ZACARÍAS 13 - Biblia Guarani Tumpa Iñee

¹ Jókuae ara oyepeata metei ɨesaɨ David iñemuña reta peguarä jare Jerusalén pegua reta peguarä, oyeapo vaerä yetɨo mbaeyoa güi jare ikɨa Tumpa jóvai vae güi.

² YandeYa Imbaepuere yae ete vae jei: Jókuae ara amboaita tumpa-raanga reta jee, jare ngaraa ye ma kia imaendúa jese. Amboaita vi ɨvɨ güi ñeemombeúa reta jare espíritu ikavimbae pegua.

³ Jare amogüe omoërakua vɨteri mbae maratuta vae yave, tu jeita chupe: ‘¡Nde remanota, echa nemiari apu yandeYa jee re!’ Tu jare ichɨ aeño oikututa kɨse pe ñeemombeuarä oyeapo vae.

⁴ Jókuae ara imarata opaete ñeemombeúa reta imiari oechagüe re, metei ave mbaetɨta ma omonde mbae ipiregüe javuku vae, iyapu vaerä.

⁵ Jare jeita: ‘Che mbaetɨ ko ñeemombeúa; kó pe oparavɨkɨ vae ko che, chetaɨrusu güive ko pe aparavɨkɨ.’

⁶ Jare oparanduta chupe: ‘¿Këraiägua pa ndepere ndepo pe?’ Jare jae jeita: ‘Chevɨa-ïru reta ko chembopere cherëta pe.’ ”

YandeYa ivecha iyangarekoa omano

⁷ YandeYa Imbaepuere yae ete vae jei: “¡Kɨsepuku, epüa vecha iyangarekoa kotɨ, jókuae kuimbae cheïru kotɨ! ¡Eyuka vecha iyangarekoa jare toñemoai vecha reta, jare chepo añonota vecha raɨ reta kotɨ!

⁸ YandeYa jei: Jare opaete kuae ɨvɨ rupi, mbɨte oasa ye omanota, okañɨtei retata; ërei oimeñota jembɨre pɨpe vae.

⁹ Jare jókuae jembɨregüe amoingeta tata pe, jare amondɨkuita, korepoti oyemondɨkui rami, jare ambokavita, oro oyembokavi rami. Jayave jae chereenɨita, jare che aenduta chupe, jare jaeta: ‘Tëta chembae’, jare jae jeita: ‘YandeYa ko jae cheTumpa.’ ”