ZACARÍAS 10 - Biblia Guarani Tumpa Iñee

YandeYa oyorata imbae vae

¹ Peiporu yandeYa pe ama taɨkuegua, jae ama-vera oyapo vae ombouta peve jeta ama jare kaa jokɨ katuta peve.

² Echa tumpa-raanga reta iñee mbaetɨ ko añetete, jare maratuta vae imombeúa reta oecha apu, ipaɨu re imiari jare oporombopɨakatu jaanga; jáeramo tëta, vecha oikoiño vae rami, oiporara, echa mbaetɨ iyangarekoa.

³ Jáeramo yandeYa jei: “Maangarekoa reta kotɨ chearasɨ oyepota tata rami. Aiporaraukata mburuvicha reta pe.” Ërei yandeYa Imbaepuere yae ete vae oyangarekota imbae vae re, Judá iñemuña reta re, oyapota kavayu jëia yae ñeraro peguarä vae rami.

⁴ Chugüi oëta ita o iguapɨka, etaka o guakapi pegua oñeapɨti jese vae jare güɨrapa ñeraro pegua, jare opaete mburuvicha.

⁵ Sundaro jëia yae vae ramita ñeraro pe. Opɨ̈rota jovaicho reta re tuyuapo re rami. Oñoraro retata, echa yandeYa oïta jae reta ndive; jare kavayu regua reta oñemomaraiukata.

⁶ YandeYa jei: “Che amomɨ̈ratata Judá iñemuña reta, José iñemuña reta ayorata jare amboyerova yeta. Echa aɨu yae reta, jare ñogüɨnoita mbaetɨ etei aröɨro rami. Echa che ko jae iYa Tumpa, aenduta iyerure reta.

⁷ Efraín iñemuña reta sundaro jëia yae vae ramita. Ipɨa oyeroviata vino jou vae rami. Taɨ reta oecha yave oyerovia yaeta vi. ¡Ipɨa oyeroviata yandeYa re!

⁸ Chetɨvɨñee pe aenɨita, jare amboatɨ retata, echa che ayora retata. Oñemuña retata jeta tenonde yave rami.

⁹ Che ko amoai reta tëta guasu reta rupi, ërei yepe tëi ñogüɨnoi mombɨrɨ, imaenduata cheré, yogüɨrekota taɨ reta ndive jare oyerova reta yeta.

¹⁰ Echa che aru yeta Egipto güi; aru yeta Asiria güi. Arajata Galaad jare Líbano pe oata yeta jendarä.

¹¹ Oasa retata ɨguasu Egipto pegua, ɨaparúa amokïriita. Ɨ̈aka Nilo tɨpɨ yae vae amotinita, jare Asiria ipɨa pochɨ amboaita. Egipto imbaepuere amokañɨteita.

¹² Che ameeta chupe reta mɨ̈rata, jare cheree re oguata retata. Che peYa jae kuae.”