ZACARÍAS 1 - Biblia Guarani Tumpa Iñee

YandeYa oporoenɨi oime vaerä yepoepɨ

¹ Darío mokoía año ma oiko mburuvicha guasurä yave, juría yasɨ pe ou yandeYa iñee ñeemombeúa Zacarías pe, Berequías taɨ, Iddo jɨmɨmino pe, jei körai:

² “YandeYa iyarasɨ yae peñemuñagüe reta kotɨ.

³ Ere körai chupe reta: ‘Körai jei yandeYa Imbaepuere yae ete vae: Peyerova ye chekotɨ, jare che ayerova yeta pekotɨ, jei yandeYa Imbaepuere yae ete vae.

⁴ Agüɨye peiko peñemuñagüe reta rami, chupe reta tenondegua ñeemombeúa reta oñemoñee, jei reve: YandeYa Imbaepuere yae ete vae jei: Peyerova ye añave pereko kavimbae güi jare perembiapo kavimbae güi; ërei jae reta mbaetɨ oipota oyeapɨsaka jare oendu reta cheñee, jei yandeYa.

⁵ Jare añave, ¿jama pa peñemuñagüe reta? Jare ñeemombeúa reta, ¿yogüɨreko aveita pa?

⁶ Ërei, cheñee jare cheporookuai reta amee cherembiokuai cheñeemombeúa reta pe omombeu vaerä vae, ¿mbaetɨ pa oa peñemuñagüe reta re? Jáeramo, jae reta oyerova ye jare jei reta: YandeYa Imbaepuere yae ete vae oyemongeta kërai yanderereko vaerä yandereko jare yanderembiapo oï rupi, jökorai oyapo yande ndive.’ ”

Kavayu regua reta oyekuaa

⁷ Yasɨ oncea veinticuatro ara pe, jae ko Sebat yasɨ, Darío mokoía año ma oiko mburuvicha guasurä yave, yandeYa iñee ou ñeemombeúa Zacarías, Berequías taɨ pe, jae ko Iddo jɨmɨmino, körai:

⁸ Metei pɨ̈tu aecha, metei kuimbae kavayu pɨ̈ta vae re opo oï ñana pɨte pe ɨvɨtɨ päu ipea pe; jare jaɨkue kotɨ ñogüɨnoi kavayu pɨ̈ta vae reta, ipara jare tïi vae reta.

⁹ Jayave jae: “¿Kia reta pa ko kuae cheYa?” Jare araɨgua imiari che ndive vae jei cheve: “Che amombeuta ndeve kia reta ko vae.”

¹⁰ Jare jókuae kuimbae ñana pɨte pe oï vae jei: “Kuae reta ko jae yandeYa ombou oguata vaerä opaete ɨvɨ rupi.”

¹¹ Jare jae reta imiari yandeYa iaraɨgua ñana pɨte pe oï vae pe, jei reta: “Rojo ma opaete ɨvɨ rupi, jare roväe kïrii ngatu jare oputuu kavi.”

¹² Jayave yandeYa iaraɨgua jei: “CheYa Imbaepuere yae ete vae, ¿kërai yave regua pa mbaetɨ reiparareko Jerusalén vae oikota, jare Judá pegua tëta reta, kuae re setenta año ma ndearasɨ reiko?”

¹³ Jare yandeYa jei ñee ikavigüe, ñee oporombopɨakatu vae, araɨgua imiari che ndive vae pe.

¹⁴ Jare araɨgua imiari che ndive vae jei cheve: “Emoërakua rere reve: ‘Körai jei yandeYa Imbaepuere yae ete vae: Cherägüɨro yae Jerusalén re, jae ko Sión.

¹⁵ Jare chearasɨ yae aï tëtaguasu reta kïrii ngatu ñogüɨnoi vae kotɨ; echa michiño chearasɨ yave jae reta ombojeiete ikavimbae vae.

¹⁶ Jáeramo, che ayerova Jerusalén kotɨ cheporoparareko ndive, joko pe chero amopüa pɨau yeta jare Jerusalén, jei yandeYa Imbaepuere yae ete vae.’ ”

¹⁷ Jei ye cheve: “Emoërakua ye rere reve: ‘Körai jei yandeYa Imbaepuere yae ete vae: Tëta chembae vae reta güɨnoi yeta jeta mbae jare ambopɨakatu vɨterita Sión, jae ko Jerusalén aiparavo vae.’ ”

Guakaräti reta jare oparavɨkɨ vae reta

¹⁸ Jaɨkue rupi amae jare aecha ye irundɨ guakaräti.

¹⁹ Jare jae araɨgua imiari che ndive vae pe: “¿Mbae pa kuae reta? jare jae jei: ‘Kuae ko jae guakaräti reta Judá, Israel jare Jerusalén opa omoai moai vae.’ ”

²⁰ YandeYa oechauka ye cheve irundɨ ipoki ɨvɨra pegua mbaravɨkɨ oyapo vae.

²¹ Jare che jae: “¿Mbae pa kuae reta ou oyapo?” Jare jae jei cheve: “Jókuae guakaräti opa omoai moai Judá jare mbaetɨ etei kia ave iñäka omopüa; ërei kuae reta yogüeru oporomongɨɨye vaerä jare oyasɨa vaerä guakaräti reta tëtaguasu reta güi, Judá iɨvɨ re opüa opa vaerä omoai moai vae.”