öke pe Ekina Röke jee vae pe, jare Hananeel jo ɨvate güive mburuvicha guasu reta iuva oñetɨamía pe.

¹¹ Jerusalén pe yogüɨreko yeta vae jare ngaraa ye ma oime ikavimbae, yogüɨreko pɨagüiveta.

¹² Kuae jae yandeYa iporonupa oyuka vaerä opaete tëta reta oñeraro Jerusalén ndive vae: Jae reta ipire ichuumbita iyemboɨ reve jare jesa reta ichuumbita jesakua pe, jare ikü ichuumbita iyuru pe.

¹³ Jókuae ara rupi, yandeYa ombouta kɨɨye yavaetegüe, metei ñavo okɨɨyeta oyougüi aeño jare opüata oyoe aeño.

¹⁴ Jare Judá pegua reta oñerarota vi Jerusalén pe, jare opɨ̈ro retata jetagüe mbaeyekou opaete tëtaguasu reta iyɨvɨrigua güi: Korepoti, oro jare temimonde.

¹⁵ Jökoraita vi imbaerasɨ kavayu, mburikaguasu, camello, mburika jare opaete mɨmba reta jókuae teyupa pe.

¹⁶ Jare opaete oikoveño yogüeru oporepeña Jerusalén re vae reta, oyeupita año ñavo omboete vaerä Mburuvicha guasu, yandeYa Imbaepuere yae ete vae jare omboareteta o ñairaka pegua.

¹⁷ Jare kia nunga tëta guasu güi mbaetɨ oyeupi Jerusalén kotɨ omboete vaerä Mburuvicha guasu, yandeYa Imbaepuere yae ete vae yave, ngaraa okɨ chupe reta.

¹⁸ Jare Egiptoɨgua reta mbaetɨ yave oyeupi, yandeYa oiporaraukata chupe ïru tëtaguasu reta pe rami, mbaetɨ ramo ojo ombaemboete o ñairaka pegua iyarete pe.

¹⁹ Kuae ko jae Egiptoɨgua reta oiporarata iyoa re vae, jare opaete tëtaguasu reta mbaetɨ oyeupi arete oyapo vaerä o ñairaka pegua vae.

²⁰ Jókuae ara rupi kavayu iyayu regua kapana raɨ re ave oyekuatiata: “YandeYa pe oñeñono tee vae.” Jare yapepo reta yandeYa jo pegua mɨmba oyeyuka oyeapɨ jese vae pegua tasa guasu ramita.

²¹ Jare opaete yapepo Jerusalén jare Judá pegua oñeñono teeta yandeYa Imbaepuere yae ete vae peguarä: Yogüeru mbota omee vae reta oiporu vaerä, pɨpe omboyɨ vaerä mɨmba oñererökuaveegüe, jókuae ara mbaetɨta ma omaemee vae yandeYa Imbaepuere yae vae itupao pe.